مجمع الزوائد ومنبع الفوائد

زید ابوسلام نے ، نبی اکرم صلی اللہ علیہ وسلم کے غلام کے حوالے سے یہ بات نقل کی ہے : آپ صلی اللہ علیہ وسلم نے ارشاد فرمایا : ” پانچ چیزوں کے کیا کہنے ؟ وہ میزان میں کتنی وزنی ہیں ؟ لا الہ الا اللہ پڑھنا ، اللہ اکبر پڑھنا ، سبحان اللہ پڑھنا ، الحمد اللہ پڑھنا ، اور وہ نیک اولاد ( جو بچپن میں ) انتقال کر جائے اور اُن کا والد اس پر ثواب کی امید رکھے “ نبی اکرم صلی اللہ علیہ وسلم نے یہ بھی فرمایا : ” پانچ چیزوں کے کیا کہنے ؟ جو شخص ان پر یقین رکھنے کے ہمراہ ، اللہ تعالیٰ کی بارگاہ میں حاضر ہو گا ، وہ جنت میں داخل ہو گا ، ( یعنی ایسا شخص کہ جو ) اللہ تعالیٰ ، آخرت کے دن ، جنت ، جہنم ، مرنے کے بعد دوبارہ زندہ کئے جانے اور حساب پر ایمان رکھتا ہو “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا عمر بن خطاب رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص ایسی حالت میں انتقال کرے کہ وہ اللہ تعالیٰ اور آخرت کے دن پر ایمان رکھتا ہو ، تو اُس سے کہا جائے گا : تم جنت کے آٹھ دروازوں میں سے ، جس سے چاہے ( جنت میں ) داخل ہو جاؤ ! “ ۔
یہ روایت امام أحمد نے نقل کی ہے اور اس کی سند میں ایک راوی شہر بن حوشب ہے ۔