تفسیر السعدی (عبدالرحمٰن السعدی) — سورۃ الممتحنة (60) — آیت 2

پھر اللہ تبارک و تعالیٰ نے اہل ایمان کو کفار کی عداوت پر برانگیختہ کرنے کے لیے کفار کی شدت عداوت کا ذکر کیا ہے، چنانچہ فرمایا: ﴿ اِنْ یَّثْ٘قَفُوْؔكُمْ﴾ یعنی اگر وہ تمھیں پائیں اور تمھیں اذیت پہنچانے کا ان کو موقع ملے ﴿ یَكُوْنُوْا لَكُمْ اَعْدَآءًؔ ﴾ تو تمھارے کھلے دشمن ہو جائیں گے ﴿ وَّیَبْسُطُوْۤا اِلَیْكُمْ اَیْدِیَهُمْ﴾ اور قتل اور ضرب لگانے وغیرہ کے لیے تمھاری طرف ہاتھ بڑھائیں گے۔ ﴿ وَاَلْسِنَتَهُمْ بِالسُّوْٓءِ﴾ اور ایسی بات کہیں گے جو تکلیف دہ ہو گی، یعنی گالی وغیرہ۔ ﴿ وَوَدُّوْا لَوْ تَكْ٘فُرُوْنَ﴾ اور وہ خواہش کریں گے کہ کاش تم کفر کرتے۔“ اور یہی وہ غرض و غایت ہے جو وہ تم سے چاہتے ہیں۔