ترجمہ و تفسیر — سورۃ القمر (54) — آیت 5

(آیت 5){ حِكْمَةٌۢ بَالِغَةٌ فَمَا تُغْنِ النُّذُرُ: ” بَالِغَةٌ “} کا لفظی معنی پہنچنے والی ہے، مراد انتہا اور کمال کو پہنچی ہوئی حکمت ہے۔ {” النُّذُرُ “ ”نَذِيْرٌ“} کی جمع ہے، ڈرانے والی چیزیں۔ {”نَذِيْرٌ“} مصدر بھی ہو سکتا ہے، جس طرح {”نَكِيْرٌ“} ہے، یعنی تنبیہات، ڈراوے۔ {” حِكْمَةٌ “} پچھلی آیت میں مذکور {” مَا فِيْهِ مُزْدَجَرٌ “} سے بدل ہے۔ یعنی پچھلی امتوں کے واقعات میں سے وہ واقعات جن میں کفر و تکذیب سے باز آنے کا سامان موجود ہے، کامل حکمت اور دانائی کی باتیں ہیں، مگر یہ ڈرانے اور خبردار کرنے والی چیزیں نہ ماننے والوں کو کچھ فائدہ نہیں دیتیں۔ دیکھیے سورۂ یونس (۱۰۱)۔

5۔ 1 یعنی ایسی بات جو تباہی سے پھیر دینے والی ہے یا قرآن حکمت بالغہ ہے جس میں کوئی نقص یا خلل نہیں ہے۔ یا اللہ تعالیٰ جس کو ہدایت دے اور یا اسے گمراہ کرے، اس میں بڑی حکمت ہے جس کو وہی جانتا ہے۔

[5] یعنی قرآن میں اقوام سابقہ کی سرگزشت کو اس لیے بار بار دہرایا گیا ہے کہ لوگ ان اقوام کے انجام اور عذاب سے عبرت حاصل کریں اور ان واقعات کا ذکر ان کے لیے تازیانہ کا کام دے۔ (جسے شرعی اصطلاح میں تذکیر با یام اللہ کہا جاتا ہے) ان واقعات میں لوگوں کے عبرت اور سبق حاصل کرنے کے لیے مواد تو بہت موجود ہے لیکن اگر کوئی شخص ادھر توجہ ہی نہ کرے تو یہ تنبیہات اس کے کس کام آسکتی ہیں؟

اس آیت کی تفسیر اگلی آیات کیساتھ ملاحظہ کریں۔