مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اسلام کے دس حصے ہیں اور وہ شخص رُسوا ہو گیا ، ، جس کا ان میں سے کوئی بھی حصہ نہ ہو ، اس بات کی گواہی دینا کہ اللہ تعالیٰ کے علاوہ اور کوئی معبود نہیں ہے یہ چیز ملت ہے ، دوسری ( چیز ) نماز ہے اور یہ فطرت ہے ، تیسری چیز زکوۃ ہے اور یہ پاکیزگی ہے ، چوتھی چیز روزہ ہے ، اور یہ ڈھال ہے ، پانچویں چیز حج ہے اور یہ مخصوص طریقہ ہے ، چھٹی چیز جہاد ہے اور یہ مضبوط پشت ہے ساتویں چیز نیکی کا حکم دینا ہے اور یہ وفا ہے ، پانچویں چیز برائی سے منع کرنا ہے ، اور یہ حجت ہے نویں چیز جماعت ہے اور یہ الفت ہے ، دسویں چیز اطاعت ہے اور یہ بچاؤ ہے “ ۔

یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی حامد بن آدم ہے ، جو حدیث ایجاد کرنے کے حوالے سے معروف ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” تین چیزوں پر میں حلف اُٹھا سکتا ہوں ، جس شخص کا اسلام میں کوئی حصہ ہو ، اللہ تعالی نے اُسے اس شخص کی مانند نہیں کیا ہے جس کا ( اسلام میں ) کوئی حصہ نہ ہو ، اور اسلام کے تین حصے ہیں ، نماز ، روزہ اور زکوۃ ( دوسری بات یہ ہے : ) اللہ تعالیٰ دنیا میں جس بندے کو دوست رکھتا ہے ، تو قیامت کے دن اُسے کسی اور کے سپرد نہیں کرے گا ، اور ( تیسری بات یہ ہے : ) آدمی جب کسی قوم سے محبت رکھتا ہو گا ، تو اللہ تعالیٰ اُسے ان لوگوں کے ساتھ کر دے گا ، اور اگر ایک چوتھی بات پر میں حلف اٹھاؤں ، تو مجھے امید ہے کہ میں گناہ گار نہیں ہوؤں گا ، ( اور وہ یہ ہے : کہ ) اللہ تعالی دنیا میں جس بندے کی پردہ پوشی کرتا ہے ، تو قیامت کے دن بھی اُس کی پردہ پوشی کرے گا “ ۔
یہ روایت امام أحمد نے نقل کی ہے اور اس کے رجال ثقہ ہیں ، یہ روایت امام ابویعلیٰ نے بھی نقل کی ہے ۔

سیدنا عبداللہ بن مسعود رضی اللہ عنہ نے نبی اکرم صلی اللہ علیہ وسلم کے حوالے سے ، اس کی مانند روایت نقل کی ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تین چیزوں کے بارے میں ، اگر میں قسم اٹھا لوں تو میں سچا ہوؤں گا ، اور اگر چوتھی بات کے بارے میں بھی قسم اٹھا لوں ، تو مجھے امید ہے کہ میں گناہ گار نہیں ہوؤں گا ( پہلی بات یہ ہے : ) جس شخص کا اسلام میں کوئی حصہ ہو ، اللہ تعالٰی نے اُسے اس شخص کی مانند نہیں کیا ہے ، جس کا اسلام میں کوئی حصہ نہ ہو ( دوسری بات یہ ہے : ) اللہ تعالیٰ جس بندے کو دنیا میں دوست بنا لے ، تو وہ آخرت میں اُس بندے کو کسی اور کے سپرد نہیں کرے گا ، ( تیسری بات یہ ہے : ) جب بندہ کسی قوم سے محبت رکھتا ہے ، تو اللہ تعالیٰ اسے اُن لوگوں کے ہمراہ ( اور اُن کے درمیان ) دوبارہ زندہ کرے گا ، ( چوتھی بات یہ ہے : ) کہ اللہ تعالیٰ دنیا میں ، جس بندے کی پردہ پوشی کرتا ہے ، تو قیامت کے دن بھی اللہ تعالیٰ اُس کی پردہ پوشی کرے گا“ ۔
یہ روایت امام طبرانی نے معجم کبیر میں نقل کی ہے اور اس میں ایک راوی فضال بن جبیر ہے اور وہ ضعیف ہے ۔

سیدنا علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اسلام کے آٹھ حصے ہیں ، اسلام ( یعنی کلمہ شہادت ) ایک حصہ ہے ، نماز ایک حصہ ہے ، زکوۃ ایک حصہ ہے ، حج ایک حصہ ہے ، جہاد ایک حصہ ہے ، رمضان کے روزے ایک حصہ ہے ، نیکی کا حکم دینا ایک حصہ ہے ، برائی سے منع کرنا ایک حصہ ہے ، وہ شخص رسوا ہو گیا ، جس کا ( اِن میں سے ) کوئی حصہ نہ ہو “ ۔
یہ روایت امام ابویعلیٰ نے نقل کی ہے ، اس کی سند میں ایک راوی حارث ہے اور وہ کذاب ہے ۔

سیدنا حذیفہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اسلام کے آٹھ حصے ہیں ، اسلام ( یعنی کلمہ شہادت ) ایک حصہ ہے ، نماز ایک حصہ ہے ، زکوۃ ایک حصہ ہے ، بیت اللہ کا حج ایک حصہ ہے ، روزے رکھنا ایک حصہ ہے ، نیکی کا حکم دینا ایک حصہ ہے ، برائی سے منع کرنا ایک حصہ ہے ، اللہ کی راہ میں جہاد کرنا ایک حصہ ہے ، تحقیق وہ شخص خسارے کا شکار ہو گیا ، جس کا ( ان میں سے ) کوئی حصہ نہ ہو “ ۔
یہ روایت امام بزار نے نقل کی ہے اور اس کی سند میں ایک راوی یزید بن عطاء ہے ، جسے امام أحمد اور دیگر حضرات نے ثقہ قرار دیا ہے ، لیکن ایک جماعت نے اسے ضعیف قرار دیا ہے ، اس روایت کے باقی راوی ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : تین باتیں ہیں ، جن پر میں قسم اٹھا سکتا ہوں ۔ ۔ ۔ ۔ ۔ ۔ ۔ ۔ اس کے بعد مصنف نے اسے موقوف روایت کے طور پر نقل کیا ہے ، اور اس کی سند منقطع ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اسلام کی مخصوص روشنی اور علامات ہیں ، جس طرح راستے میں مینار ہوتا ہے ، اس کا سرا اور مجموعہ اس بات کی گواہی دینا ہے کہ اللہ تعالیٰ کے علاوہ اور کوئی معبود نہیں ہے ، اور سیدنا محمد صلی اللہ علیہ وسلم اس کے بندے اور رسول ہیں اور نماز قائم کرنا ، زکوٰۃ دینا اور مکمل وضو کرنا “ ۔
یہ روایت امام طبرانی نے معجم کبیر میں نقل کی ہے ۔