مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : سیدنا عمر بن خطاب رضی اللہ عنہ نے ” جابیہ “ کے مقام پر خطبہ دیتے ہوئے ارشاد فرمایا : ” اے لوگو ! جو شخص قرآن کے بارے میں سوال کرنا چاہتا ہو ، وہ ابی بن کعب کے پاس جائے ، جو شخص وراثت کے بارے میں دریافت کرنا چاہتا ہو ، وہ زید بن ثابت کے پاس جائے ، جو شخص فقہ کے بارے میں دریافت کرنا چاہتا ہو ، وہ معاذ بن جبل کے پاس جائے ، جو شخص مال کے بارے میں دریافت کرنا چاہتا ہو ، وہ میرے پاس آئے ، کیونکہ اللہ تعالی نے اس کے لیے مجھے ہی والی اور تقسیم کرنے والا بنایا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سلیمان بن داؤد بن حصین ہے ، میں نے کسی کو اُس کا ذکر کرتے ہوئے نہیں دیکھا ہے ۔

سیدنا ابوامیہ جمحی رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم سے قیامت کے بارے میں دریافت کیا : تو آپ نے ارشاد فرمایا : اُس کی تین نشانیاں ہیں ، اُن میں سے ایک یہ ہے : کہ چھوٹوں سے علم حاصل کیا جائے گا ۔ موئی نامی راوی بیان کرتے ہیں : یہ بات کہی جاتی ہے : یہاں چھوٹوں سے مراد ، بدعتی لوگ ہیں ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی ابن لہیعہ ہے ، جو ضعیف ہے ۔

سیدنا عبداللہ بن مسعود رضی اللہ عنہ فرماتے ہیں : لوگ اُس وقت تک نیک اور ( دین کی تعلیمات کو ) مضبوطی سے تھامے رکھیں گے ، جب تک اُن کے پاس سیدنا محمد صلی اللہ علیہ وسلم کے اصحاب اور اُن لوگوں کے اکابرین کی طرف سے علم آئے گا ، اور جب ان کے پاس علم ، تم لوگوں کے چھوٹوں کی طرف سے آئے گا ، تو وہ ہلاکت کا شکار ہو جائیں گے ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ۔