مجمع الزوائد ومنبع الفوائد

سیدنا عبداللہ بن سبرہ رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ نے تم لوگوں کو تین چیزوں سے منع کیا ہے ، قیل و قال ( یعنی غیر ضروری بحث ) بکثرت ( غیر ضروری ) سوال کرنے اور مال کو ضائع کرنے ( سے تمہیں منع کیا ہے ) ۔ “
یہ روایت امام طبرانی نے معجم اوسط اور معجم کبیر میں اور امام بزار نے نقل کی ہے ، اس کی سند میں ایک راوی عبداللہ بن شبیب ہے جو انتہائی ضعیف ہے ۔

سیدنا معقل بن یسار رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ نے تم لوگوں کے لیے تین چیزوں کو ناپسندیدہ قرار دیا ہے ، قیل و قال ( یعنی غیر ضروری بحث ) بکثرت ( غیر ضروری ) سوال کرنا اور مال کو ضائع کرنا ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عمران القطان ہے ، جسے یحیی بن معین امام ابوداؤد اور امام نسائی رحمہ اللہ نے ضعیف قرار دیا ہے ، امام ابن حبان رحمہ اللہ نے اس کا تذکرہ کتاب الثقات میں کیا ہے ۔ ( علامہ ہیثمی فرماتے ہیں : ) میں یہ کہتا ہوں : اس نوعیت کی احادیث نافرمانی سے متعلق باب میں آئیں گی ۔

سیدنا عبداللہ بن مسعود رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اور عرض کی : آپ مجھے کوئی نصیحت کیجئے ! نبی اکرم صلی اللہ علیہ وسلم نے ارشاد فرمایا : ” قیل و قال ( یعنی غیر ضروری بحث ) بکثرت ( غیر ضروری ) سوال کرنے اور مال کو ضائع کرنے کو ترک کر دو ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سری بن اسماعیل ہے اور وہ متروک ہے ۔

سیدنا عمار بن یاسر رضی اللہ عنہ نے سیدنا مغیرہ بن شعبہ رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کیا ہے : ” بے شک اللہ تعالیٰ نے تمہارے لیے قیل و قال ، بکثرت سوال کرنا ، نہ دینا اور دینا ، لڑکیوں کو زندہ درگور کرنا اور ماؤں کی نافرمانی کرنا ( ان سب امور کو تمہارے لیے ) ناپسندیدہ قرار دیا ہے ۔ “ ( علامہ ہیثمی فرماتے ہیں : ) میں یہ کہتا ہوں سیدنا مغیرہ رضی اللہ عنہ سے منقول حدیث ” صحیح “ میں مذکور ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یحیی بن کثیر ہے ، جو بصری کا شاگرد ہے ، جس روایت کو نقل کرنے میں یہ منفرد ہو ، اس کے حوالے سے استدلال کرنا جائز نہیں ہے ۔

سیدنا عبداللہ بن مسعود رضی اللہ عنہ نے ایک دن ارشاد فرمایا : اُس دن لوگوں نے اُن سے بکثرت سوالات کئے تھے ، تو سیدنا عبداللہ رضی اللہ عنہ نے ارشاد فرمایا : اے حار بن قیس ! انہوں نے حارث بن قیس سے یہ فرمایا تھا ، تم ان لوگوں کے بارے میں کیا رائے رکھتے ہو ؟ یہ لوگ جس چیز کے بارے میں سوال کر رہے ہیں ، اس کے حوالے سے ان کا ارادہ کیا ہے ؟ تو حارث بن قیس نے جواب دیا : تاکہ وہ اس کا علم حاصل کریں اور پھر اسے چھوڑ دیں ، تو سیدنا عبداللہ بن مسعود رضی اللہ عنہ نے فرمایا : اس ذات کی قسم ! جس کے علاوہ اور کوئی معبود نہیں ہے ، تم نے سچ کہا: ہے ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

ان ( یعنی سیدنا عبداللہ بن مسعود رضی اللہ عنہ ) کے بارے میں یہ بات منقول ہے : وہ فرماتے ہیں : ” ایسے لوگ آئیں گے ، جو علم کو پی لیا کریں گے ( یعنی وہ علم سیکھیں گے ، لیکن اس پر عمل نہیں کریں گے ) ۔ “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔