تفسیر السعدی (عبدالرحمٰن السعدی) — سورۃ الإسراء/بني اسرائيل (17) — آیت 7

﴿ اِنْ اَحْسَنْتُمْ اَحْسَنْتُمْ لِاَنْفُسِكُمْ﴾ ”اگر بھلائی کی تم نے تو بھلائی کی اپنے لیے“ یعنی تمھاری نیکی کا فائدہ تمھاری ہی طرف لوٹے گا حتیٰ کہ دنیا میں بھی تمھیں ہی فائدہ ہو گا، جیسا کہ تم نے مشاہدہ کر لیا ہے کہ دشمن کے مقابلے میں تم فتح یاب ہوئے۔ ﴿ وَاِنْ اَسَاْتُمْ فَلَهَا﴾ ”اور اگر برائی کی تو اپنے لیے“ یعنی اگر تم برائی کا ارتکاب کرتے ہو تو اس کا نقصان بھی خود تمھاری طرف لوٹے گا جیسا کہ اللہ تعالیٰ نے تمھاری بداعمالیوں کی پاداش میں تمھارے دشمنوں کو تم پر مسلط کر دیا تھا۔ ﴿ فَاِذَا جَآءَؔ وَعْدُ الْاٰخِرَةِ ﴾ ”پس جب دوسرے وعدے کا وقت آیا“ جس میں ذکر تھا کہ تم زمین میں فساد برپا کروگے، ہم نے تم پر دشمنوں کو مسلط کر دیا ﴿ لِیَسُوْٓءٗا وُجُوْهَكُمْ ﴾ ”تاکہ وہ تمھارے چہروں کو بگاڑ دیں۔“ یعنی وہ فتح یاب ہو کر تمھیں غلام بنائیں اور چہروں کو بگاڑ دیں۔ ﴿وَلِیَدْخُلُوا الْمَسْجِدَ كَمَا دَخَلُوْهُ اَوَّلَ مَرَّةٍ ﴾ ”اور گھس جائیں مسجد میں جیسے گھس گئے تھے وہ پہلی بار“ یہاں مسجد سے مراد بیت المقدس ہے ﴿وَّلِیُتَبِّرُوْا﴾ ”اور خراب کر دیں “ یعنی اجاڑ کر پیوند زمین کر دیں ﴿ مَا عَلَوْا ﴾ ”جس جگہ پر وہ غالب آجائیں۔“ ﴿ تَتْبِیْرًا ﴾ ”پوری طرح خراب کرنا“ پس وہ تمھارے گھروں، تمھاری عبادت گاہوں اور تمھارے کھیتوں کو تہس نہس کر کے رکھ دیں۔