ترجمہ و تفسیر — سورۃ الهمزة (104) — آیت 4

(آیت 4) {كَلَّا لَيُنْۢبَذَنَّ فِي الْحُطَمَةِ:” لَيُنْۢبَذَنَّ “ ”نَبَذَ يَنْبِذُ نَبْذًا“} (ض) (کسی چیز کو خاطر میں نہ لاتے ہوئے پھینک دینا) سے واحد مذکر غائب مضارع مجہول بانون تاکید ثقیلہ ہے جو قسم کا مفہوم ادا کرتا ہے، یعنی یہ خیال ہر گز درست نہیں، بلکہ قسمیہ بات یہ ہے کہ اسے ہر حال میں اس دنیا سے جانا ہے۔ پھر اسے اس کے برے اعمال کی پاداش میں ”حطمہ“ میں پھینک دیا جائے گا۔ پھینکنے کے لفظ سے اس کی تذلیل و تحقیر نمایاں ہو رہی ہے۔

4۔ 1 یعنی معاملہ ایسا نہیں ہے جیسا اس کا وہم اور گمان ہے۔ 4۔ 2 ایسا بخیل شخص حطمہ میں پھینک دیا جائے گا یہ بھی جہنم کا ایک نام ہے، توڑ پھوڑ دینے والی ہے۔

[4] ﴿لَيُنْبَذَنَّ﴾ ﴿نَبَذَ﴾ بمعنی کسی چیز کو ردی اور بے کار سمجھتے ہوئے پھینک دینا یا کسی چیز کی پروا نہ کرتے ہوئے اسے پس پشت ڈال دینا اور ﴿حُطَمَةَ﴾ سے مراد دوزخ ہے۔ ﴿حُطَمَ﴾ یعنی توڑنا مروڑنا اور حُطَام توڑی مروڑی ہوئی یا ریزہ ریزہ شدہ چیز کو کہتے ہیں اور یہ لفظ کسی کو روند کر ریزہ ریزہ کرنے کے لیے آتا ہے۔ مطلب یہ ہے کہ ان دولت کے نشہ میں بد مست لوگوں کو نہایت حقیر اور ذلیل سمجھ کر دوزخ میں پھینک دیا جائے گا۔

اس آیت کی تفسیر اگلی آیات کیساتھ ملاحظہ کریں۔

﴿كَلَّا لَیُنْۢبَذَنَّ﴾ یعنی اسے ضرور پھینکا جائے گا ﴿فِی الْحُطَمَةِٞۖ۰۰ وَمَاۤ اَدْرٰىكَ مَا الْحُطَمَةُ﴾ ”حُطَمَہ میں اور آپ سمجھے کہ حطمہ کیا ہے؟ ”یہ اس کی تعظیم اور اس کی ہولناکی کا بیان ہے، پھر اپنے اس ارشاد سے اس کی تفسیر فرمائی: ﴿نَارُ اللّٰهِ الْمُوْقَدَةُ﴾ ”وہ اللہ کی بھڑکائی ہوئی آگ ہے۔“ جس کا ایندھن لوگ اور پتھر ہوں گے ﴿الَّتِیْ﴾ جو اپنی شدت کے باعث ﴿تَ٘طَّ٘لِعُ عَلَى الْاَفْـِٕدَةِ﴾ جسموں کو چھیدتی ہوئی دلوں تک جا پہنچے گی۔