مجمع الزوائد ومنبع الفوائد

سیدنا ابن ابواوفی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شراب پینے والا ، شراب پیتے ہوئے مؤمن نہیں رہتا ، زنا کرنے والا ، زنا کرتے ہوئے مؤمن نہیں رہتا ، کسی شرف والی چیز کو لوٹنے والا ، اس کو لوٹتے ہوئے مؤمن نہیں رہتا “ ۔
یہ روایت امام أحمد نے ، امام طبرانی نے معجم کبیر میں ، اور امام بزار نے نقل کی ہے ، اس کی سند میں ایک راوی مدرک بن عمارہ ہے اس کا ذکر ابن حبان نے کتاب ” الثقات “ میں کیا ہے اور اس کے باقی رجال ، صحیح کے رجال ہیں ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” زنا کرنے والا ، زنا کرتے ہوئے مؤمن نہیں رہتا ، شراب پینے والا ، شراب پیتے ہوئے مؤمن نہیں رہتا ، چوری کرنے والا ، چوری کرتے ہوئے مؤمن نہیں رہتا ، اور کسی شرف والی چیز کو لوٹ لینے والا ، اُسے لوٹتے ہوئے مؤمن نہیں رہتا “ ۔
یہ روایت امام طبرانی نے معجم کبیر میں طویل روایت کے طور پر نقل کی ہے ، جبکہ امام بزار نے بھی اسے نقل کیا ہے ، امام أحمد نے اس روایت میں سے صرف زنا کرنے اور چوری کرنے کا ذکر کیا ہے ، امام أحمد کی سند میں ایک راوی ابن لہیعہ ہے ، جبکہ امام طبرانی کی سند میں ایک راوی معلی بن مہدی ہے ، ابوحاتم کہتے ہیں : یہ شخص بعض اوقات منکر حدیث نقل کر دیتا ہے ، ابن حبان نے اس کا ذکر کتاب ” الثقات “ میں کیا ہے ۔

سیدہ عائشہ صدیقہ رضی اللہ عنہا کے بارے میں یہ بات منقول ہے : ایک مرتبہ اُن کے دروازے کے پاس سے ، ایک ایسا شخص گزرا ، کہ شراب نوشی کی وجہ سے اُس کی پٹائی کی گئی تھی ، سیدہ عائشہ رضی اللہ عنہا نے دریافت کیا : اس کا کیا معاملہ ہے ؟ تو میں نے بتایا : یہ ایک ایسا شخص ہے ، اس کو نشے کے عالم میں پکڑا گیا ، تو اُس کی پٹائی کی گئی ، سیدہ عائشہ رضی اللہ عنہا نے فرمایا : سبحان اللہ ! میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” شراب پینے والا کوئی بھی شخص ، شراب پیتے ہوئے مؤمن نہیں رہتا ، ( راوی بیان کرتے ہیں : ) ان کی مراد ، خمر تھی ، زنا کرنے والا ، زنا کرتے ہوئے مؤمن نہیں رہتا ، چوری کرنے والا چوری کرتے ہوئے مؤمن نہیں رہتا ، شرف والی ایسی چیز جس کی طرف لوگ نگاہیں اُٹھا کے دیکھتے ہوں ، اُس کو لوٹ لینے والا شخص اُسے لوٹتے ہوئے مؤمن نہیں رہتا ، تو تم لوگ بچ کے رہو ! تم لوگ بچ کے رہو ! “ ۔
یہ روایت امام أحمد نے نقل کی ہے ، امام بزار نے اس کا کچھ حصہ نقل کیا ہے ، امام طبرانی نے اسے معجم اوسط میں نقل کیا ہے ، اس کے رجال ثقہ ہیں ، البتہ ابن اسحاق نامی راوی تدلیس کرنے والا ہے ، امام بزار کے رجال صحیح کے رجال ہیں ۔

سیدنا عبداللہ بن مغفل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” زنا کرنے والا ، زنا کرتے ہوئے مؤمن نہیں رہتا ، چوری کرنے والا ، چوری کرتے ہوئے مؤمن نہیں رہتا ، شراب پینے والا ، شراب پیتے ہوئے مؤمن نہیں رہتا ، اور جس چیز کو لوگ دیکھ رہے ہوں ، اُسے لوٹ لینے والا ، اسے لوٹتے ہوئے مؤمن نہیں رہتا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی قیس بن ربیع ہے ، شعبہ اور دیگر حضرات نے اسے ثقہ قرار دیا ہے ، جبکہ امام أحمد اور یحیی بن معین نے اسے ضعیف قرار دیا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” زنا کرنے والا ، زنا کرتے ہوئے مؤمن نہیں رہتا ، چوری کرنے والا چوری کرتے ہوئے مؤمن نہیں رہتا ، شراب پینے والا اُسے پیتے ہوئے مؤمن نہیں رہتا ، ہم نے عرض کی : یا رسول اللہ ! یہ کیسے ہو گا ؟ نبی اکرم صلی اللہ علیہ وسلم نے فرمایا : ایمان اس شخص میں سے نکل جاتا ہے ، اگر وہ توبہ کر لے ، تو ایمان اُس کی طرف واپس لوٹ جاتا ہے “ ۔
یہ روایت امام طبرانی نے معجم اوسط میں ، اور امام بزار نے نقل کی ہے ، امام طبرانی کی سند میں ایک راوی محمد بن عبدالرحمن بن ابولیلی ہے ، جسے عجلی نے ثقہ قرار دیا ہے ، جبکہ امام أحمد اور دیگر حضرات نے اُس کے حافظے کی خرابی کی وجہ سے ، اسے ضعیف قرار دیا ہے ۔

شریک نے ، ایک صحابی کے حوالے سے ، نبی اکرم صلی اللہ علیہ وسلم کا یہ فرمان نقل کیا ہے : ” جو شخص زنا کرتا ہے ، ایمان اس میں سے نکل جاتا ہے ، اگر وہ توبہ کر لے ، تو اللہ تعالیٰ اس کی توبہ قبول کر لیتا ہے “ ۔
یہ روایت امام طبرانی نے معجم کبیر میں نقل کی ہے ، اور اس کی سند میں ( راویوں کی ) ایک جماعت ایسی ہے ، جن سے میں واقف نہیں ہوں ۔

سیدنا عبداللہ بن عباس رضی اللہ عنہما سیدنا ابوہریرہ رضی اللہ عنہ اور سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” زنا کرنے والا ، زنا کرتے ہوئے مؤمن نہیں رہتا ، چوری کرنے والا ، چوری کرتے ہوئے مؤمن نہیں رہتا ، شراب پینے والا ، شراب پیتے ہوئے مؤمن نہیں رہتا ، اور شرف والی چیز کو لوٹ لینے والا ، اُسے لوٹتے ہوئے مومن نہیں رہتا “ ۔
یہ روایت امام بزار نے اور امام طبرانی نے معجم کبیر میں نقل کی ہے ۔ ( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن عباس رضی اللہ عنہما سے منقول حدیث ” صحیح “ اور دوسری کتاب میں ، اختصار کے ساتھ منقول ہے ، سیدنا ابوہریرہ سے منقول روایت بھی اس کی مانند ہے ۔

علقمہ بن قیس بیان کرتے ہیں : میں نے سیدنا علی رضی اللہ عنہ کو کوفہ کے منبر پر دیکھا ، وہ فرما رہے تھے : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” زنا کرنے والا ، زنا کرتے ہوئے مؤمن نہیں رہتا ، چوری کرنے والا چوری کرتے ہوئے مؤمن نہیں رہتا ، ایسی چیز ، جس کی طرف لوگ نگاہ اُٹھا کر دیکھ رہے ہوں ، اُسے لوٹ لینے والا اُس کو لوٹتے ہوئے مؤمن نہیں رہتا اور شراب پینے والا شخص ، مؤمن نہیں رہتا ، ایک شخص کھڑا ہوا ، اور بولا: امیرالمؤمنین ! جو شخص زنا کا ارتکاب کرتا ہے ، کیا وہ کافر ہو جاتا ہے ؟ تو سیدنا علی رضی اللہ عنہ نے ارشاد فرمایا : نبی اکرم صلی اللہ علیہ وسلم ہمیں یہ حکم دیتے تھے کہ ہم رخصت والی احادیث کو مبہم رکھیں ، زنا کرنے والا شخص مؤمن نہیں رہتا ، اس سے مراد یہ ہے ، کہ وہ یہ ایمان رکھتا ہو کہ یہ زنا اُس کے لئے حلال ہے ، اگر وہ اس بات پر ایمان رکھتا ہو کہ وہ زنا اُس کے لئے حلال ہے ، تو وہ شخص کافر ہو جائے گا ، چوری کرنے والا مؤمن نہیں رہتا ، اس سے مراد یہ ہے کہ وہ اس چوری کے بارے میں یہ ایمان رکھتا ہو کہ وہ اُس کے لئے حلال ہے ، اگر وہ اس بات پر ایمان رکھے کہ وہ چوری اُس کے لئے حلال ہے ، تو وہ شخص کافر ہو جائے گا ، شراب پینے والا ، شراب پیتے ہوئے ، مؤمن نہیں رہتا ، اس سے مراد یہ ہے کہ وہ اس بات پر ایمان رکھتا ہو کہ وہ شراب اُس کے لئے حلال ہے ، اگر وہ شخص اس شراب کو ایسی حالت میں پیتا ہے کہ وہ اس بات پر ایمان رکھتا ہو کہ شراب اُس کے لئے ہلال ہے ، تو ایسا شخص کافر ہو جائے گا ، شرف والی چیز کو لوٹ لینے والا شخص ، اُسے لوٹتے ہوئے مؤمن نہیں رہتا ، اس سے مراد یہ ہے کہ وہ اس بات پر ایمان رکھتا ہو کہ وہ چیز اُس کے لئے حلال ہے ، اگر وہ یہ ایمان رکھتے ہوئے اس چیز کو اچک لیتا ہے کہ وہ چیز اس کے لئے حلال ہے ، تو ایسا شخص کافر ہو جائے گا “ ۔
یہ روایت امام طبرانی نے معجم صغیر میں نقل کی ہے ، اس کی سند میں ایک راوی اسماعیل بن یحیی تیمی ہے ، جو کذاب ہے ، اُس سے روایت کرنا جائز نہیں ہے ۔

سیدنا ابوہریرہ رضی اللہ عنہ بیان کرتے ہیں : میں نے اپنے خلیل سیدنا ابوالقاسم صلی اللہ علیہ وسلم کو یہ ارشاد فرماتے ہوئے سنا ہے : ” چوری کرنے والا ، چوری کرتے ہوئے مؤمن نہیں رہتا ، زنا کرنے والا ، زنا کرتے ہوئے مؤمن نہیں رہتا ، ایمان ، اللہ تعالیٰ کے نزدیک ، اس سے زیادہ معزز ہے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں منقول ہے ، تاہم اس میں یہ الفاظ نہیں ہیں : - ” ایمان ، اللہ تعالیٰ کے نزدیک اس سے زیادہ معزز ہے ۔
یہ روایت امام بزار نے نقل کی ہے ، اس کی سند میں ایک راوی اسرائیل ملائی ہے ، یحیی بن معین نے ایک روایت کے مطابق اسے ثقہ قرار دیا ہے ، جبکہ دیگر لوگوں نے اسے ضعیف قرار دیا ہے ، میں یہ کہتا ہوں : سیدنا ابوہریرہ رضی اللہ عنہ سے منقول حدیث فتنوں سے متعلق باب میں آگے آئے گی ۔

فضل بن یسار بیان کرتے ہیں : میں نے محمد بن علی ( شاید اس سے مراد ، امام باقر ہیں ) کو سنا ، اُن سے نبی اکرم صلی اللہ علیہ وسلم کے اس فرمان کے بارے میں سوال کیا گیا : زنا کرنے والا ، زنا کرتے ہوئے مؤمن نہیں رہتا ، چوری کرنے والا ، چوری کرتے ہوئے مؤمن نہیں رہتا ، تو محمد بن علی نے زمین پر ایک بڑا دائرہ بنایا ، پھر اس کے درمیان میں ایک اور دائرہ بنایا ، اور پھر یہ فرمایا : پہلے والا دائرہ اسلام ہے اور درمیان والا دائرہ ، ایمان ہے ، جب کوئی شخص زنا کرتا ہے ، تو وہ ایمان سے نکل کر اسلام کی طرف چلا جاتا ہے ، لیکن شرک کے علاوہ اور کوئی چیز اسے اسلام سے باہر نہیں کرتی ہے ۔
یہ روایت امام بزار نے نقل کی ہے ، اس کی سند میں ایک راوی فضل بن یسار ہے ، جسے عقیلی نے ضعیف قرار دیا ہے ۔