مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” رحمان کے سامنے ایک لوح موجود ہے ، جس میں تین سو پندرہ شریعتیں ہیں ، رحمان فرماتا ہے : مجھے اپنی عزت و جلال کی قسم ہے ! میرے بندوں میں سے ، جو بھی بندہ کسی کو میرا شریک نہیں ٹھہراتا ہو گا ، تو وہ ان میں سے ، جس کسی پر بھی عمل پیرا ہو گا ، وہ جنت میں داخل ہو جائے گا“ ۔
یہ روایت امام ابویعلیٰ نے نقل کی ہے اس کی سند میں ایک راوی عبداللہ بن راشد ہے اور وہ ضعیف ہے ۔

سیدنا عبید رضی اللہ عنہ ، جنہیں صحابی ہونے کا شرف حاصل ہے ، اُن کے حوالے سے نبی اکرم صلی اللہ علیہ وسلم کا یہ فرمان منقول ہے : ” ایمان کی تین سو تیس شریعتیں ہیں ، جو شخص اُن میں سے ، جس شریعت کو پورا کرے گا ، وہ جنت میں داخل ہو گا“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عیسیٰ بن سنان قسملی ہے ، جسے ابن حبان اور ابن خراش نے ثقہ قرار دیا ہے ، اور جمہور نے اسے ضعیف قرار دیا ہے ، جبکہ عبدالرحمن بن عبید نامی راوی کے بارے میں ، میں نے کسی کو ذکر کرتے ہوئے نہیں دیکھا ہے ۔

سیدنا عثمان غنی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالی کے ( مقرر کردہ ، یا پسندیدہ ) ایک سو سولہ اخلاق ہیں ، جو شخص اُن میں سے کسی ایک پر عمل پیرا ہو گا ، وہ جنت میں داخل ہو گا “


یہ روایت امام ابویعلیٰ نے ” مسند کبیر “ میں نقل کی ہے ، ایک اور روایت میں یہ الفاظ ہیں : ” ایک سو سترہ ، اخلاق ہیں“ ۔ اس کی سند میں موجود ایک راوی عبداللہ بن راشد ہے اور وہ ضعیف ہے ، امام بزار نے یہ روایت عبداللہ بن راشد کے حوالے سے نقل کی ہیں اور یہ الفاظ نقل کئے ہیں : ” ایک سو سترہ شریعتیں“ ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” عرش کے نیچے موجود ، سبز زبرجد سے بنی ہوئی ، اللہ تعالیٰ کی ایک لوح ہے ، جس میں اُس نے یہ تحریر کیا ہے : میں اللہ ہوں ، میرے علاوہ اور کوئی معبود نہیں ہے ، میں سب سے زیادہ رحم کرنے والا ہوں میں نے تین سو دس سے کچھ زیادہ اخلاق پیدا کیے ہیں ، جو شخص لا الہ الا اللہ کی گواہی کے ہمراہ ، ان میں سے کوئی ایک اخلاق لے کر آئے گا ، میں اُسے جنت میں داخل کر دوں گا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوظلال قسملی ہے ، جسے ابن حبان نے ثقہ قرار دیا ہے ، جبکہ زیادہ تر حضرات نے اسے ضعیف قرار دیا ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اسلام کی تین سو تیرہ شریعتیں ہیں ، ان میں سے ہر ایک شریعت کا یہ عالم ہے کہ جو بھی شخص اس شریعت کے ہمراہ ، اللہ تعالیٰ کی بارگاہ میں حاضر ہو گا ، وہ شخص جنت میں داخل ہو گا“ ۔
یہ روایت امام طبرانی نے معجم اوسط میں نقل کی ہے ، جو ایسی سند کے ساتھ منقول ہے ، جس میں عبیداللہ بن زحر نامی راوی ہے اور وہ ضعیف ہے ۔

سیدنا عبید رضی اللہ عنہ ، انہیں صحابی ہونے کا شرف حاصل ہے ، اُن کے حوالے سے نبی اکرم صلی اللہ علیہ وسلم کا یہ فرمان منقول ہے : ” ایمان کی تین سو تیس شریعتیں ہیں ، جو شخص اُن میں سے کسی ایک پر عمل کرے گا ، وہ جنت میں داخل ہو گا“ ۔
یہ روایت امام طبرانی نے معجم اوسط میں نقل کی ہے ، اس کی سند میں مجہول راوی پائے جاتے ہیں ، جیسے منہال بن بحر اور ابو سنان

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایمان کے ستر سے کچھ زیادہ شعبے ہیں ، جن میں سب سے بلند تر لا الہ الا اللہ پڑھنا ہے ، اور سب سے معمولی ( شعبہ ) راستے سے تکلیف دہ چیز کو ہٹانا ہے “ ۔
یہ روایت امام طبرانی نے معجم اوسط میں نقل کی ہے ، جس کی سند کے افراد مستور ہیں ، باقی اللہ بہتر جانتا ہے ۔