مجمع الزوائد ومنبع الفوائد

سیدنا جریر بن عبداللہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ سفر پر جانے کے لئے ) نکلے ، جب ہم مدینہ منورہ سے باہر آ گئے ، تو سامنے سے ایک سوار ہماری طرف آ رہا تھا ، نبی اکرم صلی اللہ علیہ وسلم نے فرمایا : لگتا ہے ، یہ سوار تم لوگوں کی طرف آ رہا ہے ، نبی اکرم صلی اللہ علیہ وسلم کی مراد یہ تھی کہ وہ ہماری طرف آ رہا ہے ، راوی بیان کرتے ہیں : جب وہ ہمارے پاس پہنچا ، تو اس نے سلام کیا ، ہم نے اسے سلام کا جواب دیا ، نبی اکرم صلی اللہ علیہ وسلم نے اُس سے دریافت کیا : تم کہاں سے آ رہے ہو ؟ اُس نے جواب دیا : اپنے بیوی بچوں اور خاندان والوں کی طرف سے ، نبی اکرم صلی اللہ علیہ وسلم نے دریافت کیا : تم کہاں جا رہے ہو ؟ اُس نے عرض کی : میں اللہ کے رسول کی طرف جا رہا ہوں ، نبی اکرم صلی اللہ علیہ وسلم نے فرمایا : تم اُن تک پہنچ گئے ، اُس شخص نے عرض کی : یا رسول اللہ ! آپ مجھے تعلیم دیجیے کہ ایمان سے مراد کیا ہے ؟ نبی اکرم صلی اللہ علیہ وسلم نے فرمایا : تم اس بات کی گواہی دو کہ اللہ تعالیٰ کے علاوہ اور کوئی معبود نہیں ہے ، اور سیدنا محمد صلی اللہ علیہ وسلم اللہ کے رسول ہیں ، تم نماز قائم کرو ، زکوۃ ادا کرو ، رمضان کے روزے رکھو اور بیت اللہ کا حج کرو ، اس نے کہا: میں اقرار کرتا ہوں ، راوی بیان کرتے ہیں : پھر اس کے اونٹ کا پاؤں جرذان ( ایک مخصوص قسم کے چوہے ) کی بل میں داخل ہوا ، تو وہ اونٹ گر گیا اور وہ آدمی بھی گر گیا ، وہ شخص سر کے بل گر کے انتقال کر گیا ، نبی اکرم صلی اللہ علیہ وسلم نے ارشاد فرمایا : اس شخص کو میرے پاس لے کر آؤ ! تو سیدنا عمار بن یاسر رضی اللہ عنہ اور سیدنا حذیفہ بن یمان رضی اللہ عنہ تیزی سے اس کی طرف گئے ، اُن دونوں حضرات نے اُسے بٹھایا اور عرض کی : یا رسول اللہ ! اس کا انتقال ہو گیا ہے ، نبی اکرم صلی اللہ علیہ وسلم نے ان دونوں کی طرف سے منہ پھیر لیا ، پھر نبی اکرم صلی اللہ علیہ وسلم نے ان دونوں حضرات سے فرمایا : تم نے مجھے اس شخص کی طرف سے ، جو منہ پھیرتے ہوئے دیکھا ہے ، اس کی وجہ یہ ہے کہ میں نے دو فرشتوں کو دیکھا کہ وہ اس پر جنت کے پھل نچھاور کر رہے تھے ، تو مجھے اندازہ ہو گیا کہ مرتے وقت یہ بھوکا تھا ، پھر نبی اکرم صلی اللہ علیہ وسلم نے فرمایا : اللہ کی قسم ! یہ ان لوگوں میں سے ایک ہے ، جن کے بارے میں ، اللہ تعالیٰ نے یہ ارشاد فرمایا ہے : ” وہ لوگ جو ایمان لائے اور انہوں نے اپنے ایمان کے ساتھ ظلم کو نہیں ملایا ، انہی لوگوں کے لیے امن ہو گا اور وہی لوگ ہدایت یافتہ ہیں“ ۔ پھر نبی اکرم صلی اللہ علیہ وسلم نے فرمایا : اپنے بھائی کی دیکھ بھال کرو ! تو ہم اس کی میت اٹھا کر پانی کے پاس لے کر گئے ، ہم نے اسے غسل دیا اسے خوشبو لگائی ، اسے کفن پہنایا ، پھر اس کی میت اُٹھا کر قبر کے پاس لے کر گئے ، تو نبی اکرم صلی اللہ علیہ وسلم نے فرمایا : لحد بنانا ! شق نہ بنانا ۔
ایک روایت میں یہ الفاظ ہیں : ” یہ ان افراد میں سے ایک ہے ، جنہوں نے تھوڑا عمل کیا اور انہیں زیادہ اجر دیا گیا“ ۔
ایک روایت میں یہ الفاظ ہیں : اُس کے اونٹ کا پاؤں یربوع ( مخصوص قسم کا چوہا ) کی بل میں داخل ہوا ۔
یہ تمام روایات امام أحمد نے اور امام طبرانی نے معجم کبیر میں نقل کی ہیں ، اس کی سند میں ایک راوی ابوجناب ہے ، جو تدلیس کرتا ہے ، اور اس نے یہ روایت بھی ” عن “ کے صیغہ کے ساتھ نقل کی ہے ، باقی اللہ بہتر جانتا ہے ۔

سیدنا جریر رضی اللہ عنہ بیان کرتے ہیں : جب نبی اکرم صلی اللہ علیہ وسلم کو مبعوث کیا گیا ، تو میں آپ کی بیعت کرنے کے لئے آپ کی خدمت میں حاضر ہوا ، نبی اکرم صلی اللہ علیہ وسلم نے دریافت کیا : اے جریر ! تم ہمارے پاس کیوں آئے ہو ؟ میں نے عرض کی : میں اس لئے آیا ہوں تاکہ آپ کے دست اقدس پر اسلام قبول کر لوں ، تو نبی اکرم صلی اللہ علیہ وسلم نے مجھے اس بات کی گواہی دینے کی دعوت دی ، کہ اللہ تعالیٰ کے علاوہ ، اور کوئی معبود نہیں ہے ، اور میں ( یعنی نبی اکرم ) اللہ کا رسول ہوں ( نبی اکرم صلی اللہ علیہ وسلم نے یہ بھی فرمایا : ) تم فرض نماز ادا کرنا ، فرض زکوۃ دینا ، اچھی اور بری ( ہر قسم کی ) تقدیر پر ایمان رکھنا ، راوی بیان کرتے ہیں : پھر نبی اکرم صلی اللہ علیہ وسلم نے اپنی چادر میری طرف بڑھائی ، پھر آپ صلی اللہ علیہ وسلم اپنے اصحاب کی طرف متوجہ ہوئے اور ارشاد فرمایا : ” جب کسی قوم کا کوئی معزز فرد ، تمہارے پاس آئے ، تو اس کا احترام کرو “
یہ روایت امام طبرانی نے معجم کبیر میں نقل کی ہے اور اس کی سند میں ایک راوی حصین بن عمر ہے ، جس کے ضعیف اور جھوٹے ہونے پر اتفاق ہے ۔

سیدنا ابن خصاصیہ سدوسی رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں ، آپ کی بیعت کرنے کے لئے حاضر ہوا تو آپ صلی اللہ علیہ وسلم نے مجھ پر یہ شرط عائد کی : کہ تم اس بات کی گواہی دو کہ اللہ تعالیٰ کے علاوہ ، اور کوئی معبود نہیں ہے ، اور سیدنا محمد صلی اللہ علیہ وسلم اس کے بندے اور رسول ہیں ، اور تم پانچ نمازیں ادا کرو ، رمضان کے روزے رکھو ، زکوٰۃ ادا کرو ، بیت اللہ کا حج کرو ، اور تم اللہ کی راہ میں جہاد کرو میں نے عرض کی : یا رسول اللہ ! دو چیزوں کی تو میں طاقت نہیں رکھتا ، زکوۃ ادا کرنے کی ، کیونکہ میرے پاس صرف دس اونٹ ہیں ، اور وہ میرے گھر والوں کے کام کاج اور سفر کے کام آتے ہیں ، اور دوسری چیز جہاد ہے ، کیونکہ لوگ یہ کہتے ہیں : کہ جو شخص پیٹھ پھیر کر واپس آ جاتا ہے وہ اللہ تعالیٰ کا غضب ساتھ لاتا ہے ، تو مجھے یہ اندیشہ ہے کہ جب میں جنگ کے موقع پر موجود ہوا ، اور پھر میرے دل میں خوف آ گیا اور مجھے موت ناپسند ہوئی ( تو میں جہاد چھوڑ کر ، اللہ تعالیٰ کے غضب کا مستحق نہ بن جاؤں ) تو نبی اکرم صلی اللہ علیہ وسلم نے اپنی مٹھی بند کی ، اُسے حرکت دی ، اور فرمایا : نہ صدقہ ہے ، نہ جہاد ہے ، تو پھر تم کس بنیاد پر جنت میں داخل ہو گے ؟
( راوی بیان کرتے ہیں : ) تو میں نے اُن سب باتوں پر نبی اکرم صلی اللہ علیہ وسلم کی بیعت کر لی ۔
یہ روایت امام أحمد نے اور امام طبرانی نے معجم کبیر اور مجحم اوسط میں نقل کی ہے ، روایت کے یہ الفاظ امام طبرانی کے ہیں ، اور امام أحمد کے رجال کو ثقہ قرار دیا گیا ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اس بات کی گواہی دے کہ اللہ تعالٰی کے علاوہ اور کوئی معبود نہیں ہے اور میں ، اللہ کا رسول ہوں ، اور وہ شخص ان دونوں چیزوں کے بارے میں ، اخلاص کے ساتھ ( گواہی دے ) اور نماز ادا کرے ، روزہ رکھے ، زکوۃ دے ، بیت اللہ کا حج کرے ، تو اللہ تعالیٰ اس شخص کو جہنم پر حرام کر دے گا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی علی بن مسعدہ باہلی ہے ، یحییٰ بن معین اور دیگر حضرات نے اسے ثقہ قرار دیا ہے ، جبکہ امام نسائی رحمہ اللہ اور دیگر حضرات نے اسے ضعیف قرار دیا ہے ۔

بنو عامر سے تعلق رکھنے والے ایک صاحب کے بارے میں یہ بات منقول ہے : انہوں نے نبی اکرم صلی اللہ علیہ وسلم سے اجازت مانگتے ہوئے ، عرض کی : کیا میں اندر آ جاؤں ؟ نبی اکرم صلی اللہ علیہ وسلم نے کنیز سے فرمایا : تم باہر اس کے پاس جاؤ ، اسے صحیح طریقے سے اجازت لینا نہیں آتا ، تم اس سے کہو : کہ وہ یہ کہے : السلام علیکم کیا میں اندر آ جاؤں ؟ راوی کہتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سن لیا ، تو میں نے کہا: السلام علیکم کیا میں اندر آ جاؤں ؟ نبی اکرم صلی اللہ علیہ وسلم نے اجازت دے دی ، تو میں اندر آ گیا ، میں نے عرض کی : آپ ہمارے پاس کیا پیغام لے کر آئے ہیں ؟ نبی اکرم صلی اللہ علیہ وسلم نے فرمایا : میں تم لوگوں کے پاس صرف بھلائی لے کر آیا ہوں ، میں تمہارے پاس ( یہ احکام ) لے کر آیا ہوں کہ تم لوگ صرف ، اللہ تعالیٰ کی عبادت کرو ، جس کے علاوہ اور کوئی معبود نہیں ہے ، وہ یکتا ہے ، اس کا کوئی شریک نہیں ہے ، ( یہاں شعبہ نامی راوی نے یہ الفاظ نقل کئے ہیں : میرا خیال ہے ، روایت میں یہ الفاظ بھی ہیں : ) وہ یکتا ہے ، اس کا کوئی شریک نہیں ہے اور تم لوگ لات اور عزیٰ کو چھوڑ دو ، اور تم لوگ رات اور دن میں پانچ نمازیں ادا کرو ، اور تم سال میں ایک ماہ روزے رکھو ، اور تم لوگ بیت اللہ کا حج کرو ، اور اپنے خوشحال لوگوں سے مال ( یعنی زکوٰۃ ) لے کر اپنے غریب لوگوں کی طرف لوٹا دو ، راوی بیان کرتے ہیں : انہوں نے دریافت کیا : کیا غیب میں سے کوئی ایسی چیز باقی رہ گئی ہے ، جس کا آپ کو علم نہ ہو ؟ تو نبی اکرم صلی اللہ علیہ وسلم نے ارشاد فرمایا : اللہ تعالی بہت سی بھلائی کا علم رکھتا ہے ، اور غیب میں سے کچھ امور ایسے ہیں ، جن کا علم صرف اللہ تعالیٰ کو ہے ، اُن میں پانچ چیزیں یہ ہیں : ( جن کا ذکر قرآن میں ہے : ) ” بے شک قیامت کا علم اللہ تعالی ہی کے پاس ہے ، اور وہ بارش نازل کرتا ہے اور وہ رحموں میں جو کچھ ہے ، اس کے بارے میں علم رکھتا ہے ، کوئی یہ نہیں جانتا کہ کل وہ کیا کمائے گا ، اور کوئی یہ نہیں جانتا کہ وہ کون سی سرزمین پر مرے گا ، بے شک اللہ تعالیٰ علم رکھنے والا ، خبر رکھنے والا ہے “ ۔
( علامہ ہیثمی فرماتے ہیں : ) میں یہ کہتا ہوں : اس روایت کا کچھ حصہ امام ابوداؤد نے نقل کیا ہے ۔
یہ روایت امام أحمد نے نقل کی ہے اور اس کے تمام رجال ثقہ اور ائمہ ہیں ۔

قیس قبیلے سے تعلق رکھنے والے ایک صحابی ، جن کا نام ابن مخفق ہے ، وہ بیان کرتے ہیں : میرے سامنے نبی اکرم صلی اللہ علیہ وسلم کا حلیہ بیان کیا گیا ، میں نے مکہ میں آپ کو تلاش کیا ، تو مجھے بتایا گیا : آپ صلی اللہ علیہ وسلم منیٰ میں ہیں ، میں نے منیٰ میں آپ کو تلاش کیا ، تو مجھے بتایا گیا آپ صلی اللہ علیہ وسلم عرفات میں ہیں ، جب میں آپ کے پاس پہنچا ، تو ہجوم میں سے گزرتا ہوا ، آپ کے پاس آیا ، میں نے نبی اکرم صلی اللہ علیہ وسلم کی سواری کی لگام پکڑ لی ، یہاں ایک لفظ کے بارے میں راوی کو شک ہے ، یہاں تک کہ ہماری سواریوں کی گردنیں ، ایک دوسرے سے مل گئیں ، لیکن نہ تو نبی اکرم صلی اللہ علیہ وسلم نے مجھے ڈانٹا ، اور نہ ہی پرے کیا ، میں نے عرض کی : میں آپ سے دو چیزوں کے بارے میں پوچھنا چاہتا ہوں ، کیا چیز مجھے جہنم سے نجات دلوا سکتی ہے ؟ اور کیا چیز مجھے جنت میں داخل کروا سکتی ہے ؟ نبی اکرم صلی اللہ علیہ وسلم نے آسمان کی طرف دیکھا ، پھر اپنا سر جھکایا ، پھر میری طرف رُخ کیا اور ارشاد فرمایا : تم نے مختصر سوال کیا ہے ، لیکن یہ بڑا ( اہم ) اور طویل ( سوال ) ہے ، تم میری یہ بات یاد رکھنا ! تم اللہ تعالیٰ کی عبادت کرو ! کسی کو اس کا شریک نہ ٹھہراؤ ، فرض نماز ادا کرو ، فرض زکوۃ ادا کرو ، رمضان کے روزے رکھو ، جس چیز کے بارے میں تم یہ پسند کرتے ہو کہ لوگ تمہارے ساتھ اُس طرح کا سلوک کریں ، تو تم بھی اُن کے ساتھ اسی طرح کا سلوک کرو ، اور جس چیز کے بارے میں تمہیں یہ ناپسند ہو ، کہ لوگ تمہارے ساتھ ایسا کریں ، تو تم بھی لوگوں کے ساتھ ویسا نہ کرنا ، پھر آپ نے ارشاد فرمایا : سواری کا راستہ چھوڑ دو ! ۔
یہ روایت امام أحمد نے ، اور امام طبرانی نے معجم کبیر میں نقل کی ہے ، اس کی سند میں ایک راوی عبداللہ بن ابوعقیل ۔ یشکری ہے ، میں نے اُس کے بیٹے مغیرہ بن عبداللہ کے علاوہ ، اور کسی کو اس سے روایت نقل کرتے ہوئے نہیں دیکھا ہے ۔

مغیرہ بن سعد ، اپنے والد ، یا شاید اپنے چچا کا یہ بیان نقل کرتے ہیں : میں ، نبی اکرم صلی اللہ علیہ وسلم کی خدمت میں عرفہ میں حاضر ہوا ، میں نے آپ کی اوٹنی کی لگام پکڑ لی ( یہاں ایک لفظ کے بارے میں راوی کو شک ہے ) مجھے آپ سے پیچھے کیا جانے لگا ، تو نبی اکرم صلی اللہ علیہ وسلم نے فرمایا : اسے چھوڑ دو ! یہ کسی اہم کام کے سلسلے میں آیا ہو گا ۔ میں نے عرض کی : آپ مجھے ایسے عمل کے بارے میں بتائیے ، جو مجھے جنت کے قریب کر دے اور جو مجھے جہنم سے دور کر دے ، راوی بیان کرتے ہیں : نبی اکرم صلی اللہ علیہ وسلم نے اپنا سر آسمان کی طرف اٹھایا ، اور پھر یہ ارشاد فرمایا : تم نے مختصر ، لیکن اہم اور طویل سوال کیا ہے ، تم اللہ تعالیٰ کی عبادت کرو ! کسی کو اُس کا شریک نہ ٹھہراؤ ، تم نماز ادا کرو ، زکوۃ دو ، بیت اللہ کا حج کرو ، رمضان کے روزے رکھو ، اور لوگوں کے ساتھ وہی سلوک کرو ، جس کے بارے میں تم یہ پسند کرتے ہو ، کہ لوگ تمہارے ساتھ ایسا سلوک کریں ، اور اپنی ذات کے حوالے سے ، جس چیز کو تم ناپسند کرتے ہو ، تو تم لوگوں کے ساتھ بھی ویسا نہ کرو ، اور اب اونٹنی کی لگام چھوڑ دو ! ۔
یہ روایت ( امام أحمد کے صاحبزادے ) عبداللہ نے اپنی ” زیادات“ میں نقل کی ہے ، اسے امام طبرانی نے معجم کبیر میں مختلف اسناد اور مختلف رادیوں کے حوالے سے نقل کیا ہے ، جن میں سے بعض ثقہ ہیں ، تاہم اس میں یحییٰ بن عیسیٰ کثیر نامی راوی ضعیف ہے ۔

حجیر نے ، اپنے والد کا یہ بیان نقل کیا ہے ، جن کی کنیت ابومشفق ہے ، وہ بیان کرتے ہیں : میں مکہ آیا ، میں نے نبی اکرم صلی اللہ علیہ وسلم کے بارے میں دریافت کیا ، تو لوگوں نے بتایا کہ آپ صلی اللہ علیہ وسلم عرفہ میں ہیں ، میں آیا اور نبی اکرم صلی اللہ علیہ وسلم کے قریب پہنچ گیا ، یہاں تک کہ میری اونٹنی کی گردن ، نبی اکرم صلی اللہ علیہ وسلم کی اونٹنی کی گردن سے ملنے لگی ، میں نے عرض کی : یا رسول اللہ ! آپ مجھے اس چیز کے بارے میں بتائیے ، جو مجھے اللہ کے عذاب سے بچا دے ، اور جنت میں داخل کروا دے ، نبی اکرم صلی اللہ علیہ وسلم نے فرمایا : تم اللہ کی عبادت کرو ! کسی کو اس کا شریک نہ ٹھہراؤ ، فرض نماز ادا کرو ، فرض زکوٰۃ ادا کرو ، حج اور عمرہ کرو ، رمضان کے روزے رکھو اور اس بات کا جائزہ لو کہ تم جس چیز کو پسند کرتے ہو ، کہ لوگ تمہارے ساتھ ایسا کریں ، تو تم بھی لوگوں کے ساتھ ویسا ہی کرو ، اور جس چیز کو تم ناپسند کرتے ہو ، کہ لوگ تمہارے ساتھ ایسا کریں ، تو تم بھی لوگوں کے ساتھ ویسا نہ کرنا ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ” حجیر“ ہیں ، جو صحابی کے صاحبزادے ہیں ، لیکن میں نے کسی کو اُن کا ذکر کرتے ہوئے نہیں دیکھا ہے ۔

سیدنا علی رضی اللہ عنہ نبی اکرم صلی اللہ علیہ وسلم کا فرمان نقل کرتے ہیں : ” اللہ تعالیٰ نے سیدنا یحیی بن زکریا علیہما السلام کو ، پانچ کلمات کے ہمراہ بنی اسرائیل کی طرف بھیجا ، جب اللہ تعالیٰ نے سیدنا عیسیٰ علیہ السلام کو مبعوث کیا ، تو اللہ تعالیٰ نے فرمایا : اے عیسیٰ ! تم یحیی بن زکریا سے یہ کہو ! کہ میں نے تمہیں جس چیز کے ہمراہ بنی اسرائیل کی طرف بھیجا ہے ، یا تو تم اس کی تبلیغ کر دو ، یا میں انہیں تبلیغ کر دیتا ہوں ، تو سیدنا یحییٰ علیہ السلام نکلے اور بنی اسرائیل کے پاس تشریف لائے اور انہوں نے فرمایا : ” بے شک اللہ تعالیٰ تمہیں یہ حکم دیتا ہے کہ تم اس کی عبادت کرو اور کسی کو اُس کا شریک نہ ٹھہراؤ ، اس کی مثال اس شخص کی مانند ہے ، جو کسی غلام کو آزاد کرتا ہے ، اس کے ساتھ اچھا سلوک کرتا ہے اسے مال وغیرہ دیتا ہے ، وہ غلام چلا جاتا ہے اور اس شخص کی نعمت کا انکار کر دیتا ہے اور اس شخص کی بجائے کسی اور سے تعلق قائم کر لیتا ہے ، اللہ تعالی تمہیں یہ بھی حکم دیتا ہے کہ تم لوگ نماز قائم کرو ! اس کی مثال اس شخص کی مانند ہے جسے دشمن قید کر لیتا ہے اور اسے قتل کرنے کا ارادہ کرتا ہے تو وہ شخص یہ کہتا ہے : تم لوگ مجھے قتل نہ کرو ، میرے پاس خزانہ موجود ہے ، اور میں اپنی ذات کا فدیہ دے دوں گا ، تو وہ شخص ان لوگوں کو اپنا خزانہ دیتا ہے اور اپنی ذات کو نجات دلوا دیتا ہے ، اللہ تعالیٰ نے تمہیں یہ حکم بھی دیا ہے کہ تم لوگ صدقہ کرو اس کی مثال اس شخص کی مانند ہے ، جو دشمن کی طرف جاتا ہے اور جنگ کے لئے ڈھال رکھتا ہے ، وہ اس بات کی پروا نہیں کرتا کہ اس پر کس طرف سے حملہ ہو گا ؟ اللہ تعالی تمہیں یہ حکم دیتا ہے کہ تم لوگ کتاب کی تلاوت کرو ! اس کی مثال ان لوگوں کی مانند ہے ، جو اپنے قلعے میں ہوتے ہیں ، اُن کا دشمن ان کی طرف جاتا ہے ، تو ان لوگوں نے قلعے کے ہر طرف لوگ تیار رکھے ہوتے ہیں ، تو دشمن قلعہ کے جس بھی طرف سے آتا ہے ، اس کے سامنے ایسے افراد موجود ہوتے ہیں ، جو اسے قلعے کی طرف جانے سے روکتے ہیں ، تو یہ مثال اُس شخص کی ہے جو ، قرآن پڑھتا ہے ، تو وہ سب سے زیادہ مضبوط قلعے میں ہوتا ہے “ ۔
راوی بیان کرتے ہیں : میں نے اپنی تحریر میں ، پانچویں چیز کا ذکر نہیں پایا ہے ۔
یہ روایت امام بزار نے نقل کی ہے ، اس کے رجال کی توثیق کی گئی ہے ، البتہ امام بزار کے استاد حسن بن محمد بن عباد کا معاملہ مختلف ہے ، ( علامہ ہیثمی فرماتے ہیں : ) میں ان سے واقف نہیں ہوں ۔

سوید بن حجیر بیان کرتے ہیں : میرے ماموں نے مجھے یہ بات بتائی ہے : وہ کہتے ہیں : عرفہ اور مزدلفہ کے درمیان میری ملاقات نبی اکرم صلی اللہ علیہ وسلم سے ہوئی ، میں نے آپ صلی اللہ علیہ وسلم کی اونٹنی کی لگام پکڑ لی اور عرض کی : یا رسول اللہ ! کیا چیز مجھے جنت کے قریب اور جہنم سے دور کر سکتی ہے ؟ نبی اکرم صلی اللہ علیہ وسلم نے فرمایا : تم نے سوال مختصر کیا ہے اور بات اہم اور طویل دریافت کی ہے ، تم فرض نماز ادا کرو ، فرض زکوۃ ادا کرو ، بیت اللہ کا حج کرو ، تم جو پسند کرتے ہو کہ لوگ تمہارے ساتھ ویسا کریں ، تو تم بھی اُن کے ساتھ وہی کرو ، اور جس چیز کے بارے میں تم یہ ناپسند کرتے ہو ، کہ لوگ تمہارے ساتھ ایسا کریں ، تو تم بھی لوگوں کے ساتھ ویسا نہ کرو ، اور اونٹنی کی لگام چھوڑ دو !
یہ روایت امام طبرانی نے معجم کبیر میں نقل کی ہے ، اس کی سند میں ایک راوی قزعہ بن سوید ہے ، یحییٰ بن معین اور دیگر حضرات نے اسے ثقہ قرار دیا ہے ، جبکہ امام بخاری رحمہ اللہ اور دیگر حضرات نے اسے ضعیف قرار دیا ہے ۔

سیدنا ابودرداء رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے دریافت کیا : اس معاملے کی رسی اور اس کی بندش کیا ہے ؟ نبی اکرم صلی اللہ علیہ وسلم نے ارشاد فرمایا : خالص طور پر ، اللہ کی عبادت کرو ! پانچ نمازیں ادا کرو ، اپنی دلی خوشی کے ساتھ اپنے اموال کی زکوٰۃ ادا کرو ، اپنے مخصوص مہینے ( یعنی رمضان ) کے روزے رکھو ، اور اپنے پروردگار کی جنت میں داخل ہو جاؤ !
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یزید بن مرثد ہے ، لیکن اس نے سیدنا ابودرداء رضٰ اللہ عنہ سے سماع نہیں کیا ہے ۔

سیدنا عبداللہ بن عمرو رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص قیامت کے دن ، اللہ تعالیٰ کی بارگاہ میں پانچ نمازوں ، رمضان کے روزوں ، اور غسل جنابت کرنے کے ہمراہ حاضر ہو گا ، وہ اللہ تعالی کا حقیقی بندہ شمار ہو گا ، اور جو ان میں سے ، کسی چیز میں خیانت کا مرتکب ہو گا ، وہ اللہ تعالی کا حقیقی دشمن شمار ہو گا“ ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی حجاج بن رشدین بن سعد ہے ، جس کو ابن عدی نے ضعیف قرار دیا ہے ۔

سیدنا جریر رضی اللہ عنہ بیان کرتے ہیں : ایک شخص نبی اکرم کی خدمت میں حاضر ہوا ، اس نے آپ سے اسلام کے بارے میں دریافت کیا ، تو نبی اکرم صلی اللہ علیہ وسلم نے ارشاد فرمایا : تم اس بات کی گواہی دو ! کہ اللہ تعالٰی کے علاوہ ، اور کوئی معبود نہیں ہے ، اور سیدنا محمد صلی اللہ علیہ وسلم اللہ کے رسول ہیں اور تم نماز ادا کرو ، زکوۃ دو ، رمضان کے روزے رکھو ، اور لوگوں کے لیے وہی چیز پسند کرو ، جو تم اپنے لیے پسند کرتے ہو ، اور اُن کے لئے وہی چیز ناپسند کرو ، جو تم اپنے لیے ناپسند کرتے ہو ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی حجاج بن ارطاۃ ہے ۔

سیدنا ابومالک اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص ، اللہ تعالیٰ پر ایمان لانے کے بعد ، کسی کو اس کا شریک قرار نہ دے ، اور نماز قائم کرے ، فرض زکوٰۃ ادا کرے رمضان کے روزے رکھے ( حاکم وقت کی ) اطاعت و فرمانبرداری کرے ، اور پھر اسی حالت میں مر جائے ، اُس کے لیے جنت واجب ہو جاتی ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن اسماعیل بن عیاش ہے اور وہ ضعیف ہے ۔

سیدنا حکیم بن معاویہ رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے اور عرض کی : یا رسول اللہ ! ہمارے پروردگار نے آپ کو کس چیز کے ہمراہ مبعوث کیا ہے ؟ تو نبی اکرم صلی اللہ علیہ وسلم نے ارشاد فرمایا : ( اس بات کے ہمراہ کہ ) کہ تم اللہ تعالیٰ کی عبادت کرو ! اور کسی کو اُس کا شریک نہ ٹھہراؤ ، اور تم نماز قائم کرو ، اور زکوٰۃ ادا کرو ، ہر مسلمان ( یعنی اس کی جان اور مال ) دوسرے مسلمان کے لئے حرام ہے ، اے حکیم بن معاویہ ! یہ تمہارا دین ہے ، تم جہاں کہیں بھی ہو گے ، یہ تمہارا بچاؤ کرے گا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حبیب بن حبیب ہے ، جو مزہ بن حبیب زیات کا بھائی ہے ، اور وہ ضعیف ہے ۔

سیدنا عبداللہ بن عباس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : جو شخص نماز قائم کرے ، زکوٰۃ ادا کرے ، بیت اللہ کا حج کرے ، رمضان کے روزے رکھے اور مہمان نوازی کرے وہ جنت میں داخل ہو جائے گا ۔
یہ روایت امام طبرانی نے معجم کبیر میں روایت کی ہے ، اس کی سند میں ایک راوی حبیب بن حبیب ہے ، جو حمزہ بن حبیب زیات کا بھائی ہے ۔ اور وہ ضعیف ہے ۔

سیدنا سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” نماز قائم کرو ، زکوٰۃ ادا کرو ، حج اور عمرہ کرو ، اور سیدھے رہو ، تمہارے ساتھ سیدھا رہا جائے گا ( یعنی تمہارا انجام ٹھیک ہو گا ) “ ۔
یہ روایت امام طبرانی نے معجم کبیر ، معجم اوسط اور معجم صغیر میں نقل کی ہے ، اس کی سند میں ایک راوی عمران القطان ہے ، امام بخاری رحمہ اللہ نے اس سے استشہاد کیا ہے ، جبکہ امام أحمد اور ابن حبان نے اسے ثقہ قرار دیا ہے ، لیکن دیگر حضرات نے اسے ضعیف بھی کہا: ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” چھ چیزیں ایسی ہیں کہ جو شخص ان میں سے ایک بھی لے کر آئے گا ، تو وہ ایسی حالت میں آئے گا کہ قیامت کے دن اُس کے لیے عہد ہو گا ، ان میں سے ہر ایک چیز یہ کہے گی : یہ شخص مجھ پر عمل کیا کرتا تھا ، ( وہ چیزیں یہ ہیں : ) زکوٰۃ ، نماز ، حج ، روزہ ، امانت کی ادائیگی ، اور رشتہ داری کے حقوق کا خیال رکھنا“ ۔
یہ روایت امام طبرانی نے معجم کبیر میں نقل کی ہے ، اس کی سند میں ، ایک راوی یونس بن ابوحثمہ ہے ، اور میں نے کسی کو اس کا ذکر کرتے ہوئے نہیں دیکھا ہے ۔

سیدنا ابوامامہ رضی اللہ عنہ بیان کرتے ہیں : ( ایک مرتبہ ) عشاء کی نماز کے وقت ، نبی اکرم صلی اللہ علیہ وسلم نے اپنے اصحاب کو حکم دیا کہ کل صبح تم نے نماز کے وقت تیار رہنا ہے ، مجھے تم لوگوں سے ایک کام ہے ، تو ان لوگوں میں سے کچھ نے یہ کہا: اے فلاں ! تم نے اس چیز کا خیال رکھنا ہے ، جو کلمہ نبی اکرم صلی اللہ علیہ وسلم سب سے پہلے ارشاد فرمائیں گے ، دوسرے کلمے کا خیال تم نے رکھنا ہے ، اُن لوگوں کا مقصد یہ تھا کہ نبی اکرم صلی اللہ علیہ وسلم کی گفتگو میں سے کوئی چیز رہ نہ جائے ، ( اگلے دن صبح ) جب وہ لوگ نماز پڑھ کر فارغ ہوئے ، تو نبی اکرم صلی اللہ علیہ وسلم نے دریافت کیا : کیا تم لوگ اسی طرح تیار ہو ؟ جس طرح میں نے تمہیں ہدایت کی تھی ، اُن لوگوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے فرمایا : تم لوگ اپنے پروردگار کی عبادت کرو اور کسی کو اُس کا شریک نہ ٹھہراؤ ! کیا تمہیں یہ بات سمجھ آ گئی ہے ؟ کیا تمہیں یہ بات سمجھ آ گئی ہے ؟ کیا تمہیں یہ بات سمجھ آ گئی ہے ؟ لوگوں نے عرض کی : جی ہاں ! نبی اکرم صلی اللہ علیہ وسلم نے فرمایا : تم لوگ نماز قائم کرو ، زکوٰۃ ادا کرو ، تم لوگ نماز قائم کرو ، زکوۃ ادا کرو ، تم لوگ نماز قائم کرو زکوٰۃ ادا کرو ، کیا تمہیں یہ بات سمجھ آ گئی ہے ؟ کیا تمہیں یہ بات سمجھ آ گئی ہے ؟ کیا تمہیں یہ بات سمجھ آ گئی ہے ؟ لوگوں نے عرض کی : جی ہاں ! نبی اکرم صلی اللہ علیہ وسلم نے فرمایا تم لوگ اطاعت و فرمانبرداری کرو ، تم لوگ اطاعت و فرمانبرداری کرو ، تم لوگ اطاعت و فرمانبرداری کرو ، کیا تمہیں یہ بات سمجھ آ گئی ہے ؟ کیا تمہیں یہ بات سمجھ آ گئی ہے ؟ کیا تمہیں یہ بات سمجھ آ گئی ہے ؟ لوگوں نے عرض کی : جی ہاں !
راوی بیان کرتے ہیں : ہم تو یہ سمجھ رہے تھے کہ نبی اکرم صلی اللہ علیہ وسلم طویل گفتگو کریں گے ، لیکن جب ہم نے آپ کے کلام کا جائزہ لیا ، تو یہ بات سامنے آئی کہ آپ صلی اللہ علیہ وسلم نے پورے معاملے کو ( یعنی دین کی بنیادی تعلیمات کو ) ہمارے لئے جمع کر دیا ہے ۔
( علامہ ہیثمی فرماتے ہیں : ) میں یہ کہتا ہوں : امام ترمذی نے اس روایت کا کچھ حصہ نقل کیا ہے ، لیکن وہ اس سیاق کے بغیر ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی اسحاق بن ابراہیم بن زبریق حمصی ہے ، یحییٰ بن معین اور ابوحاتم نے اسے ثقہ قرار دیا ہے ، جبکہ امام نسائی رحمہ اللہ اور امام ابوداؤد نے اسے ضعیف قرار دیا ہے ۔

سیدنا عمرو بن مرہ جہنی رضی اللہ عنہ بیان کرتے ہیں : قضاعہ قبیلے سے تعلق رکھنے والا ایک شخص نبی اکرم صلی اللہ علیہ وسلم کی خدمت میں حاضر ہوا اور بولا: میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، اور آپ صلی اللہ علیہ وسلم اللہ کے رسول ہیں ، میں پانچوں نمازیں ادا کرتا ہوں ، رمضان کے روزے ان کے وقت پر رکھتا ہوں ، اور میں زکوٰۃ ادا کرتا ہوں ، نبی اکرم صلی اللہ علیہ وسلم نے ارشاد فرمایا : جو شخص ایسی حالت پر انتقال کرے گا ، وہ صدیقین اور شہداء میں سے ہو گا ۔
یہ روایت امام بزار نے نقل کی ہے ، اور امام بزار کے دونوں استادوں کے علاوہ ، اس کے تمام رجال صحیح کے رجال ہیں ، اور مجھے یہ امید ہے کہ اس کی سند حسن ، یا صحیح ہو گی ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص رمضان کے روزے رکھے ، پانچ نمازیں ادا کرے ، بیت اللہ کا حج کرے ( راوی کہتے ہیں : مجھے نہیں معلوم کہ انہوں نے زکوٰۃ کا ذکر کیا تھا ، یا نہیں کیا تھا ؟ ) تو اللہ تعالیٰ کے ذمہ یہ بات لازم ہے کہ وہ اُس شخص کی مغفرت کر دے ( سیدنا معاذ رضی اللہ عنہ کہتے ہیں رحمہ اللہ ) میں نے عرض کی : میں لوگوں کو یہ بات بتا دوں ؟ نبی اکرم صلی اللہ علیہ وسلم نے فرمایا : تم لوگوں کو رہنے دو کہ وہ عمل کرتے رہیں ! کیونکہ جنت میں ایک سو درجات ہیں ، اور اُن میں سے ، ہر دو ، درجات کے درمیان ، اتنا فاصلہ ہے ، جتنا آسمان اور زمین کے درمیان ہے اور جنت الفردوس سب سے بلند اور عمدہ درجے کی ہے ، اُس کے اوپر ، رحمان کا عرش ہے ، اور اُسی میں سے جنت کی نہریں پھوٹتی ہیں ، ، جب تم اللہ تعالیٰ سے مانگو ، تو اُس سے جنت الفردوس ( کی دعا ) مانگو ! “ ۔
یہ روایت امام بزار نے نقل کی ہے اسے عطاء بن یسار نے سیدنا معاذ رضی اللہ عنہ سے نقل کیا ہے ، حالانکہ انہوں نے سیدنا معاذ رضی اللہ عنہ سے سماع نہیں کیا ہے ۔ ( علامہ ہیثمی فرماتے ہیں : ) میں یہ کہتا ہوں : اس کے بعد والے باب میں ، ایسی احادیث آئیں گی ، جو اس باب سے تعلق رکھتی ہیں ۔