مجمع الزوائد ومنبع الفوائد

سیدنا عمر رضی اللہ عنہ فرماتے ہیں : نبی اکرم صلی اللہ علیہ وسلم کے پاس ایک مکتوب آیا ، تو آپ صلی اللہ علیہ وسلم نے سیدنا عبداللہ بن ارقم رضی اللہ عنہ سے فرمایا : اُن لوگوں کو جواب دو ! سیدنا عبداللہ بن ارقم رضی اللہ عنہ نے وہ مکتوب لے کر اس کا جواب تحریر کیا ، پھر وہ اس تحریر کو لے کر آئے ، تاکہ وہ تحریر نبی اکرم صلی اللہ علیہ وسلم کو پڑھ کر سنائیں ، تو نبی اکرم صلی اللہ علیہ وسلم نے فرمایا : تم نے اچھا کام کیا ہے ۔ سیدنا عمر رضی اللہ عنہ بیان کرتے ہیں : یہ واقعہ میرے ذہن میں رہا ، یہاں تک کہ جب میں خلیفہ بنا ، تو میں نے انہیں ( یعنی سیدنا عبداللہ بن ارقم رضی اللہ عنہ کو ) بیت المال کا نگران مقرر کیا ۔
یہ روایت امام بزار نے نقل کی ہے ، اس کی سند میں ایک راوی محمد بن صدقہ فدکی ہے ، مصنف نے ” میزان “ ( یعنی میزان الاعتدال میں ) یہ بات بیان کی ہے : اس کی نقل کردہ حدیث منکر ہوتی ہے ۔