السنن المأثورة

➊ لوگوں کو جماعت کراتے ہوئے ہلکی اور کامل یعنی رکوع و سجود اطمینان سے لیکن قرأت کم چھوٹی سورتیں پڑھ کر جماعت کرائی جائے، اور جب آدمی اکیلا پڑھے تو جتنا مرضی لمبا قیام کرے آج کل کے ائمہ چونکہ آوازوں کے سُر لگانے پر ہی اپنی توجہ مرکوز رکھتے ہیں اس لیے لوگوں کو تو خوب لمبی نماز پڑھاتے ہیں تاکہ لوگ زیادہ سنیں اور جب اکیلے پڑھتے ہیں تو تلاوت قرآن کے سارے فضائل بھول کر سورہ اخلاص پر اکتفا کرتے ہیں جو کہ قابل ملامت ہے۔ سختی لوگوں پر نہیں اپنے ڈھانچے پر کریں بعض دفعہ لوگوں کی تربیت کی نسبت اپنی تربیت زیادہ ضروری ہوتی ہے۔
➋ ان احادیث سے امام بخاری رحمہ اللہ نے چند مسائل استنباط کیے ہیں جو کہ درج ذیل ہیں: (الف) امام کو چاہیے قیام ہلکا کرے لیکن رکوع و سجود میں اتمام ہو۔
(ب) استاد شاگردوں کی جب کوئی ناگوار بات دیکھے تو وعظ کرے۔
(ج) استاد تعلیم دیتے وقت شاگردوں پر خفا ہو سکتا ہے۔
(د) جب اکیلا نماز پڑھے تو قرآت و قیام طویل کر سکتا ہے۔
(ذ) امام سے طوالت کی شکایت کی جا سکتی ہے۔ کچھ تخفیف کریں بہت لمبی نماز پڑھاتے ہیں۔ یہ امام بخاری رحمہ اللہ کی فقاہت ہے جس کا مقابلہ فرضی مسائل سے نہیں کیا جا سکتا ہے۔
➌ رسول اللہ صلی اللہ علیہ وسلم کا غصہ اس بات کی دلیل ہے کہ اماموں کو مقتدیوں کا خیال رکھنا چاہیے رسول اللہ صلی اللہ علیہ وسلم دورانِ امامت عورتوں کا بھی خیال رکھتے بچہ روتا تو رسول اللہ صلی اللہ علیہ وسلم نماز ہلکی کر دیتے کہ اس کی ماں تکلیف محسوس نہ کرے۔ [البخاری: 708]

➊ دین میں آسانیاں ہیں گرمی کی شدت میں نماز ظہر کو تھوڑا مؤخر کر لینا چاہیے لیکن یہ نہ ہو کہ عصر کا وقت ہو جائے، سایہ ایک مثل ہونے سے پہلے پہلے پڑھ لینی چاہیے۔
➋ جہنم سے متعلقہ باتیں باطنی امور ہیں جن پر ایمان لانا لازم ہے۔
➌ ایک قول یہ ہے کہ جہنم اندر سانس کھینچتی ہے تو زمین سرد ہو جاتی ہے اور جب سانس باہر نکالتی ہے تو گرم ہو جاتی ہے یعنی جیسے جیسے اللہ کی زمین پر اس کی سانس پہنچتی ہے تبدیلی رونما ہوتی ہے۔ اللہ اور اس کے رسول صلی اللہ علیہ وسلم کی اخبار قطعی و حتمی ہیں جبکہ سائنس کے اندازے حتمی نہیں، ایک صدی کا سائنس دان ایک دعویٰ کرتا ہے تو اگلی صدی میں وہ نظریہ غلط ثابت ہو جاتا ہے۔
➍ یہ بھی ممکن ہے کہ جہنم کے بعض حصے انتہائی گرم اور بعض انتہائی سرد ہوں، وہاں سے سانس پہنچتی ہو۔ جہنم «اسفل السافلين» ہے، جیالوجی تسلیم کرتی ہے کہ زمین کے نیچے یا سمندر کے نیچے آگ ہے جہاں لوہا پانی بن جاتا ہے، مؤمن ایمان بالغیب کا پابند ہے، انسان کی عقل ناقص اور شریعت کامل ہے۔
➎ جس نے جہنم پیدا کی وہ زیادہ جانتا ہے کہ اس کی سانس کہاں اور کیسے اور کس طرح پہنچتی ہے۔ موجودہ دور کے بے عقل رویبضہ تجزیہ نگار کی شریعت فہمی کی ہمیں کوئی ضرورت نہیں جس کے نزدیک نیوز پیپر اصل اور قرآن و سنت اس کے تابع ہے، وہ امت کے مسائل کے کیا فیصلے کر پائے گا؟
➏ جنت و جہنم دونوں اللہ کی نعمتیں ہیں جن کا تعارف کتاب و سنت نے پیش کر کے ہم پر بہت بڑا احسان کیا ہے۔
➐ اس حدیث سے جہنم کا کلام کرنا بھی ثابت ہوتا ہے۔
➑ جہنم کی گرمی سے بچنے کے لیے ہر انسان کو ہر تدبیر کرنی چاہیے۔

➊ معلوم ہوا کہ اگر آگے کوئی لیٹا، بیٹھا یا کھڑا ہو تو اس کا حکم گزرنے والے کی طرح نہیں، جبکہ نماز کے آگے سے گزرنا سخت گناہ ہے۔ بعض نے کہا دو صفیں چھوڑ کر گزر سکتا ہے، منع متصل آگے سے گزرنا ہے یعنی جس جگہ نمازی نے سجدہ کرنا ہے کیونکہ نمازی ساری مسجد کا مالک نہیں بن گیا۔ یہ قول محل نظر ہے، بغیر رکاوٹ و سترہ کے گزرنے سے اجتناب ہی بہتر ہے۔ واللہ اعلم۔
➋ حجرہ عائشہ رضی اللہ عنہا تنگ تھا، سیدہ عائشہ رضی اللہ عنہا لیٹتیں تو ان کی ٹانگیں اس جگہ ہوتیں جہاں آپ صلی اللہ علیہ وسلم نے سجدہ کرنا ہوتا تو ہاتھ سے متنبہ کر دیتے کہ سجدہ کا وقت ہو گیا ہے ٹانگیں سمیٹ لو۔
➌ اس سے یہ بھی ثابت ہوا کہ عورت کو محض ہاتھ لگانے سے وضو یا نماز میں خلل نہیں پڑتا۔ ان دنوں غربت کے باعث گھروں میں چراغ نہیں تھے کہ روشنی ہوتی، سیدہ عائشہ رضی اللہ عنہا جان جاتیں اور خود ہی پاؤں سمیٹ لیتیں۔
➍ گھروں میں قیام اللیل اور نوافل کا اہتمام کرنا سنت رسول صلی اللہ علیہ وسلم ہے۔

➊ سیدنا ابن عباس رضی اللہ عنہ اور سیدنا فضل بن عباس رضی اللہ عنہ دونوں بھائی گدھی پر سوار ہو کر آئے۔ یہ واقعہ حجۃ الوداع کا ہے، صحیح بخاری و مسلم کی روایت میں ہے کہ آپ صلی اللہ علیہ وسلم منی میں نماز پڑھا رہے تھے جبکہ سنن نسائی میں ہے کہ عرفہ میں نماز پڑھا رہے تھے، یعنی یہ حجۃ الوداع میں ہوا۔ چونکہ سفر گدھی پر کر رہے تھے، منی سے عرفہ اور عرفہ سے منی بھی سواری پر ہی آئے ہوں گے، دونوں جگہ ایسے ہی کیا ہو گا؛ ایک میں ساتھ سیدنا فضل بن عباس رضی اللہ عنہ کا ذکر ہے ایک میں صرف اپنا ذکر کرتے ہیں۔
➋ امام مقتدیوں کا سترہ ہوتا ہے، بعض صف کے آگے سے گزرا جا سکتا ہے لیکن پوری صف کے آگے سے امام کو بھی منقطع کرتے ہوئے گزرنا اس حدیث سے ثابت نہیں ہوتا۔ عرب کے بدو پوری پوری صف کاٹ جاتے ہیں، جب ان کو روکا جائے تو یہ حدیث بطور دلیل پیش کرتے ہیں جبکہ یہ حدیث بعض صف کے کاٹنے پر دلالت کرتی ہے۔
➌ امام مقتدیوں کا سترہ ہے لہٰذا امام اور مقتدیوں کے درمیان سے نہیں گزر سکتا۔ بغیر سترے کے اگر نمازی کے سامنے سے یعنی سجدہ کی جگہ سے عورت، گدھا یا کالا کتا گزر جائے تو نماز ٹوٹ جاتی ہے۔
➍ گدھے پر سواری شرعاً جائز ہے۔
➎ نماز با جماعت کھڑی ہو تو بعد میں آنے والے نماز کے ساتھ شریک ہو جائیں گے۔
➏ نابالغ بچے کی بیان کردہ شرعی بات قابل حجت ہے۔

➊ اذان کا جواب دیتے ہوئے جیسے جیسے کلمات مؤذن کہتا ہے اسی طرح کہا جائے گا، البتہ «حي على الصلاة» اور «حي على الفلاح» کی جگہ «لا حول ولا قوة الا بالله» پڑھا جائے گا۔
➋ سیدنا معاویہ بن ابی سفیان رضی اللہ عنہ نے منبر پر بیٹھ کر اذان کا جواب دیا پھر خطبہ میں یہ حدیث بیان کی۔ امام بخاری رحمہ اللہ نے اس سے استدلال کیا ہے کہ منبر پر بیٹھ کر بھی اذان کا جواب دیا جا سکتا ہے۔
➌ مزید مسائل اور فوائد کے لیے دیکھئے [شرح حدیث نمبر: 39]

➊ امام اگر نماز میں بھول جائے مثلاً تشہد میں نہیں بیٹھنا تھا، بھول کر بیٹھ گیا وغیرہ تو مرد مقتدی «سبحان الله» کہے گا اور اگر مردوں میں سے کوئی بھی متنبہ نہیں ہوا تو عورت اپنی ہتھیلی دوسرے ہاتھ کی پشت پر مارے گی تاکہ امام کو پتا چلے کہ بھول گیا ہوں۔ ➋ اس حدیث کا پس منظر ہے جس کی تفصیل حدیث نمبر 130، 131 میں بیان ہوئی ہے۔
➌ اگر امام قراءت بھول جائے اور پیچھے مرد مقتدیوں میں سے کسی کو قرآن یاد نہ ہو لیکن عورت کو یاد ہو تو وہ بول کر لقمہ دے گی، بوقت ضرورت خاموش رہنا جائز نہیں۔ واللہ اعلم۔
➍ نسیان بنی آدم کی فطرت میں ہے لہٰذا یہ کوئی معیوب بات نہیں۔
➎ دوران نماز مقتدیوں کو یکسوئی کے ساتھ کھڑا ہونا چاہیے تاکہ امام کے بھول جانے پر اسے فوراً متنبہ کر سکیں۔
➏ عورت کو مردوں کی موجودگی میں حتی الوسع بولنے سے اجتناب کرنا چاہیے۔

➊ رعایا میں ناچاقی ہو جائے تو امام و حکمران کی ذمہ داری ہے کہ ان میں مفاہمت کا کردار ادا کرے۔
➋ راتب امام کی عدم موجودگی میں بھی نماز باجماعت وقت پر ادا ہونی چاہیے۔
➌ ان احادیث سے ثابت ہوا کہ رسول اللہ صلی اللہ علیہ وسلم کی غیر حاضری میں لوگ سیدنا ابوبکر رضی اللہ عنہ کو ہی امام تسلیم کرتے تھے، رسول اللہ صلی اللہ علیہ وسلم نے ایام مرض میں آپ رضی اللہ عنہ کو ہی امت کا امام مقرر فرمایا تھا۔ امت نے اس حکم کو آپ صلی اللہ علیہ وسلم کے بعد جاری رکھا۔
➍ ثابت ہوا کہ جہاں نبی صلی اللہ علیہ وسلم حاضر ہو جائیں وہاں امتی مصلیٰ پر کھڑا ہونے کی جرات نہیں کرتا۔
➎ مزید مسائل اور فوائد کے لیے دیکھیے شرح حدیث نمبر 129۔

➊ عورت کو تین طرح کے خون آتے ہیں۔
(الف) خونِ حیض: یہ خون شروع کے ایام میں سیاہی مائل اور آخری ایام میں زردی مائل ہو جاتا ہے اور بدبودار ہوتا ہے۔ عموماً عورتیں ہر ماہ چھ یا سات دن اس میں مبتلا رہتی ہیں، یہ بیماری نہیں بلکہ صحت مند جوان عورت کو یہ خون آتا ہے جو جوانی کی علامت ہے۔ جب یہ خون آئے تو عورت نماز اور روزہ نہیں کرے گی نہ ہی اس حالت میں اس سے خاوند ہمبستری کر سکتا ہے۔ عورت حالتِ حیض میں رہ جانے والی نمازوں کی قضا نہیں دے گی لیکن حیض میں چھوڑے گئے روزوں کی قضا دے گی۔
(ب) خونِ نفاس: یہ بچے کی ولادت کے بعد آتا ہے، زیادہ سے زیادہ چالیس دن رہتا ہے، کم کی مقدار نہیں کسی وقت بھی ختم ہو سکتا ہے۔ اس کا حکم حیض کا حکم ہے کیونکہ یہ اصل میں حیض کا ہی خون ہوتا ہے۔ عورت حاملہ ہوتی ہے تو حیض آنا بند ہو جاتا ہے اور بچے کی غذا اسی خون سے ہوتی ہے۔ نو ماہ کے بعد جب یہ خون دوبارہ باہر آنا شروع ہوتا ہے تو چند دن قطروں کی شکل میں نکلتا رہتا ہے جو بعض دفعہ چالیس دن تک پہنچ جاتا ہے۔ اگر اس سے زیادہ دن آئے تو دمِ استحاضہ شمار ہو گا اور نماز روزہ شروع کر دیا جائے گا، لیکن ضروری نہیں کہ چالیس دن ہی رہے، ایک ہفتہ سے کم بھی ہو سکتا ہے۔ اگر پہلے ختم ہو گیا تو عورت نماز روزہ کرے، خاوند ہمبستری بھی کر سکتا ہے کیونکہ خون ختم ہو چکا ہے۔
(ج) دمِ استحاضہ: یہ عام خون کی طرح سرخ ہی رہتا ہے، اس کا رنگ تبدیل نہیں ہوتا۔ یہ بیماری کا خون ہے جو کسی رگ کے پھٹنے سے آنا شروع ہوتا ہے؛ یہی وہ خون ہے جو دوسرے خون میں مداخلت کر کے عورت کے ایام کو خلط ملط کر دیتا ہے اور دیندار عورت پریشان ہو جاتی ہے کہ نماز پڑھوں یا نہ پڑھوں، پاک ہوئی یا نہیں۔ اس کا ذکر احادیث میں ہے۔ اس کی موجودگی نماز، روزے اور جماع میں مانع نہیں، عورت پاک ہے۔ یہ عورت روزے بھی رکھے گی اور نماز بھی پڑھے گی لیکن ہر نماز کے لیے تازہ وضو کر کے فرض و سنن نوافل ادا کرے گی، اگلی فرضی نماز کے لیے پھر تازہ وضو کرے گی۔
➋ استحاضہ والی عورت پر ہر نماز کے لیے غسل واجب نہیں بلکہ کسی بھی نماز کے لیے غسل واجب نہیں۔ متعدد رواۃِ حدیث کا کہنا ہے کہ سیدہ حمنہ بنت جحش رضی اللہ عنہا خود ایسا کرتی تھیں، نبی صلی اللہ علیہ وسلم نے حکم نہیں دیا تھا کیونکہ سیدہ فاطمہ بنت ابی حبیش رضی اللہ عنہا کو بھی یہ بیماری تھی، ان کو بھی حکم نہیں دیا کہ ہر نماز کے لیے غسل کرو اور نہ ہی وہ غسل کرتی تھیں۔ بلکہ اسے فرمایا: «تَوَضَّئِي لِكُلِّ صَلَاةٍ» (ہر نماز کے لیے تازہ وضو کر لے)۔ [صحیح بخاری: 228]
➌ مفتی اعظم سعودی عرب شیخ ابن باز رحمہ اللہ کا موقف ہے کہ استحاضہ والی عورت کے لیے غسل کرنا واجب نہیں بلکہ مستحب ہے کیونکہ رسول اللہ صلی اللہ علیہ وسلم نے سیدہ حمنہ رضی اللہ عنہا کو اس کی وصیت فرمائی اور مشقت سے بچنے کے لیے افضل ہے کہ دن میں تین بار غسل کرے؛ نمازِ فجر کے لیے ایک غسل، ظہر و عصر کے لیے ایک غسل، اور مغرب و عشاء کے لیے ایک غسل۔
➍ حیض اور استحاضہ میں مندرجہ ذیل طریقوں سے فرق معلوم ہو سکتا ہے۔ اس کی ضرورت اس وقت پیش آتی ہے جب خون بند ہی نہ ہو یا مخصوص ایام کے علاوہ خون آجائے یا عادت خراب ہو جائے تو پہچان اس طرح ہو گی: (الف) عادت کے ذریعے: کہ ہر ماہ کتنے دن بعد حیض کا خون آتا تھا اور کتنے دن رہتا تھا، اتنے دن ہی شمار کر کے نماز چھوڑے گی، اس سے زائد ایام استحاضہ کے شمار ہوں گے۔
(ب) اگر عادت خراب ہو گئی ہو تو خون کو رنگ بو وغیرہ سے پہچان لیا جائے کیونکہ خونِ حیض گاڑھا، سیاہی مائل اور ختم کے قریب زردی مائل ہو جاتا ہے اور بدبودار ہوتا ہے۔ جبکہ استحاضہ پتلا، بسا اوقات قلیل مقدار میں ہوتا ہے اور اس کا رنگ سرخ ہی رہتا ہے، تبدیل نہیں ہوتا۔
(ج) اگر اس سے بھی تمیز نہیں ہو رہی تو سوچ و بچار کے بعد غالب گمان پر عمل کرے، کسی سمجھدار عورت سے مشورہ کرے یا چیک کروا لے۔
(د) اگر ایسا بھی ممکن نہیں تو اپنی ہم عمر اور جسمانی طور پر ملتی جلتی خاندان کی عورت کی عادت پر قیاس کر کے عمل کرے۔
➎ حیض کی حالت میں جماع کرنا گناہ ہے، اللہ تعالیٰ کا فرمان ہے: ﴿وَيَسْأَلُونَكَ عَنِ الْمَحِيضِ قُلْ هُوَ أَذًى فَاعْتَزِلُوا النِّسَاءَ فِي الْمَحِيضِ وَلَا تَقْرَبُوهُنَّ حَتَّى يَطْهُرْنَ فَإِذَا تَطَهَّرْنَ فَأْتُوهُنَّ مِنْ حَيْثُ أَمَرَكُمُ اللهُ إِنَّ اللهَ يُحِبُّ التَّوَّابِينَ وَيُحِبُّ الْمُتَطَهِّرِينَ﴾ [البقرة: 222]
"اور اے نبی! لوگ آپ سے حیض کے بارے میں سوال کرتے ہیں۔ کہہ دیجیے: وہ تو گندگی ہے۔ تم حیض کی حالت میں عورتوں سے الگ رہو اور ان سے ہم بستری نہ کرو یہاں تک کہ وہ پاک ہو جائیں، پھر جب وہ پاک ہو جائیں تو ان کے پاس جاؤ جہاں سے اللہ نے تمھیں حکم دیا ہے، بے شک اللہ توبہ کرنے والوں کو پسند کرتا ہے اور پاک صاف رہنے والوں کو پسند کرتا ہے۔"
➏ حالتِ حیض میں ایک عورت کے ساتھ خاوند کے لیے جماع کے علاوہ سب کچھ جائز ہے۔
➐ جو شخص حالتِ حیض میں بیوی کے پاس جائے وہ ایک دینار یا نصف دینار صدقہ کرے۔ ایک دینار یا نصف دینار صدقہ کرنے کا شریعت کی طرف سے اختیار ہے۔ دینار سے مراد کویتی کرنسی نہیں بلکہ عہدِ نبوی کا دینار ہے جو کہ 4 گرام 374 ملی گرام سونے کا تھا۔