مجمع الزوائد ومنبع الفوائد

سیدنا معن بن یزید رضی اللہ عنہ بیان کرتے ہیں : ایک دیہاتی آیا اور اس نے نبی اکرم صلی اللہ علیہ وسلم کی اونٹنی کی لگام پکڑ لی اور بولا: اے اللہ کے نبی ! آپ میری رہنمائی ایسے عمل کی طرف کیجئے ، جو مجھے جنت کے قریب کر دے اور وہ مجھے جہنم سے دور کر دے ، تو نبی اکرم صلی اللہ علیہ وسلم نے ارشاد فرمایا : ” تم نے مختصر سوال کیا ہے ، لیکن بڑی بات پوچھ لی ہے ، تم اللہ تعالیٰ کی عبادت کرو اور کسی کو اُس کا شریک نہ ٹھہراؤ ، تم پانچ نمازیں ادا کرو ، تم رمضان کے روزے رکھو اور جس چیز کے بارے میں تم یہ ناپسند کرتے ہو کہ لوگ تمہارے ساتھ ایسا کریں ، تو اس چیز کو تم بھی اُن لوگوں کے لیے ناپسند کرو “ ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی وائل ابوکلیب بن وائل ہے ، میں نے کسی کو اس کا ذکر کرتے ہوئے نہیں دیکھا ہے ۔

عبیداللہ بن عمیر لیثی ، اپنے والد کا یہ بیان نقل کرتے ہیں : حجتہ الوداع کے موقع پر نبی اکرم صلی اللہ علیہ وسلم نے ارشاد فرمایا : ” بے شک اللہ کے دوست نمازی ہیں ، جو شخص پانچ نمازیں ادا کرتا ہے ، جو اللہ تعالیٰ نے اُس پر لازم کی ہیں اور وہ رمضان کے روزے رکھتا ہے اور اپنے روزے رکھنے کے حوالے سے ثواب کی امید رکھتا ہے ، اور وہ ثواب کی امید رکھتے ہوئے اپنی خوشی کے ساتھ زکوٰۃ ادا کرتا ہے ، اور اُن کبیرہ گناہوں سے اجتناب کرتا ہے ، جن سے اللہ تعالیٰ نے منع کیا ہے ( تو ایسے لوگ بھی اللہ کے دوست ہیں ) “ آپ صلی اللہ علیہ وسلم کے اصحاب میں سے ، ایک صاحب نے عرض کی : یا رسول اللہ ! کبیرہ گناہ کتنے ہیں ؟ نبی اکرم صلی اللہ علیہ وسلم نے جواب دیا : ” وہ نو ہیں ، جن میں سب سے بڑا ( گناہ ) کسی کو اللہ کا شریک قرار دینا ہے ( اور دوسرے کبیرہ گناہ یہ ہیں : ) مؤمن کو ناحق قتل کرنا ، میدان جنگ سے راہ فرار اختیار کرنا ، پاکدامن عورت پر الزام لگانا ، جادو کرنا ، یتیم کا مال کھانا ، سود کھانا مسلمان والدین کی نافرمانی کرنا ، اور بیت عقیق کی بے حرمتی کرنا ، جو قابل احترام ہے ، اور زندگی اور موت ، ہر حال میں ۔ تمہارا قبلہ ہے ، جو شخص ایسی حالت میں انتقال کرے کہ اُس نے ان میں سے کسی کبیرہ گناہ کا ارتکاب نہ کیا ہو ، اور وہ شخص نماز قائم کرتا ہو ، اور زکوۃ ادا کرتا ہو ، تو ایسا شخص جنت کے درمیان میں ، سیدنا محمد صلی اللہ علیہ وسلم کے ساتھ ہو گا ، جس جنت کے دروازوں کے کواڑ سونے کے بنے ہوئے ہیں ، ، ۔
( علامہ ہیثمی فرماتے ہیں : ) میں یہ کہتا ہوں کہ روایت کا کچھ حصہ امام ابوداؤد نے نقل کیا ہے ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

عبداللہ بن شقیق نے ” بلقین “ سے تعلق رکھنے والے ، ایک صحابی کا یہ بیان نقل کیا ہے : میں ، نبی اکرم صلی اللہ علیہ وسلم کی خدمت میں حاضر ہوا ، آپ صلی اللہ علیہ وسلم اس وقت وادی قریٰ میں تھے ، میں نے عرض کی : یا رسول اللہ ! آپ کو کس بات کا حکم دیا گیا ہے ؟ نبی اکرم صلی اللہ علیہ وسلم نے ارشاد فرمایا : مجھے اس بات کا حکم دیا گیا ہے کہ تم لوگ اللہ کی عبادت کرو اور کسی کو اس کا شریک نہ ٹھہراؤ اور تم لوگ نماز ادا کرو ، اور زکوۃ دو ، میں نے عرض کی : یا رسول اللہ ! یہ لوگ ( یعنی یہودی ) کون ہیں ؟ نبی اکرم صلی اللہ علیہ وسلم نے فرمایا : ( یہ وہ لوگ ہیں ) جن پر غضب کیا گیا ، میں نے عرض کی : یہ لوگ ( یعنی عیسائی ) کون ہیں ؟ نبی اکرم صلی اللہ علیہ وسلم نے فرمایا : ( یہ وہ لوگ ہیں ) جو گراہ ہیں ، میں نے عرض کی : یا رسول اللہ ! مال غنیمت کس کے لیے ہو گا ؟ آپ نے فرمایا : اللہ تعالی کے لیے ایک حصہ ( یعنی خمس یعنی پانچواں حصہ ) ہو گا ، اور چار حصے لوگوں کے لیے ہوں گے ، میں نے دریافت کیا : کیا کوئی ایک کسی دوسرے سے زیادہ مال غنیمت کا حقدار ہو گا ؟ آپ نے فرمایا : جی نہیں ! یہاں تک کہ جس حصے کو کوئی شخص اپنے پہلو میں لیتا ہے ، وہ بھی اس کے بارے میں کسی دوسرے سے زیادہ حقدار نہیں ہو گا ۔
یہ روایت امام ابویعلیٰ نے نقل کی ہے اور اس کی سند صحیح ہے ۔

سیدنا عتبان بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص اخلاص کے ساتھ ، اس بات کی گواہی دے کہ اللہ تعالیٰ کے علاوہ اور کوئی معبود نہیں ہے ، اور بیشک میں اللہ کا رسول ہوں ، اور وہ پانچ نمازیں ادا کرے ، تو اللہ تعالیٰ اس کو جہنم پر حرام قرار دیدے گا “ ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی اسحاق بن ابراہیم صواف ہے ، اور وہ متروک الحدیث ہے ۔