مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ فرماتے ہوئے سنا : آپ صلی اللہ علیہ وسلم منبر پر ، سیدنا موسیٰ علیہ السلام کے بارے میں یہ بات بیان کر رہے تھے : ” ایک مرتبہ ان کے ذہن میں خیال آیا ، کیا اللہ تعالیٰ سوتا ہے ؟ تو اللہ تعالیٰ نے ایک فرشتے کو اُن کی طرف بھیجا ، اس نے تین دن انہیں بیدار رکھا ، پھر اس نے انہیں شیشے کے دو بوتلیں دیں ، ان کے ہر ایک ہاتھ میں ایک بوتل رکھ دی ، اور انہیں یہ ہدایت کی کہ وہ ان دونوں کی حفاظت کریں ، جب انہیں اونگھ آنے لگتی ، اور اُن کے ہاتھ سے بوتل گرنے لگتی ، تو وہ بیدار ہو جاتے اور انہیں ایک دوسرے کے ساتھ نہ ٹکرانے دیتے ، آخر کار انہیں نیند آ گئی ، اُن کے ہاتھ ملے اور دونوں بوتلیں ٹوٹ گئیں ، نبی اکرم صلی اللہ علیہ وسلم نے فرمایا : تو یوں اللہ تعالیٰ نے اُن کے سامنے مثال بیان کی کہ اگر اللہ تعالیٰ سو جائے تو آسمان اور زمین اپنی جگہ پر قائم نہیں رہیں گے “ ۔
یہ روایت امام ابویعلیٰ نے نقل کی ہے ، اس کی سند میں ایک راوی امیہ بن شبل ہے ، امام ذہبی نے اس کا ذکر ” میزان الاعتدال “ میں کیا ہے ، لیکن انہوں نے یہ ذکر نہیں کیا کہ کسی نے اسے ضعیف قرار دیا ہے ، انہوں نے اس راوی کے حوالے سے یہ حدیث نقل کی ہے اور اس راوی کی وجہ سے اس حدیث کو ضعیف قرار دیا ہے ، باقی اللہ بہتر جانتا ہے ۔ ( علامہ ہیثمی فرماتے ہیں : ) میں یہ کہتا ہوں : ابن حبان نے اس راوی کا ذکر کتاب ” الثقات “ میں کیا ہے ۔