مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مؤمن کی مثال عطار کی مانند ہے ، اگر تم اُس کے ساتھ بیٹھو گے ، تو وہ تمہیں نفع پہنچائے گا ، اگر تم اس کے ساتھ چلو گے ، تو وہ تمہیں نفع پہنچائے گا ، اگر تم اُس کے ساتھ شراکت کرو گے ، تو وہ تمہیں نفع پہنچائے گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی لیث بن ابوسلیم ہے اور وہ تدلیس کرنے والا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مؤمن کی مثال کھجور کے درخت کی مانند ہے ، اُس میں سے جو بھی چیز تمہارے پاس آئے گی ، وہ تمہیں نفع پہنچائے گی “ ۔
( علامہ ہیثمی فرماتے ہیں : ) میں یہ کہتا ہوں : یہ حدیث ” صحیح “ میں منقول ہے ، تاہم اس میں یہ الفاظ نہیں ہیں : ” اس میں سے جو چیز تمہارے پاس آئے گی ، وہ تمہیں نفع پہنچائے گی “ ۔
یہ روایت امام بزار نے نقل کی ہے ، اس کے رجال کی توثیق کی گئی ہے ، سفیان بن حسین نامی راوی ، زہری سے جو روایات نقل کرتا ہے ، اُن میں اُسے ضعیف قرار دیا گیا ہے ، اور یہ روایت اُس نے زہری سے نقل نہیں کی ہے ۔
( علامہ ہیثمی فرماتے ہیں : ) میں یہ کہتا ہوں : مؤمن کی مثال کھجور کے درخت کی مانند ہونے کے حوالے سے روایات آگے آئیں گی ، ان میں سے کچھ بیماری اور اُس کے ثواب سے متعلق باب میں ہوں گی ، کچھ جنائز سے متعلق باب میں ہوں گی اور بعض ادب سے متعلق باب میں ہوں گی ۔