مجمع الزوائد ومنبع الفوائد

سیدنا ابوذر غفاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دو افراد ایک سے بہتر ہوتے ہیں ، اور تین افراد ، دو سے بہتر ہوتے ہیں اور چار افراد ، تین سے بہتر ہوتے ہیں ، تم پر جماعت کے ساتھ رہنا لازم ہے ، کیونکہ اللہ تعالیٰ میری امت کو صرف ہدایت پر ہی اکٹھا کرے گا ۔ “
یہ روایت امام أحمد نے نقل کی ہے اس کی سند میں ایک راوی بختری بن عبید بن سلمان ہے اور وہ ضعیف ہے ۔

سیدنا ابوبصرہ رضی اللہ عنہ جو نبی اکرم صلی اللہ علیہ وسلم کے صحابی ہیں ، وہ نبی اکرم صلی اللہ علیہ وسلم کا یہ فرمان نقل کرتے ہیں : ” میں نے اپنے پروردگار سے چار چیزوں کا سوال کیا ، تو اس نے تین چیزیں مجھے عطا کر دیں اور ایک چیز عطا نہیں کی ، میں نے اللہ تعالیٰ سے سوال کیا کہ وہ میری امت کو گمراہی پر اکٹھا نہ کرے ، تو اللہ تعالیٰ نے یہ چیز مجھے عطا کر دی ۔ “
یہ روایت امام أحمد نے نقل کی ہے ۔ یہ مکمل روایت آگے فتنوں سے متعلق ابواب میں آئے گی ، اس کی سند میں ایک راوی ایسا ہے جس کا نام بیان نہیں کیا گیا ہے ۔

سیدنا عبداللہ بن مسعود رضی اللہ عنہ فرماتے ہیں : بے شک اللہ تعالیٰ نے بندوں کے دلوں کی طرف نظر کی ، تو اس نے سیدنا محمد صلی اللہ علیہ وسلم کے دل کو تمام بندوں کے دلوں سے زیادہ بہتر پایا ، تو انہیں اپنی ذات کے حوالے سے منتخب کر لیا ، اور اپنی رسالت کے ہمراہ مبعوث کیا ، پھر اس نے ( سیدنا محمد صلی اللہ علیہ وسلم کے دل کے بعد ) بندوں کے دلوں کا جائزہ لیا ، تو ان کے اصحاب کے دلوں کو تمام بندوں کے دلوں سے زیادہ بہتر پایا ، تو انہیں اپنے نبی کا وزیر بنا دیا ، جو اس کے دین کے حوالے سے جنگ کرتے ہیں ، مسلمان جس چیز کو اچھا سمجھیں ، وہ چیز اللہ تعالیٰ کے نزدیک بھی اچھی شمار ہو گی ، اور مسلمان جس چیز کو برا سمجھیں ، وہ اللہ تعالیٰ کے نزدیک بھی بری شمار ہو گی ۔
یہ روایت امام أحمد ، امام بزار اور امام طبرانی نے معجم کبیر میں نقل کی ہے ، اس کے رجال کی توثیق کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : میں نے عرض کی : یا رسول اللہ ! اس بارے میں آپ کی کیا رائے ہے ؟ اگر ہمیں کوئی ایسا معاملہ درپیش ہوتا ہے ، جس کے بارے میں قرآن نازل نہ ہوا ہو ، اور اس کے حوالے سے آپ کی طرف سے کوئی سنت بھی موجود نہ ہو ، تو نبی اکرم صلی اللہ علیہ وسلم نے ارشاد فرمایا : تم اسے اہل ایمان میں سے ، عبادت گزار افراد کے درمیان باہمی مشورے کے لیے پیش کر دینا ، اور تم اس کے حوالے سے بطور خاص کسی ایک کی رائے کی بنیاد پر فیصلہ نہ دینا ۔ ۔ ۔ ۔ ۔ ۔ ۔ اس کے بعد راوی نے پوری حدیث نقل کی ہے ، یہ مکمل حدیث ، قیاس سے متعلق باب میں آگے آئے گی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبداللہ بن کیسان ہے ، امام بخاری رحمہ اللہ فرماتے ہیں : یہ منکر الحدیث ہے ۔

سیدنا جبیر بن مطعم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” قریش سے تعلق رکھنے والے افراد کو غیر قریش سے تعلق رکھنے والے فرد سے دگنی قوت عطا کی گئی ہے ۔ “ راوی بیان کرتے ہیں : میں نے زہری سے دریافت کیا : اس کے ذریعے نبی اکرم صلی اللہ علیہ وسلم کی مراد کیا ہے ؟ انہوں نے جواب دیا : رائے کا پختہ ہوتا ۔
یہ روایت امام أحمد نے نقل کی ہے اور امام أحمد کے رجال صحیح کے رجال ہیں ۔