مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ابلیس نے اپنے پروردگار کی بارگاہ میں عرض کی : اے میرے پروردگار ! تو سیدنا آدم علیہ السلام کو ( زمین کی طرف اتار رہا ہے ) مجھے پتا ہے ، عنقریب کتابیں اور رسول آئیں گے ، اُن ( یعنی اولاد آدم ) کی کتابیں اور رسول کیا ہوں گے ؟ اللہ تعالیٰ نے فرمایا : اُن کے رسول فرشتے ہوں گے ، اُن رسولوں میں انبیاء بھی ہوں گے ، اُن لوگوں کی کتابیں ، تورات ، انجیل ، زبور اور فرقان ( یعنی قرآن مجید ) ہوں گی ، ابلیس نے دریافت کیا : میری کتاب کون سی ہو گی ؟ پروردگار نے فرمایا : تمہاری کتاب گودنا ہو گی ، تمہارا قرآن ، اشعار ہوں گے ، تمہارے رسول ، کاہن ہوں گے ، اور تمہارا کھانا ، ہر وہ چیز ہو گی ، جس پر اللہ کا نام ذکر نہ کیا گیا ہو ، اور تمہارا مشروب ، ہر نشہ آور چیز ہو گی ، تمہاری سچائی ، جھوٹ ہو گی ، تمہارا گھر ، حمام ہو گا تمہارے ہتھیار ، عورتیں ہوں گی ، تمہاری آوازیں بلند کرنے والے ، آلات موسیقی ہوں گے اور تمہاری مسجد ، بازار ہوں گے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یحیی بن صالح ایلی ہے ، جیسے عقیلی نے ضعیف قرار دیا ہے ۔ ( علامہ ہیثمی فرماتے ہیں : ) میں یہ کہتا ہوں : سیدنا ابوامامہ رضی اللہ عنہ سے منقول حدیث کتاب ” الادب“ کے آخر میں ، شعر سے متعلق باب میں آئے گی ، جو اس کی مانند ، یا اس سے زیادہ مکمل ہو گی ، ان شاء اللہ ۔

سیدنا ابوموسی اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب صبح ہوتی ہے ، تو ابلیس اپنے لشکریوں کو بھیجتا ہے اور یہ کہتا ہے : آج جو کسی مسلمان کو سب سے زیادہ گمراہ کرے گا ، میں اُسے تاج پہناؤں گا ، جب وہ لوگ واپس آتے ہیں ، تو کوئی بتاتا ہے : میں ایک شخص کے ساتھ مسلسل رہا ، یہاں تک کہ اُس نے اپنی بیوی کو طلاق دیدی ، تو ابلیس کہتا ہے : ہو سکتا ہے ، وہ شخص دوسری شادی کر لے ، ایک لشکری آ کر یہ کہتا ہے : میں ایک شخص کے ساتھ مسلسل رہا ، یہاں تک کہ اس نے اپنے ماں باپ کی نافرمانی کی ، تو ابلیس کہتا ہے : ہو سکتا ہے وہ حسن سلوک شروع کر دے ، ایک لشکری آ کر یہ کہتا ہے : میں ایک شخص کے ساتھ مسلسل رہا ، یہاں تک کہ اُس نے شرک کر دیا ، تو ابلیس کہتا ہے : تم ہی ہو ، تم ہی ہو ( یعنی تم وہ شخص ہو ، جو اس بات کے لائق ہے کہ میں تمہیں تاج پہناؤں ) “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ، اس کے بقیہ رجال ثقہ ہیں ۔

سیدنا ابوریحانہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ابلیس اپنا تخت سمندر پر رکھتا ہے ، اور اللہ تعالیٰ کے ساتھ مشابہت ظاہر کرتا ہے ، حالانکہ اللہ تعالیٰ کی ذات سے پہلے بہت سے حجابات ہیں ، ابلیس اپنے لشکر روانہ کرتا ہے ، تو یہ کہتا ہے : فلاں آدمی کو کون سنبھالے گا ؟ تو اُس کے دو چیلے کھڑے ہو جاتے ہیں وہ کہتا ہے : میں تم دونوں کو ایک سال کی مہلت دیتا ہوں ، اگر تم دونوں نے اُسے گمراہ کر دیا ، تو میں تمہاری مشقت ختم کر دوں گا ، ورنہ میں تم دونوں کو مصلوب کر دوں گا “ ۔ راوی بیان کرتے ہیں : تو کسی شخص نے سیدنا ابوریحانہ رضی اللہ عنہ سے کہا: آپ کی وجہ سے ، تو پھر بہت سے شیاطین مصلوب ہوئے ہوں گے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یحیی بن طلحہ یربوعی ہے ، جسے امام نسائی رحمہ اللہ نے ضعیف قرار دیا ہے ، جبکہ ابن حبان نے اس کا ذکر کتاب ” الثقات “ میں کیا ہے ۔