مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص اپنی زبان کو حق کے لیے استعمال کرتا ہے ، تاکہ اُس کے بعد اس حق پر عمل کیا جائے ، تو اُس شخص کا اجر قیامت کے دن تک جاری رہتا ہے ، پھر قیامت کے دن اللہ تعالیٰ اُسے پورا ثواب عطا کرے گا ۔ “
یہ روایت امام أحمد نے نقل کی ہے ، اس کی سند میں ایک راوی عبیداللہ بن عبداللہ بن موہب ہے ، امام أحمد فرماتے ہیں : یہ معروف نہیں ہے ( یا اس کی شناخت نہیں ہو سکی ) ( علامہ ہیثمی فرماتے ہیں : ) میں یہ کہتا ہوں : ابن موہب کے استاد مالک بن مالک بن حارثہ انصاری ہیں ، میں نے کسی کو اُن کے حالات بیان کرتے ہوئے نہیں دیکھا ۔

سیدنا ابوامامہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” چار لوگ ہیں ، جن کے اجور موت کے بعد بھی جاری رہتے ہیں ، وہ شخص جو اللہ کی راہ میں پہرہ دیتے ہوئے انتقال کر جائے ، وہ شخص جو کسی علم کی تعلیم دے ، تو جب تک اس علم پر عمل کیا جاتا رہتا ہے ، اس شخص کا عمل جاری رہتا ہے ، وہ شخص جو صدقہ جاریہ کرے کہ جب تک وہ صدقہ چلتا رہتا ہے ، اُس کا اجر جاری رہتا ہے اور وہ شخص جو نیک اولاد چھوڑ کر جائے جو اس کے لئے دعا کرے ۔ “
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ۔ یہ امام بزار نے بھی نقل کی ہے ، اس کی سند میں ایک راوی ابن لہیعہ ہے اور ایک ایسا راوی ہے ، جس کا نام بیان نہیں کیا گیا ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” سات لوگ ہیں ، جن کا اجر اُن کے مرنے کے بعد بھی جاری رہتا ہے ، جبکہ وہ قبر میں ہوتے ہیں ، وہ شخص جو کسی علم کی تعلیم دے ، یا نہر کھدوائے ، یا کنواں کھدوائے ، یا درخت لگائے ، یا مسجد بنائے ، یا قرآن مجید وراثت میں نقل کرے ، یا ایسی اولاد چھوڑ کر جائے جو اُس کے مرنے کے بعد ، اُس کے لئے دعائے مغفرت کرتی رہے ۔ “
یہ روایت امام بزار نے نقل کی ہے ، اس کی سند میں ایک راوی محمد بن عبیداللہ عرزمی ہے اور وہ ضعیف ہے ۔

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ایک شخص نے کچھ مانگا ، تو لوگوں نے کچھ نہیں دیا ، پھر ایک شخص نے اُسے کچھ دیا ، تو ( اُس کی دیکھا دیکھی ) دوسرے لوگوں نے بھی دے دیا ، نبی اکرم صلی اللہ علیہ وسلم نے ارشاد فرمایا : ” جو شخص بھلائی کے طریقے کا آغاز کرتا ہے اور پھر اس طریقے کی پیروی کی جاتی ہے ، تو اُس شخص کو اُس کا اپنا اجر بھی ملتا ہے اور جس نے اُس کی پیروی کی تھی ، اُن کا اجر بھی ملتا ہے ، اور اُن لوگوں کے اجر میں کوئی کمی نہیں ہوتی ہے ، اور جو شخص کسی برے طریقے کا آغاز کرتا ہے ، جس کی پیروی کی جاتی ہے ، تو اُس شخص کو اس کا اپنا گناہ بھی ملتا ہے اور اُن لوگوں کا گناہ بھی ملتا ہے ، جو اُس کی پیروی کرتے ہیں ، اور اُن لوگوں کے گناہ میں کوئی کمی نہیں ہوتی ہے ۔ “
یہ روایت امام أحمد ، امام بزار اور امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف ابوعبیدہ بن حذیفہ کا معاملہ مختلف ہے ، اُسے امام ابن حبان رحمہ اللہ نے ثقہ قرار دیا ہے ۔

سیدنا ابوجحیفہ رضی اللہ عنہ بیان کرتے ہیں : عبدالقیس قبیلے کا وفد نبی اکرم صلی اللہ علیہ وسلم کی خدمت میں حاضر ہوا ، ان لوگوں نے چمڑے کا لباس پہنا ہوا تھا اور تنگی کے آثار ان پر نمایاں تھے ، ان کی صورتحال دیکھ کر نبی اکرم صلی اللہ علیہ وسلم کو افسوس ہوا ، آپ گھر تشریف لے گئے ، پھر آپ تشریف لائے اور صدقہ کرنے کا حکم دیا ، اور اس حوالے سے ترغیب دی ، آپ صلی اللہ علیہ وسلم نے ارشاد فرمایا : کوئی اپنی گندم کا ایک صاع صدقہ کر دے ، کوئی کھجور کا ایک صاع صدقہ کر دے ، راوی بیان کرتے ہیں : ( سب سے پہلے ) ایک شخص تھیلی لے کر آیا اور وہ رکھ دی ، پھر لوگ یکے بعد دیگرے چیزیں لانے لگے ، یہاں تک کہ کپڑوں اور اناج کی بہت سی چیزیں جمع ہو گئیں ، تو نبی اکرم صلی اللہ علیہ وسلم کا چہرہ مبارک جگمگانے لگا ، یوں جیسے وہ سونے کا بنا ہو ، پھر آپ صلی اللہ علیہ وسلم نے ارشاد فرمایا : ” جو شخص کسی اچھے کام کا آغاز کرتا ہے اور اس کے بعد اس پر عمل کیا جاتا ہے ، تو اُس شخص کو اس کام کا اجر ملتا ہے ، اور ان لوگوں کی مانند بھی اجر ملتا ہے جنہوں نے اس پر عمل کیا ہو اور ان لوگوں کے اجر میں کوئی کمی نہیں ہوتی ہے ، اور جو شخص کسی برے کام کا آغاز کرتا ہے اور اس کے بعد اس پر عمل کیا جاتا ہے تو اس کا گناہ اس شخص کو ہو گا اور ان لوگوں کا گناہ بھی ہو گا ، جو اس پر عمل کریں گے ، حالانکہ ان لوگوں کے گناہ میں کوئی کمی نہیں ہو گی ۔ “ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس کا ایک حصہ نقل کیا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی غسان بن ربیع ہے ، ابن حبان نے اسے ثقہ قرار دیا ہے ، دارقطنی اور دیگر حضرات نے اسے ضعیف قرار دیا ہے ۔

سیدنا واثلہ بن اسقع رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص کسی اچھے طریقے کا آغاز کرتا ہے ، اسے اس کا اجر ملتا ہے ، جب تک اس کی زندگی میں اور اس کے مرنے کے بعد اس پر عمل کیا جاتا رہے ، یہاں تک کہ اُسے ترک کر دیا جائے ، اور جو شخص کسی برے طریقے کا آغاز کرتا ہے ، تو جب تک اسے ترک نہیں کیا جاتا ، اس کا گناہ اس شخص کے ذمہ لازم ہوتا ہے جو شخص اللہ کی راہ میں پہرہ دیتے ہوئے انتقال کر جاتا ہے ، اس کے لیے پہریدار کا عمل جاری رہتا ہے ، یہاں تک کہ قیامت کے دن اُسے دوبارہ زندہ کیا جائے ۔ “
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص ہدایت کی طرف دعوت دیتا ہے اور پھر اس ( ہدایت ) کی پیروی کی جاتی ہے ، تو ان لوگوں کے اجر کی مانند اُسے بھی اجر ملتا ہے ، حالانکہ اُن لوگوں کے اجر میں کوئی کمی نہیں ہوتی ہے ، اور جو شخص کسی گمراہی کی طرف دعوت دیتا ہے ، تو اُن لوگوں کے گناہ کی مانند ، اسے بھی گناہ ہوتا ہے ، حالانکہ اُن لوگوں کے گناہ میں کوئی کمی نہیں ہوتی ۔ “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبیداللہ بن تمام ہے ، جسے امام بخاری رحمہ اللہ اور ایک جماعت نے ضعیف قرار دیا ہے ۔

سیدنا عبداللہ بن عمرو رضی اللہ عنہ فرماتے ہیں : سیدنا آدم علیہ السلام کے ایک بیٹے نے اپنے بھائی کو قتل کر دیا ، تاکہ وہ اہل جہنم کے عذاب کے نصف حصے کا حصہ دار بن جائے ، جو برابر کا حصہ ہو گا ۔
یہ روایت امام بزار نے نقل کی ہے اور اس کے رجال صحیح کے رجال ہیں ، البتہ میں نے کسی ایسے شخص کو نہیں دیکھا ، جس نے امام بزار کے استاد عبداللہ بن اسحاق عطار کے حالات نقل کیے ہوں ، اُن صاحب نے عفان نامی راوی سے روایت نقل کی ہے ۔

بشر بن عبیداللہ ، جو ایک پرانے بزرگ ہیں ، وہ بیان کرتے ہیں : ہم لوگ طاؤس کے ہمراہ ایک جگہ پر تھے ، انہوں نے دریافت کیا : یہ کیا معاملہ ہے ؟ ایک شخص نے بتایا : یہ سب وہ لوگ ہیں ، جنہیں ابن ہشام نے کسی جرم میں پکڑا ہے ، اور ان کے گلے میں طوق ڈال دیے ہیں ، راوی بیان کرتے ہیں : تو میں نے طاؤس کو سنا ، اُنہوں نے سیدنا عبداللہ بن عباس رضی اللہ عنہما کے حوالے سے یہ بات نقل کی : نبی اکرم صلی اللہ علیہ وسلم نے ارشاد فرمایا ہے : ” جو شخص اس امت میں کوئی نئی چیز ایجاد کرے گا ، وہ اُس وقت تک نہیں مرے گا ، جب تک اُسے وہ چیز لاحق نہیں ہو گی “ بشر بن عبیداللہ بیان کرتے ہیں : میں نے ابن ہشام کو دیکھا ، جب اُسے معزول کیا گیا ، تو ولید بن عبدالملک کے اہلکار آئے اور اُنہوں نے ابن ہشام کے گلے میں طوق ڈال دیا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی بشر بن عبیداللہ ہے ، ابن حبان کہتے ہیں : یہ منکر الحدیث ہے ۔