تفسیر السعدی (عبدالرحمٰن السعدی) — سورۃ ص (38) — آیت 26

﴿یٰدَاوٗدُ اِنَّا جَعَلْنٰكَ خَلِیْفَةً فِی الْاَرْضِ ﴾ ”اے داود! ہم نے آپ کو زمین میں خلیفہ بنایا۔“ تاکہ آپ دنیا میں دینی اور دنیاوی احکام نافذ کر سکیں۔ ﴿فَاحْكُمْ بَیْنَ النَّاسِ بِالْحَقِّ ﴾ ”پس لوگوں کے درمیان حق کے ساتھ فیصلے کیجیے“ یعنی عدل وانصاف کے ساتھ۔ اور یہ اس وقت تک ممکن نہیں جب تک کہ واجب کا علم اور واقع کا علم نہ ہو اور حق کو نافذ کرنے کی قدرت نہ ہو۔

﴿وَلَا تَ٘تَّ٘بِـعِ الْهَوٰى ﴾ ”اور خواہشات نفس کی پیروی نہ کیجیے“ ایسا نہ ہو کہ آپ کا دل کسی کی طرف اس کی قرابت، دوستی یا محبت یا فریق مخالف سے ناراضی کے باعث مائل ہو جائے ﴿فَیُضِلَّكَ ﴾ ”پس وہ (خواہش نفس) آپ کو گمراہ کر دے“ ﴿عَنْ سَبِیْلِ اللّٰهِ ﴾ ”اللہ کی راہ سے“ اور آپ کو صراط مستقیم سے دور کر دے۔ ﴿اِنَّ الَّذِیْنَ یَضِلُّوْنَ عَنْ سَبِیْلِ اللّٰهِ ﴾ ”بلاشبہ وہ لوگ جو اللہ کے راستے سے گمراہ ہوجاتے ہیں“ خاص طور پر وہ لوگ جو دانستہ طور پر اس کاارتکاب کرتے ہیں۔ ﴿لَهُمْ عَذَابٌ شَدِیْدٌۢ بِمَا نَسُوْا یَوْمَ الْحِسَابِ ﴾ ” ان کے لیے یوم جزا سے غافل رہنے کی وجہ سے سخت عذاب ہے۔“ اگر وہ اسے یاد رکھتے اور ان کے دل میں اس کا خوف ہوتا تو فتنے میں مبتلا کرنے والی خواہشات نفس کبھی بھی انھیں ظلم اور ناانصافی کی طرف مائل نہ کر سکتیں۔