مجمع الزوائد ومنبع الفوائد

سیدنا عبداللہ بن عباس رضی اللہ عنہما فرماتے ہیں : تاریخ ( یعنی ہجری تقویم ) کا آغاز اس سال سے ہوا ، جس سال نبی اکرم صلی اللہ علیہ وسلم ( ہجرت کر کے ) مدینہ منورہ تشریف لائے تھے ، اُسی سال میں سیدنا عبداللہ بن زبیر رضی اللہ عنہما پیدا ہوئے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یعقوب بن عباد مکی ہے ، میں نے کسی کو اس کا ذکر کرتے ہوئے نہیں دیکھا ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم پیر کے دن پیدا ہوئے ، پیر کے دن آپ صلی اللہ علیہ وسلم کو نبوت ملی ، پیر کے دن آپ صلی اللہ علیہ وسلم ہجرت کرنے کے لیے مکہ سے نکل کر مدینہ کی طرف روانہ ہوئے ، پیر کے دن آپ صلی اللہ علیہ وسلم مدینہ تشریف لائے ، پیر کے دن آپ کا وصال ہوا ، آپ صلی اللہ علیہ وسلم نے حجر اسود پیر کے دن اٹھایا تھا ۔
یہ روایت امام أحمد نے ( اپنی مسند میں ) اور امام طبرانی نے معجم کبیر میں نقل کی ہے ، اس میں یہ الفاظ زائد ہیں : ” آپ صلی اللہ علیہ وسلم نے غزوہ بدر میں پیر کے دن کامیابی حاصل کی ، سورہ مائدہ کی یہ آیت پیر کے دن نازل ہوئی : ” آج کے دن میں نے تمہارے لئے تمہارے دین کو مکمل کر دیا “ ۔ ۔ ۔ ۔ ۔ ۔ ۔ الخ اس روایت کی سند میں ایک راوی ابن لہیعہ ہے اور وہ ضعیف ہے جبکہ اس روایت کے بقیہ رجال ثقہ ہیں ، اور وہ صحیح کے راویوں میں سے ہیں ۔

سیدنا جریر رضی اللہ عنہ بیان کرتے ہیں : نبی اکرم صلی اللہ علیہ وسلم کا وصال تریسٹھ برس کی عمر میں ہوا تھا ، سیدنا ابوبکر رضی اللہ عنہ کا وصال بھی تریسٹھ برس کی عمر میں ہوا ، اور جب سیدنا عمر رضی اللہ عنہ کو شہید کیا گیا ، اُس وقت وہ بھی تریسٹھ برس کے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حماد بن بحر ہے امام ذہبی فرماتے ہیں : وہ مجہول ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کا وصال پینسٹھ سال کی عمر میں ہوا ۔
یہ روایت امام طبرانی نے معجم اوسط میں نقل کی ہے اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کی پیدائش عام الفیل میں ہوئی تھی ۔
یہ روایت امام بزار نے ( اپنی مسند میں ) اور امام طبرانی نے معجم کبیر میں نقل کی ہے ، اس کے رجال کی توثیق کی گئی ہے ۔

سیدنا ابوامامہ باہلی رضی اللہ عنہ بیان کرتے ہیں : ایک شخص نے عرض کی : یا رسول اللہ ! کیا سیدنا آدم علیہ السلام نبی تھے ؟ نبی اکرم صلی اللہ علیہ وسلم نے جواب دیا : جی ہاں ! اُس نے دریافت کیا : سیدنا آدم علیہ السلام اور سیدنا نوح علیہ السلام کے درمیان کتنا عرصہ ہے ؟ نبی اکرم صلی اللہ علیہ وسلم نے ارشاد فرمایا : دس صدیوں کا ، اُس نے دریافت کیا : سیدنا نوح علیہ السلام اور سیدنا ابراہیم علیہ السلام کے درمیان کتنا عرصہ ہے ؟ نبی اکرم صلی اللہ علیہ وسلم نے جواب دیا : دس صدیوں کا ، اُس نے دریافت کیا : یا رسول اللہ ! رسولوں کی تعداد کتنی ہے ؟ نبی اکرم صلی اللہ علیہ وسلم نے ارشاد فرمایا : تین سو پندرہ ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا ابوذر غفاری رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم اس وقت خطبہ ارشاد فرما رہے تھے ، وہ بیٹھ گئے ، نبی اکرم صلی اللہ علیہ وسلم نے ان سے فرمایا : کیا تم نے جنات اور انسانوں سے تعلق رکھنے والے شیاطین کے شر سے پناہ مانگ لی ہے ؟ میں نے عرض کی : یا رسول اللہ ! سب سے پہلے نبی کون تھے ؟ نبی اکرم صلی اللہ علیہ وسلم نے ارشاد فرمایا : سیدنا آدم علیہ السلام ، میں نے دریافت کیا : کیا وہ نبی تھے ؟ آپ صلی اللہ علیہ وسلم نے جواب دیا : جی ہاں ! اُن کے ساتھ کلام کیا گیا تھا ، میں نے دریافت کیا : پھر کون ( نبی ) تھے ؟ آپ صلی اللہ علیہ وسلم نے ارشاد فرمایا : سیدنا نوح علیہ السلام ، ان دونوں کے درمیان دس پشتوں کا فرق ہے ، میں نے عرض کی : یا رسول اللہ ! آپ مجھے نماز کے بارے میں بتائیے ! آپ صلی اللہ علیہ وسلم نے ارشاد فرمایا : یہ ایک بھلائی ہے ، جو لازم قرار دی گئی ہے ، جو شخص چاہے وہ اسے زیادہ حاصل کر سکتا ہے ، میں نے عرض کی : صدقہ ؟ آپ صلی اللہ علیہ وسلم نے فرمایا : ( اس کا اجر و ثواب ) کئی گنا ہوتا ہے ، میں نے عرض کی : اور روزہ ؟ آپ صلی اللہ علیہ وسلم نے ارشاد فرمایا : روزہ ڈھال ہے ، اللہ تعالیٰ نے فرمایا ہے : روزہ میرے لیے ہے اور میں اس کی جزا دوں گا ( نبی اکرم صلی اللہ علیہ وسلم نے فرمایا : ) اُس ذات کی قسم ! جس کے دست قدرت میں میری جان ہے ، روزہ دار کے منہ کی بو ، اللہ تعالیٰ کے نزدیک مشک کی خوشبو سے زیادہ پاکیزہ ہے ( سیدنا ابوذر غفاری رضی اللہ عنہ بیان کرتے ہیں : میں نے دریافت کیا : کون سا صدقہ زیادہ فضیلت رکھتا ہے ؟ آپ صلی اللہ علیہ وسلم نے فرمایا : تنگدست شخص کا محنت کر کے ( صدقہ کرنا ) یا کسی غریب کو پوشیدہ طور پر ( صدقہ دینا ) میں نے عرض کی : ( آزاد کرنے کے لئے ) کون سا غلام زیادہ فضیلت رکھتا ہے ؟ آپ صلی اللہ علیہ وسلم نے فرمایا : جس کی قیمت زیادہ ہو ۔
یہ روایت امام طبرانی نے معجم اوسط میں نقل کی ہے ، ( علامہ ہیثمی فرماتے ہیں : ) میں یہ کہتا ہوں : اس سے پہلے نفع حاصل کرنے کے لیے سوال کرنے سے متعلق باب میں یہ بات گزر چکی ہے کہ امام أحمد اور امام بزار نے بھی اس روایت کو نقل کیا ہے ، اس کی سند میں ایک راوی ابن لہیعہ ہے اور وہ ضعیف ہے ۔

حضرت سعید بن یربوع رضی اللہ عنہ بیان کرتے ہیں : نبی اکرم ﷺ نے ان سے فرمایا : میں بڑا ہوں یا تم ؟ تو میں نے عرض کی : آپ ﷺ مجھ سے بڑے ہیں اور مجھ سے بہتر ہیں ، لیکن عمر میری زیادہ ہے ۔
یہ روایت امام بزار نے ( اپنی مسند میں ) اور امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

دغفل بیان کرتے ہیں : نبی اکرم صلی اللہ علیہ وسلم کا وصال 65 سال کی عمر میں ہوا تھا ۔
یہ روایت امام ابویعلیٰ نے نقل کی ہے اس کے رجال صحیح کے رجال ہیں ، یہ روایت امام طبرانی نے بھی نقل کی ہے ۔

حسن بیان کرتے ہیں : آپ صلی اللہ علیہ وسلم کا وصال ساٹھ سال کی عمر میں ہوا تھا ۔
یہ روایت امام ابویعلیٰ نے ( اپنی مسند میں ) سیدنا عبداللہ بن عباس رضی اللہ عنہما سے منقول حدیث کے ضمن میں نقل کی ہے ، اس کے رجال کی توثیق کی گئی ہے ۔

ابوحمزہ نے اپنے والد کا یہ بیان نقل کیا ہے : جب نبی اکرم صلی اللہ علیہ وسلم کا وصال ہوا ، تو آپ صلی اللہ علیہ وسلم کی عمر 63 برس تھی ۔
یہ روایت امام طبرانی نے نقل کی ہے اس کے رجال صحیح کے رجال ہیں ۔

سیدنا واثلہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا ابراہیم علیہ السلام کے صحیفے رمضان کی پہلی رات میں نازل ہوئے تھے ، تورات رمضان کے چھ دن گزرنے کے بعد نازل ہوئی تھی ، انجیل رمضان کے تیرہ دن گزرنے کے بعد نازل ہوئی تھی ، قرآن رمضان کے چوبیس دن گزرنے کے بعد نازل ہوا ۔ “
یہ روایت امام أحمد نے ( اپنی مسند میں ) اور امام طبرانی نے معجم کبیر اور معجم اوسط میں نقل کی ہے اور اس کی سند میں ایک راوی عمران بن داؤد القطان ہے ، جس کو یحیی نے ضعیف قرار دیا ہے اور ابن حبان نے اسے ثقہ قرار دیا ہے ، امام أحمد فرماتے ہیں : مجھے یہ امید ہے کہ یہ صالح الحدیث ہو گا ، اس روایت کے بقیہ رجال ثقہ ہیں ۔

سیدنا جابر رضی اللہ عنہ بیان کرتے ہیں : اللہ تعالیٰ نے سیدنا ابراہیم علیہ السلام کے صحیفے رمضان کی پہلی رات گزرنے کے بعد نازل کئے ، سیدنا موسیٰ علیہ السلام پر تورات رمضان کی چھ راتیں گزرنے کے بعد نازل ہوئی ، سیدنا داؤد علیہ السلام پر زبور رمضان کی گیارہ راتیں گزرنے کے بعد نازل ہوئی اور سیدنا محمد صلی اللہ علیہ وسلم پر قرآن رمضان کی چوبیس راتیں گزرنے کے بعد نازل ہوا ۔
یہ روایت امام ابویعلیٰ نے نقل کی ہے اور اس کی سند میں ایک راوی سفیان بن وکیع ہے اور وہ ضعیف ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کے اصحاب نے ہمیں یہ بات بتائی ہے : نبی اکرم صلی اللہ علیہ وسلم نے ارشاد فرمایا ہے : ” ہجرت کے بعد 100 سال گزرنے پر تم میں سے کوئی بھی زندہ نہیں رہے گا “ ۔
یہ روایت امام ابویعلیٰ نے نقل کی ہے اور اس کی سند میں ایک راوی سفیان بن وکیع ہے اور وہ ضعیف ہے ۔

نعیم بن دجاجہ بیان کرتے ہیں : سیدنا ابومسعود عقبہ بن عمرو انصاری رضی اللہ عنہ سیدنا علی بن ابوطالب رضی اللہ عنہ کے پاس تشریف لائے ، تو سیدنا علی رضی اللہ عنہ نے اُن سے فرمایا : آپ ہی نے یہ بات بیان کی ہے کہ 100 سال گزرنے پر روئے زمین پر موجود کوئی آنکھ جھپکے گی نہیں ( یعنی کوئی زندہ نہیں رہے گا ) حالانکہ نبی اکرم صلی اللہ علیہ وسلم نے یہ ارشاد فرمایا ہے : ” ایک سو سال گزرنے پر ، لوگوں میں سے آج جو زندہ ہے ، اُن میں سے کوئی بھی زندہ نہیں رہے گا “ ۔ پھر سیدنا علی رضی اللہ عنہ نے فرمایا : ) اللہ کی قسم ! ایک سو سال گزرنے کے بعد اس اُمت میں سہولت ( یا فراخی ) آئے گی ۔
یہ روایت امام أحمد اور امام ابویعلیٰ نے ( اپنی ، اپنی مسند میں ) اور امام طبرانی نے معجم کبیر اور معجم اوسط میں نقل کی ہے ، اور اس کے رجال ثقہ ہیں ۔

نعیم بن دجاجہ بیان کرتے ہیں : میں ، سیدنا علی رضی اللہ عنہ کے پاس بیٹھا ہوا تھا ، اسی دوران سیدنا ابومسعود رضی اللہ عنہ تشریف لے آئے ، سیدنا علی رضی اللہ عنہ نے فرمایا : فروخ آ گیا ہے ، پھر سیدنا علی رضی اللہ عنہ نے فرمایا : کیا تم لوگوں کو حکم بیان کرتے ہو ؟ انہوں نے جواب دیا : جی ہاں ! میں انہیں وقت کے بارے میں بتاتا ہوں ، کہ بعد والا وقت زیادہ برا ہو گا ، سیدنا علی رضی اللہ عنہ نے فرمایا : پھر تم مجھے بتاؤ ! کیا تم نے نبی اکرم صلی اللہ علیہ وسلم کی زبانی کوئی بات سنی ہے ؟ انہوں نے جواب دیا : جی ہاں ! میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ایک سو سال گزرنے کے بعد روئے زمین پر کوئی شخص زندہ نہیں رہے گا “ سیدنا علی رضی اللہ عنہ نے فرمایا : تم نے ( مفہوم سمجھنے میں ) غلطی کی ہے اور تم نے اپنے پہلے فتوی میں غلطی کی ہے ، نبی اکرم صلی اللہ علیہ وسلم کی مراد یہ تھی کہ جو لوگ اُس وقت وہاں موجود تھے ( ایک سو سال گزرنے کے بعد اُن میں سے کوئی زندہ نہیں رہے گا ، نبی اکرم صلی اللہ علیہ وسلم کی امت کے لیے ) سہولت ، تو ایک سو سال کے بعد ہی آئے گی ۔
یہ روایت امام ابویعلیٰ نے نقل کی ہے اس کے رجال بھی ثقہ ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم سے سوال کرنے کے حوالے سے سب سے زیادہ جرات کا مظاہرہ دیہاتی لوگ کیا کرتے تھے ، ایک مرتبہ ایک دیہاتی آپ کے پاس آیا ، اُس نے دریافت کیا : یا رسول اللہ ! قیامت کب آئے گی ؟ نبی اکرم صلی اللہ علیہ وسلم نے اُسے کوئی جواب نہیں دیا ، آپ صلی اللہ علیہ وسلم مسجد تشریف لائے ، آپ صلی اللہ علیہ وسلم نے مختصر نماز ادا کی ، پھر آپ دیہاتی کی طرف متوجہ ہوئے اور ارشاد فرمایا قیامت کے بارے میں سوال کرنے والا شخص کہاں ہے ؟ آپ کے پاس سے سیدنا سعد رضی اللہ عنہ گزرے ، تو نبی اکرم صلی اللہ علیہ وسلم نے ارشاد فرمایا : اگر اس شخص کی طبعی عمر ہوئی ، تو تم لوگوں میں سے کوئی بھی ( اُس وقت تک ) زندہ نہیں رہے گا ۔ یہ روایت امام ابویعلیٰ نے نقل کی ہے ۔ ( علامہ ہیثمی فرماتے ہیں : ) میں یہ کہتا ہوں : ” صحیح“ سیدنا انس رضی اللہ عنہ کے حوالے سے یہ روایت منقول ہے : ” اگر یہ زندہ رہا ، یہاں تک کہ اس کی طبعی عمر مکمل ہوئی ، تو اس کے مرنے سے پہلے قیامت قائم ہو جائے گی“ ۔
یہ روایت زیادہ واضح ہے ، اگرچہ اس کی سند میں ایک راوی سفیان بن وکیع ہے اور وہ ضعیف ہے ۔

سیدنا سفیان بن وہب خولانی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ایک سو سال گزرنے تک روئے زمین پر کوئی بھی باقی نہیں رہے گا “ ۔
یہ روایت امام طبرانی نے معجم کبیر میں نقل کی ہے ، اس روایت کے راوی سعید بن ابوشمر کا ذکر این ابوحاتم نے کیا ہے ، وہ فرماتے ہیں : انہوں نے اپنے والد سے روایت نقل کی ہے ، اور ان سے ابوبکر بن سواد نے روایت نقل کی ہے ، حالانکہ ان سے عبدالرحمن بن شریح نے روایت نقل کی ہے ، اور کسی نے ان کو ضعیف قرار نہیں دیا ، اس روایت کے بقیہ رجال کی توثیق کی گئی ہے ۔

سیدنا ابوثعلبہ رضی اللہ عنہ سے یہ روایت منقول ہے : معاویہ نامی راوی نے ایک مرتبہ اسے مرفوع روایت کے طور پر نقل کیا ہے ، اور ایک مرتبہ اسے مرفوع روایت کے طور پر نقل نہیں کیا ہے ( بلکہ موقوف روایت کے طور پر نقل کیا ہے ، وہ فرماتے ہیں : ) ” بے شک اللہ تعالیٰ اس امت کو نصف دن ( یعنی پانچ سو سال ) سے عاجز نہیں کرے گا اور جب تم شام کو دیکھو کہ وہ آدمی اور اُس کے اہل بیت کا دستر خوان ہو ، تو اس وقت قسطنطنیہ فتح ہو گا “ ۔
( علامہ ہیثمی فرماتے ہیں : ) میں یہ کہتا ہوں : یہ روایت امام طبرانی نے نقل کی ہے ” اطراف “ کے مصنف نے اس کی نسبت امام ابوداؤد کی طرف کی ہے اور یہ کہا: ہے : یہ روایت جنگوں سے متعلق باب میں ہے ، لیکن مجھے اس کتاب میں یہ روایت نہیں ملی ، اس کی سند میں ایک راوی عبداللہ بن صالح ہے ، جو لیث کا کاتب ہے ، اس سے استدلال کرنے کے بارے میں اختلاف کیا گیا ہے ، اس روایت کے بقیہ رجال ثقہ ہیں ۔

عبدالملک بن راشد بیان کرتے ہیں : میں نے نبی اکرم صلی اللہ علیہ وسلم کے صحابی سیدنا مقدام بن معدیکرب رضی اللہ عنہ کو سنا : اکثر لوگوں کا یہ کہنا تھا : سو سال میں فیصلہ آ جائے گا ، یعنی 100 ہجری میں قیامت آ جائے گی ، تو سیدنا مقدام رضی اللہ عنہ نے فرمایا : تم نے زیادہ ہی کر دیا ہے ، ایسا نہیں ہو گا کہ اللہ تعالیٰ اس اُمت کو نصف دن کا وقت بھی نہ دے ، اُن کی مراد 500 سال تھے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی بقیہ بن ولید ہے ، اور وہ ثقہ ہے ، لیکن تدلیس کرنے والا ہے ۔

سیدنا بریدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک سو سال گزرنے پر کوئی آنکھ نہیں جھپکے گی ( یعنی کوئی شخص زندہ نہیں رہے گا ) “ ۔

ایک روایت میں یہ الفاظ ہیں : وہ بیان کرتے ہیں : نبی اکرم صلی اللہ علیہ وسلم نے فرمایا : ” ایک سو سال گزرنے پر ، اللہ تعالیٰ ایک ہوا بھیجے گا اور اُس کے ذریعے ) ہر مؤمن کی روح قبض کر لے گا “ ۔ یہ روایت امام بزار نے نقل کی ہے اس کے رجال صحیح کے رجال ہیں ۔

سیدنا ابوذر غفاری رضی اللہ عنہ بیان کرتے ہیں : وہ لوگ نبی اکرم صلی اللہ علیہ وسلم کے ساتھ غزوہ تبوک میں تھے ، آپ صلی اللہ علیہ وسلم نے ارشاد فرمایا : اے لوگو ! آج جو لوگ زندہ ہیں ، اُن میں سے کسی پر بھی ایک سو سال گزرنے کا وقت نہیں آئے گا ، اللہ تعالیٰ کو اس کے حوالے سے کسی چیز کی پرواہ نہیں ہو گی ۔
( علامہ ہیثمی فرماتے ہیں : ) میں یہ کہتا ہوں : یہی روایت امام بزار نے ، اس سے زیادہ طویل روایت کے درمیان میں بیان کی ہے اس کی سند میں ایک راوی علی بن زید ہے اور وہ ضعیف ہے ، اُس نے اسے عبداللہ بن قدامہ بن صخر سے روایت کیا ہے ، مجھے نہیں معلوم کہ وہ کون ہے ؟

سیدنا ابوطفیل رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کی حیات مبارکہ کے آٹھ سال پائے ہیں ، میں غزوہ احد کے سال پیدا ہوا تھا ۔
یہ روایت امام أحمد نے نقل کی ہے ، اس کی سند میں ایک راوی ثابت بن ولید بن عبداللہ بن جمیع ہے ، ابن عدی نے اس کا ذکر ” کتاب الکامل “ میں کیا ہے ، لیکن اُس کے بارے میں کوئی بات نہیں کہی ہے ، ابن حبان نے اس کا تذکرہ کتاب الثقات میں کیا ہے وہ فرماتے ہیں : یہ بعض اوقات غلطی کر جاتا ہے ، امام أحمد نے اس سے روایت نقل کی ہے اور اس کے شیوخ ، ثقہ ہیں ۔

سیدنا ابوطفیل رضی اللہ عنہ بیان کرتے ہیں : جب نبی اکرم صلی اللہ علیہ وسلم مبعوث ہوئے تھے ، میں اُس وقت لڑکا تھا ، اور نیچے سے گوشت اُٹھا کر پہاڑ پر لے جایا کرتا تھا ۔
یہ روایت امام بزار نے اور امام طبرانی نے معجم اوسط میں نقل کی ہے ، اسے مہدی بن عمران نے روایت کیا ہے ، امام بخاری رحمہ اللہ فرماتے ہیں : سیدنا ابوطفیل رضی اللہ عنہ سے اس روایت کو نقل کرنے میں اس راوی کی متابعت نہیں کی گئی ہے انہوں نے اس کے حوالے سے وہ حدیث نقل کی ہے ، جن میں یہ مذکور ہے : دجال ، ابن صیاد ہے ۔ ( علامہ ہیثمی فرماتے ہیں : ) : مجھے نہیں معلوم کہ امام بخاری رحمہ اللہ کی مراد کیا ہے ؟ کیا یہ کہ صرف اُس ایک حدیث کے حوالے سے اس کی سماعت نہیں کی گئی ہے ، یا ان کی مراد اس راوی کی نقل کردہ تمام حدیث ہیں ، دوسرا راوی خالد بن ابویحیی ہے ، میں نے کسی کو اس کا ذکر کرتے ہوئے نہیں پایا ہے ۔

سیدنا ابوطفیل رضی اللہ عنہ فرماتے ہیں : میں نے نبی اکرم صلی اللہ علیہ وسلم کی حیات مبارکہ کے آٹھ سال پائے ہیں ، میں غزوہ اُحد کے سال پیدا ہوا تھا ۔ امام أحمد کے صاحبزادے عبداللہ کہتے ہیں : میرے والد فرماتے ہیں : ثابت ہمارے پاس کوفہ آئے تھے ، وہ ( عباسی خلیفہ ) ابوجعفر ( منصور ) کے آباد کیے ہوئے شہر میں ٹھہرے تھے ، میں اور یحیی بن معین گئے تھے ، اور ہم نے اُن سے احادیث کا سماع کیا تھا ۔
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

عبدالملک بن سلع بیان کرتے ہیں : میں نے عبدخیر سے دریافت کیا : آپ کی عمر کتنی ہے ؟ انہوں نے جواب دیا : 120 سال ، میں نے دریافت کیا : کیا آپ کو زمانہ جاہلیت کی کوئی چیز یاد ہے ؟ انہوں نے جواب دیا : جی ہاں ! ہم یمن میں اپنے علاقے میں تھے ، ہمارے پاس اللہ کے رسول کا مکتوب آیا ، آپ صلی اللہ علیہ وسلم نے لوگوں کو ایک کشادہ بھلائی کی طرف دعوت دی تھی ، میرے والد بھی جانے والوں میں شامل تھے ، میں ان دنوں لڑکا تھا ، جب میرے والد واپس آئے ، تو انہوں نے میری والدہ سے کہا : تم ہنڈیا کے بارے میں ہدایت کرو ، کہ اُس کا کھانا کتوں کے آگے ڈال دیا جائے ، کیونکہ ہم نے اسلام قبول کر لیا ہے ۔
یہ روایت امام ابویعلیٰ نے نقل کی ہے اور اس کے رجال کی توثیق کی گئی ہے ۔ ( علامہ ہیثمی فرماتے ہیں : ) میں یہ کہتا ہوں : ایسی بہت سی روایات ، جو تاریخ اور دیگر امور سے متعلق ہیں ، وہ صحابہ کرام کے مناقب سے متعلق باب کے آخر میں آئیں گی ۔