مجمع الزوائد ومنبع الفوائد

سیدنا معاویہ بن حیدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے اُن لوگوں کو خطبہ دیتے ہوئے ارشاد فرمایا : ” تم لوگ کب تک فاجر کے ذکر کے حوالے سے پریشان رہو گے ؟ تم اُس کا پردہ فاش کرو ! تاکہ لوگ اُس سے بچ کے رہیں ۔ “
یہ روایت امام طبرانی نے تینوں کتابوں میں نقل کی ہے ، معجم اوسط اور معجم صغیر کی سند حسن ہے اور اس کے رجال کی توثیق کی گئی ہے ، اس کے بعض راویوں کے بارے میں ایسا اختلاف پایا جاتا ہے جو نقصان دہ نہیں ہے ۔

سیدنا معاویہ بن حیدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” فاسق کی غیبت نہیں ہوتی ۔ “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی علاء بن بشر ہے ، جسے ازدی نے ضعیف قرار دیا ہے ۔

سیدنا عبداللہ بن بریدہ رضی اللہ عنہ بیان کرتے ہیں : ایک مرتبہ سیدنا عمر رضی اللہ عنہ ایسی جگہ تشریف فرما تھے ، جہاں نبی اکرم صلی اللہ علیہ وسلم بیٹھا کرتے تھے ، اُس جگہ جنازے پاس سے گزرا کرتے تھے ، راوی بیان کرتے ہیں : لوگ ایک جنازہ لے کر گزرے ، لوگوں نے اس کی تعریف کی ، تو سیدنا عمر رضی اللہ عنہ نے فرمایا : واجب ہو گئی ، پھر لوگ ایک اور جنازہ لے کر گزرے ، تو لوگوں نے کہا: یہ سب سے بڑا جھوٹا تھا ، سیدنا عمر رضی اللہ عنہ نے فرمایا : لوگوں میں سب سے بڑا جھوٹا وہ شخص ہے ، جو اللہ تعالیٰ کی طرف جھوٹی بات منسوب کرتا ہے اور پھر اس کے بعد وہ لوگ ہیں جو اپنے جسم میں موجود روح کے حوالے سے جھوٹ بولتے ہیں ( یعنی جھوٹا خواب بیان کرتے ہیں ) ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام أحمد نے نقل کی ہے ، اس کی سند میں ایک راوی عمر بن ولید شنی ہے ، جسے امام نسائی رحمہ اللہ اور یحیی القطان نے ضعیف قرار دیا ہے ۔

حماد بن زید بیان کرتے ہیں : میری ملاقات مسلمہ بن علقمہ سے ہوئی ، اُنہوں نے مجھے یہ روایت بیان کی ، پھر اُنہوں نے اس سے رجوع کیا اور پھر بولے : جب تم یہ ارادہ کرو کہ اپنے ساتھی کی تکذیب کرو ! تو اُس کو اس کی تلقین کرو ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔