تفسیر السعدی (عبدالرحمٰن السعدی) — سورۃ طه (20) — آیت 42

اللہ تبارک و تعالیٰ نے موسیٰ علیہ السلام کو دینی اور دنیاوی نعمتوں سے نوازنے کے بعد فرمایا: ﴿ اِذْهَبْ اَنْتَ وَاَخُوْكَ ﴾ ”جا تو اور تیرا بھائی۔“ یعنی ہارون علیہ السلام ﴿بِاٰیٰتِیْ﴾ ”میری نشانیوں کے ساتھ۔“ یعنی ان نشانیوں کے ساتھ جائیں جو حق کے حسن اور باطل کی قباحت پر دلالت کرتی ہیں، مثلاً:ید بیضاء، عصا اور دیگر نو معجزات لے کر فرعون اور اس کی اشرافیہ کے پاس پاس جائیں۔ ﴿ وَلَا تَنِیَا فِیْ ذِكْرِیْ﴾ ”اور تم دونوں میرے ذکر میں سستی نہ کرو۔“ یعنی میرا ذکر ہمیشہ کرتے رہو اور اس کو دائمی طور پر قائم رکھتے ہوئے کسی سستی کا شکار نہ ہو، میرے ذکر کو لازم بناؤ جیسا کہ تم دونوں نے خود ان الفاظ میں وعدہ کیا ہے۔ ﴿ كَیْ نُسَبِّحَكَ كَثِیْرًاۙ۰۰وَّنَذْكُرَكَ كَثِیْرًا ﴾ (طٰہ:20؍33،34) اس لیے کہ اللہ تبارک و تعالیٰ کا ذکر تمام معاملات میں مدد و معونت فراہم کر کے ان کو سہل بناتا ہے اور ان معاملات کے بوجھ میں تخفیف کرتا ہے۔