مجمع الزوائد ومنبع الفوائد

سیدنا قبیصہ بن مخارق رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ صلی اللہ علیہ وسلم نے مجھ سے دریافت کیا : اے قبیصہ ! تم کیوں آئے ہو ؟ میں نے عرض کی : میری عمر زیادہ ہو گئی ہے ، ہڈیاں کمزور ہو گئی ہیں ، میں آپ کے پاس اس لیے آیا ہوں ، تاکہ آپ مجھے اُس چیز کی تعلیم دیں ، جس کے ذریعے اللہ تعالیٰ مجھے نفع عطا کرے ، تو نبی اکرم صلی اللہ علیہ وسلم نے ارشاد فرمایا : ” اے قبیصہ ! تم جس بھی پتھر یا درخت یا ( مٹی سے بنی ہوئی ) اینٹ کے پاس سے گزرے ، اُنہوں نے تمہارے لئے دعائے مغفرت کی ( کیونکہ تم علم کے حصول کے لئے آئے ہو ) اے قبیصہ ! جب تم صبح کی نماز ادا کر لو ، تو تم تین مرتبہ سبحان اللہ العظیم و بحمدہ پڑھو ! تم نابینا پن ، جذام اور فالج سے محفوظ رہو گے ، اے قبیصہ ! تم یہ پڑھو : ” اے اللہ ! میں تجھ سے وہ مانگتا ہوں ، جو تیرے پاس ہے ، تو مجھ پر اپنا فضل بہا دے ، اور مجھ پر اپنی رحمت نچھاور کر دے اور مجھ پر اپنی برکتیں نازل کر دے “ ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب بھی کوئی شخص اپنے گھر سے نکلتا ہے ، تو اُس کے دروازے پر دو جھنڈے ہوتے ہیں ، ایک جھنڈا فرشتے کے ہاتھ میں ہوتا ہے ، اور ایک جھنڈا شیطان کے ہاتھ میں ہوتا ہے ، اگر وہ شخص ایسے کام کے لیے نکلتا ہے ، جسے اللہ تعالیٰ پسند کرتا ہو ، تو فرشتہ اپنا جھنڈا ساتھ لے کر اُس کے پیچھے جاتا ہے ، اور وہ شخص جب تک اپنے گھر واپس نہیں آتا ، اُس وقت تک مسلسل فرشتے کے جھنڈے کے نیچے رہتا ہے ، اور اگر وہ کسی ایسے کام کے لیے نکلے ، جس سے اللہ تعالیٰ ناراض ہوتا ہے ، تو شیطان اپنا جھنڈا لے کر اُس کے پیچھے جاتا ہے اور وہ شخص گھر واپس آنے تک مسلسل شیطان کے جھنڈے کے نیچے رہتا ہے “ ۔
یہ روایت امام أحمد نے اور امام طبرانی نے معجم اوسط میں نقل کی ہے اس کی سند میں ایک راوی عبدالرحمن بن ابوزناد ہے ، جسے امام مالک نے ثقہ قرار دیا ہے ، جبکہ ایک روایت کے مطابق امام أحمد اور یحیی بن معین نے اسے ضعیف کہا: ہے ۔

سیدنا علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب بھی کوئی بندہ علم کے حصول کے لیے ( نکلنے سے پہلے ) جوتا پہنتا ہے ، یا موزہ پہنتا ہے ، یا لباس پہنتا ہے ، تو جیسے ہی وہ اپنے دروازے کی چوکھٹ پر قدم رکھتا ہے ، تو اللہ تعالیٰ اس کی مغفرت کر دیتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اسماعیل بن یحیی تیمی ہے اور وہ کذاب ہے ۔

سیدہ عائشہ صدیقہ رضی اللہ عنہا روایت کرتی ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص علم کے حصول کے لیے اپنے گھر سے نکلتا ہے ، اللہ تعالیٰ اس کے لیے جنت کی طرف راستے کو آسان کر دیتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ہاشم بن عیسیٰ ہے اور وہ مجہول ہے اور اس کی نقل کردہ حدیث منکر ہے ۔