السنن المأثورة

➊ اس حدیث مبارکہ میں نفلی نماز کا ذکر ہے یعنی غزوہ بنی انمار کے سفر میں آپ صلی اللہ علیہ وسلم سواری پر نماز پڑھ رہے تھے جبکہ آپ صلی اللہ علیہ وسلم کا چہرہ مبارک قبلہ کی جانب نہیں تھا کیونکہ نفلی نماز میں نماز شروع کرتے ہوئے قبلہ رخ ہو کر شروع کرنا ضروری ہے پھر جدھر بھی سواری کا رخ ہو، کوئی حرج نہیں۔
➋ سواری پر نفلی نماز ادا کرنا درست ہے۔

➊ عام نفلی نمازوں کی طرح وتر بھی سواری پر پڑھنا درست ہے۔
➋ نماز وتر فرض یا واجب نہیں ہے۔
➌ بعض لوگ جو وتر کو فرض یا واجب سمجھتے ہیں یہ حدیث ان کے خلاف دلیل ہے۔
➍ نماز وتر کا وقت طلوع فجر سے پہلے تک ہے۔

➊ یہ روایت سیدنا انس رضی اللہ عنہ سے بھی منقول ہے کہ آپ صلی اللہ علیہ وسلم خیبر کے سفر میں گدھے پر نفل پڑھ رہے تھے۔ [سنن نسائی: 741]
➋ گدھے کا گوشت حرام ہے اس پر سواری جائز ہے معلوم ہوا کسی جانور کے حرام ہونے سے یہ لازم نہیں آتا کہ وہ پلید و ناپاک بھی ہے۔ لہذا اگر ظاہری گندگی نہیں لگی تو نماز نفل پڑھی جا سکتی ہے جیسا کہ احادیث سے صاف ظاہر ہے اور عقل شریعت کے تابع ہے نہ کہ شریعت عقل کے۔
➌ معلوم ہوا رسول اللہ صلی اللہ علیہ وسلم دوران سفر بھی عبادت میں مشغول رہتے اللہ ہمیں بھی توفیق دے۔ آمین!

➊ سیدنا عبداللہ بن عمر رضی اللہ عنہما سنت پر عمل کرنے میں بہت حریص تھے، حتی کہ سفر حج میں اُن کی کوشش ہوتی کہ اسی گھاٹی، وادی، اور راستے سے گزریں جہاں سے رسول اللہ صلی اللہ علیہ وسلم گزرتے تھے، سیدنا عبداللہ بن عمر رضی اللہ عنہما کے بیٹے نے ایک دفعہ حدیث رسول صلی اللہ علیہ وسلم کی مخالفت کی تو اس وجہ سے امام مجاہد رحمہ اللہ بیان کرتے ہیں: «فما كلمه عبد الله حتى مات» پھر عبداللہ بن عمر رضی اللہ عنہما نے وفات تک اپنے بیٹے سے بات چیت نہیں کی تھی۔ [مسند احمد: 4933]

➊ جس طرح نماز فرض ہے اسی طرح نماز با جماعت بھی فرض ہے، ارشاد باری تعالیٰ ہے: ﴿أَقِيمُوا الصَّلوةَ وَأَتُوا الزَّكوة وَارْكَعُوا مَعَ الركعِينَ﴾ [البقرہ: 43]
اور نماز قائم کرو اور زکاۃ ادا کرو اور رکوع کرنے والوں کے ساتھ رکوع کرو۔
➋ اسلام میں اجتماعیت پر زیادہ زور دیا گیا ہے، کیونکہ اجتماعیت سے آپس میں محبت اور جذبہ عمل بڑھتا ہے اکیلا آدمی سست بن جاتا ہے ایک روایت میں ستائیس اور دوسری میں چھبیس کا ذکر ہے اس کی مختلف توجیہات بیان ہوئی ہیں۔ مثلاً
(الف) اس سے مراد کثرت ثواب ہے نہ کہ مخصوص عدد جیسے کہتے ہیں میں نے تمہیں 100 دفعہ کہا ہے مراد کثرت ہوتی ہے اگر چہ سو دفعہ نہ کہا ہو۔
(ب) بعض اہل علم کا کہنا ہے کہ جہری نمازیں ستائیس گنا اور سری نمازیں چھبیس گنا زیادہ ثواب کی حامل ہیں۔
(ت) خشوع و خضوع کے اعتبار سے ثواب بڑھتا اور کم ہوتا ہے۔

➊ سیدنا ابو ہریرہ رضی اللہ عنہ 7 ہجری کو اسلام لائے پھر مدینہ آئے تو پتہ چلا رسول اللہ صلی اللہ علیہ وسلم خیبر کے لیے نکل چکے ہیں تو سیدنا ابو ہریرہ رضی اللہ عنہ بھی آپ صلی اللہ علیہ وسلم کے پیچھے خیبر چلے گئے جب خیبر پہنچے تو خیبر فتح ہو چکا تھا، ان کو بھی مال غنیمت سے حصہ ملا، علم پر بہت حریص تھے چند سال رسول اللہ صلی اللہ علیہ وسلم کی صحبت نصیب ہوئی لیکن سب صحابہ کرام رضی اللہ عنہم سے حفظ حدیث میں سبقت لے گئے آپ کی روایات کی تعداد پانچ ہزار تین سو چوہتر (5374) ہے، امام نووی رحمہ اللہ فرماتے ہیں: سیدنا ابو ہریرہ رضی اللہ عنہ کی ایک بڑی منقبت یہ بھی ہے کہ صحابہ کرام رضی اللہ عنہم میں سے انہوں نے سب سے زیادہ رسول اللہ صلی اللہ علیہ وسلم سے حدیثیں بیان کی ہیں۔ ان کے حافظے کے لیے رسول اللہ صلی اللہ علیہ وسلم نے خاص دعا فرمائی تھی۔ [شرح النووی: 67/1]
➋ سیدنا ابو ہریرہ رضی اللہ عنہ کہتے ہیں مجھ سے زیادہ کسی صحابی کے پاس رسول اللہ صلی اللہ علیہ وسلم کی احادیث نہیں سوائے عبداللہ بن عمرو رضی اللہ عنہما کے، کیونکہ وہ لکھا کرتے تھے اور میں لکھتا نہیں تھا۔ [صحیح بخاری: 113]
➌ حدیث میں ناپ تول کا بھی بیان ہے کم تولنا بہت بڑا گناہ ہے۔ قوم شعیب علیہ السلام اس گناہ کے سبب ہلاک ہوئی، عصر حاضر میں مسلم دکاندار کس قدر دھوکے کا شکار ہیں۔
➍ ناپ تول میں کمی کرنے والوں کو رسول اللہ صلی اللہ علیہ وسلم نے قحط سالی، مشکلات اور ظالم حکمرانوں کے تسلط کی وعید سنائی ہے۔ [سنن ابن ماجہ: 4019]

➊ رسول اللہ صلی اللہ علیہ وسلم نماز تہجد میں لمبا قیام فرماتے تھے۔
➋ اللہ تعالیٰ نے آپ صلی اللہ علیہ وسلم کو گناہوں اور غلطیوں سے پاک کر دیا ہے۔
➌ انسان پر جس قدر اللہ رب العزت کی نوازشیں اور عنایتیں ہوں اس کو اسی قدر شکر گزار بن کر زندگی گزارنی چاہیے۔ ہمارے ہاں لوگوں کا معاملہ بالکل مختلف ہے جس کے پاس جتنا زیادہ ہے وہ اتنا ہی شریعت سے دور اور عبادات سے بعید ہے۔ «اعاذنا الله منه!»
➍ رسول اللہ صلی اللہ علیہ وسلم اطمینان، سکون، خشوع و خضوع اور ترتیل سے قرآن کی تلاوت فرماتے تھے، عبادت چاہے دو ہی رکعت ہو آرام آرام سے کرنی چاہیے، جو ایک رات میں کئی سو یا ہزار نوافل پڑھ کر خوش ہوتے ہیں نہ رکوع میں اطمینان نہ سجدے میں بلکہ کوے کی طرح ٹھونگے مارتے ہیں ایسی نماز کا کوئی فائدہ نہیں فرشتے منہ پر مار دیتے ہیں کہ اللہ تعالیٰ کو بغیر سنت عمل کے پڑھی نمازیں نہیں چاہئیں ایک آدمی کو صحابی رسول سیدنا حذیفہ رضی اللہ عنہ نے ایسی نماز پڑھتے دیکھا جس میں رکوع و سجود مکمل نہ تھے تو فرمایا: تو نے نماز نہیں پڑھی اگر ایسی نمازیں پڑھتے مر گیا تو تیری موت محمد صلی اللہ علیہ وسلم کے طریقے پر نہیں ہوگی۔ [صحیح بخاری: 389]
بلکہ رسول اللہ صلی اللہ علیہ وسلم نے «مسيء الصلاة» والی حدیث میں ایسی تیز نماز پڑھنے پر فرمایا: «ارجع فصل فإنك لم تصل» جاؤ واپس پھر پڑھو تم نے نماز نہیں پڑھی۔ [صحیح بخاری: 757]

➊ نماز مغرب میں قراءت بالجہر ہے۔
➋ کبھی کبھار مغرب کی نماز میں لمبی سورتوں کی تلاوت بھی کر لینی چاہیے ہمارے یہاں یہ سنت مجموعی طور پر متروک ہو چکی ہے۔

➊ نماز مغرب میں قراءت بالجہر ہے۔
➋ کبھی کبھار مغرب کی نماز میں لمبی سورتوں کی تلاوت بھی کر لینی چاہیے ہمارے یہاں یہ سنت مجموعی طور پر متروک ہو چکی ہے۔

➊ صحابہ کرام رضی اللہ عنہم کو رسول اللہ صلی اللہ علیہ وسلم کی سنتوں سے والہانہ لگاؤ تھا، مرد و زن نے امور شرع کو محفوظ کرنے میں یکساں محنت کی۔
➋ سنت رسول صلی اللہ علیہ وسلم پر عمل کرنے والے بچوں کی بڑوں کو حوصلہ افزائی کرنی چاہیے۔
➌ ام فضل رضی اللہ عنہا ام المومنین سیدہ میمونہ بنت حارث رضی اللہ عنہا کی ہمشیرہ اور سیدنا ابن عباس رضی اللہ عنہما کی والدہ ماجدہ ہیں۔

➊ نماز عشاء میں قرآت جہری ہے۔
➋ سورۃ التین کی نماز عشاء میں تلاوت مسنون ہے۔

➊ گزشتہ احادیث میں رسول اللہ صلی اللہ علیہ وسلم کا مختلف نمازوں میں مختلف سورتیں قراءت کرنے کا بیان ہے، نماز مغرب میں سورۃ الطور اور المرسلات کی تلاوت بھی رسول اللہ صلی اللہ علیہ وسلم نے کی جبکہ آج کل اتنی لمبی سورتیں نماز فجر میں پڑھی جاتی ہیں، کیونکہ اکثر لوگ سمجھتے ہیں کہ شاید مغرب کا وقت بہت کم ہے صرف سورۃ الکوثر، الفلق، الناس کی ہی گنجائش ہے جبکہ ایسا نہیں کبھی کبھار لوگوں کی ذہن سازی کر کے نماز مغرب میں سورۃ الطور یا المرسلات بھی پڑھ لینی چاہیے۔
➋ رسول اللہ صلی اللہ علیہ وسلم نے عشاء میں ﴿وَالتِّينِ﴾ کی بھی تلاوت کی حالانکہ عشاء کا وقت رات کے آخری پہر تک ہے تو حالات کے پیش نظر تلاوت کم زیادہ کی جا سکتی ہے جیسا کہ رسول اللہ صلی اللہ علیہ وسلم نے نماز فجر میں معوذتین بھی پڑھیں اور سورۃ الزلزال بھی بیان جواز کے لیے پڑھی۔
ان دلائل سے یہ بات واضح ہوتی ہے کہ مختلف نمازوں میں چھوٹی، بڑی سورتوں کی تلاوت کی جا سکتی ہے البتہ نماز فجر میں ساٹھ سے سو آیات کی کم از کم تلاوت ہونی چاہیے۔ [صحیح بخاری: 547، صحیح مسلم: 461]

➊ عیدین کی نمازوں میں قرآۃ بالجہر ہے۔
➋ نماز جمعہ اور نماز عیدین کی پہلی رکعت میں سورۃ الاعلیٰ اور دوسری رکعت میں سورۃ الغاشیہ کی تلاوت بھی مسنون ہے۔ اگر بروز جمعہ عید ہو تو نماز جمعہ اور نماز عید دونوں میں ان سورتوں کی تلاوت کرنی چاہیے۔ [صحیح مسلم: 878]

➊ سیدنا عبد اللہ بن مسعود رضی اللہ عنہ کا خیال یہ تھا کہ معوذتین کا نزول محض دم کے لیے ہوا ہے یہ دعائیہ کلمات ہیں جبکہ دیگر صحابہ کرام رضی اللہ عنہم نے ان کو مستقل قرآنی سورتیں شمار کیا ہے اور یہی بات صحیح اور راجح ہے کہ یہ قرآنی سورتیں ہیں۔
➋ عہد صحابہ میں عام لوگ اپنے اشکال دور کرنے کے لیے مختلف اہل علم اصحاب رسول صلی اللہ علیہ وسلم کی طرف رجوع کرتے تھے۔
➌ سیدنا عقبہ بن عامر رضی اللہ عنہ کہتے ہیں رسول اللہ صلی اللہ علیہ وسلم نے ہمیں معوذتین کے ساتھ نماز فجر کی امامت کرائی۔ اس حدیث سے بھی یہی بات ثابت ہوتی ہے یہ دونوں سورتیں قرآن کا حصہ ہیں، ممکن ہے سیدنا عبد اللہ بن مسعود رضی اللہ عنہ کو یہ بات نہ پہنچی ہو۔ [سنن ابی داؤد: 1462]

➊ سیدنا ابن عباس رضی اللہ عنہما نے بیان کیا ایک آدمی نبی اکرم صلی اللہ علیہ وسلم کے پاس آیا تو اس نے کہا: اے اللہ کے رسول! رات میں نے خواب میں خود کو ایک درخت کے پیچھے نماز پڑھتے دیکھا، میں نے نماز میں سجدہ تلاوت کیا تو درخت نے بھی میرے ساتھ سجدہ کیا اور میں نے اسے پڑھتے سنا: ﴿اللهم اكتب لى بها عندك اجراً وضع عنى بها وزراً واجعلها لي عندك ذخرا و تقبلها منى كما تقبلتها من عبدك داؤد﴾ سیدنا ابن عباس رضی اللہ عنہما کہتے ہیں بعد ازاں نبی اکرم صلی اللہ علیہ وسلم نے بھی سجدہ تلاوت میں اس دعا کو پڑھا۔ [سنن ترمذی: 3424]
➋ سجدہ تلاوت مسنون ہے۔
➌ سجدہ تلاوت کا حکم تلاوت قرآن کا حکم ہے۔

➊ سجدہ تلاوت فرض یا واجب نہیں ہے۔
➋ سجدہ تلاوت کا حکم تلاوت قرآن کا ہے۔ جو چیزیں تلاوت قرآن کے لیے ضروری ہیں وہی سجدہ تلاوت کے لیے ضروری ہیں۔

➊ جیسے شیطان سجدہ نہ کر کے مشہور ہوا، یہ مکہ کا واقعہ ہے تمام کافر بھی سجدہ میں پڑ گئے تھے سوائے ایک دو کے جو کہ امیہ بن خلف، عتبہ بن ربیعہ یا ولید بن مغیرہ تھے جو کفر کی حالت میں ہی مرے۔
➋ سیدنا ابن مسعود رضی اللہ عنہ نے ایک آدمی کا ذکر کیا ہے جبکہ سیدنا ابو ہریرہ رضی اللہ عنہ نے دو آدمیوں کا، ہر ایک نے اپنے علم کے مطابق بیان کر دیا کوئی تعارض نہیں۔

➊ سورہ انشقاق میں سجدہ تلاوت مسنون ہے۔
➋ سیدنا ابو ہریرہ رضی اللہ عنہ یہ کمال درجہ کے متبع سنت تھے۔
➌ اگر کوئی عالم معمول سے ہٹ کر عمل کرے تو اس سے دلیل کا مطالبہ کرنا درست ہے۔
➍ کسی بھی عمل کے مشروع ہونے کے لیے کتاب و سنت سے دلیل کا ہونا ضروری ہے۔
➎ سجدہ تلاوت سے متعلقہ مزید مسائل کے لیے دیکھئے شرح حدیث نمبر 94۔

➊ ارشاد باری تعالیٰ ہے: ﴿إِنَّ اللهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾ [الاحزاب: 56]
"بے شک اللہ اور اس کے فرشتے نبی پر صلوۃ بھیجتے ہیں، اے لوگو جو ایمان لائے ہو! اس پر صلوٰۃ بھیجو اور سلام بھیجو، خوب سلام بھیجنا۔"
اس آیت مبارکہ کے نزول کے بعد صحابہ رضی اللہ عنہم نے سوال کیا کہ سلام تو ہمیں پتہ چل گیا جو کہ تشہد میں ہے السلام علیک ایھا النبی ورحمۃ اللہ وبرکاتہ درود کیسے بھیجیں؟ تو آپ صلی اللہ علیہ وسلم نے «اللهم صل على محمد... الخ» ، درود ابراہیمی سکھایا۔
➋ سیدنا عبد اللہ بن مسعود رضی اللہ عنہ فرماتے ہیں کہ جب تک آپ صلی اللہ علیہ وسلم بقید حیات تھے صحابہ رضی اللہ عنہم خطاب کے صیغے ﴿أيها النبي﴾ سے سلام کہتے اور آپ صلی اللہ علیہ وسلم کی وفات کے بعد «السلام على النبى صلى الله عليه وسلم» کہنے لگے یعنی لفظ «يا» کے بغیر کہتے تھے۔ [صحیح بخاری: 6265]
معلوم ہوا نماز کے علاوہ خطاب کے صیغہ کے بغیر «السلام على رسول الله» کہا جا سکتا ہے۔
➌ درود جو آپ صلی اللہ علیہ وسلم نے صحابہ رضی اللہ عنہم کو سکھایا وہ درود ابراہیمی ہے جو کہ مختلف الفاظ سے وارد ہوا ہے جبکہ سب الفاظ میں ابراہیم علیہ السلام کا تذکرہ موجود ہے نماز میں درود ابراہیمی کے علاوہ کوئی اور خود ساختہ درود پڑھنا بالکل جائز نہیں اصلی درود وہ ہے جو رسول اللہ صلی اللہ علیہ وسلم نے سکھایا اور جعلی وہ ہے جو مولویوں نے خود گھڑ لیے مولوی تاج نے درود تاج بنا لیا نگینہ بی بی نے درود نگینہ گھڑ لیا امت محمدیہ رسول اللہ صلی اللہ علیہ وسلم کی پابند ہے نہ کہ مولوی تاج کی لہذا ایسے من گھڑت درود بالکل نہیں پڑھنے چاہئیں رسول اللہ صلی اللہ علیہ وسلم کے بتائے ہوئے الفاظ سے لوگوں کو پھیرنے کے لیے یہ گھڑے گئے ہیں تمام مسلمانوں کو ایسی سازشوں سے ہوشیار رہنا چاہیے۔
➍ صحابہ رضی اللہ عنہم کو مسئلہ کا پتہ نہ ہوتا تو رسول اللہ صلی اللہ علیہ وسلم سے پوچھ لیا کرتے تھے اپنی طرف سے شریعت سازی نہ کیا کرتے تھے۔ اگر آج بھی مسئلہ پتہ نہ ہو تو حدیث سے پوچھ لینا چاہیے اپنی طرف سے شریعت سازی نہیں کرنی چاہیے اور جو حدیث کم عقلی کے باعث سمجھ نہ آئے علماء سے سمجھ لینی چاہیے۔ ارشاد باری تعالیٰ ہے: ﴿فَسْــٴَـلُـوْۤا اَهْلَ الذِّكْرِ اِنْ كُنْتُمْ لَا تَعْلَمُوْنَ﴾ [النحل: 43]
"اور اہل ذکر سے پوچھ لو اگر تم نہیں جانتے ہو۔"

➊ قرآن کو عرب کے لہجے میں پڑھنا چاہیے صحیح البخاری وغیرہ کی روایت میں ہے کہ سیدنا عمر رضی اللہ عنہ ہشام رضی اللہ عنہ کی گردن میں چادر ڈال کر رسول اللہ صلی اللہ علیہ وسلم کے پاس لے آئے کہ یہ سنت کے خلاف پڑھتے ہیں سیدنا عمر رضی اللہ عنہ آج کا پنجابی لہجہ دیکھ لیتے تو یقیناً اس سے متعلق سخت سے سخت رد عمل دیتے۔
➋ قرآن سات حروف میں نازل ہوا اس بارے میں ابن العربی رحمہ اللہ نے پینتیس اقوال نقل کیے ہیں اصح ترین بات یہی لگتی ہے کہ مختلف لہجے مراد ہیں عرب میں بعض حروف کے مختلف قبائل میں مختلف لہجے تھے آسانی کی خاطر اللہ تعالیٰ نے عرب کے مختلف لہجوں کی اجازت عنایت فرمائی مثلاً ایک قبیلہ ﴿بَاعِدْ بَيْنَ أَسْفَارِنَا﴾ اور دوسرا ﴿بَعِدْ بَيْنَ أَسْفَارِنَا﴾ پڑھتا ہے۔
➌ بعض نے مختلف قراتوں کو سات حروف سے تعبیر کیا ہے۔ سات حروف سے ہر صحابی رضی اللہ عنہ بھی علیحدہ علیحدہ واقف نہیں تھا اسی لیے سیدنا عمر رضی اللہ عنہ نے سیدنا ہشام رضی اللہ عنہ کو پکڑ لیا۔ اس لیے سات حروف کی تفصیل حتمی طور پر معلوم نہیں ہو سکی سیدنا عثمان رضی اللہ عنہ نے سیدنا زید رضی اللہ عنہ کی سربراہی میں قرآن جمع کر دیا اور کہا جس لفظ کی قرآت میں اختلاف ہو جائے قریش کے لہجے میں لکھ دیں پھر بقیہ قراءات والے نسخہ جات ختم کرا دیے۔ [صحيح بخاري: 4987]
➍ سیدنا عثمان رضی اللہ عنہ کا یہ انتہائی اچھا اقدام تھا وگرنہ عجمی جو کہ پہلے ہی مفتون قوم ہے ہر فتنے کو اپنی دہلیز پر دعوت دینے سے گریزاں نہ ہیں یہ سات قرآن بنا لیتے۔

➊ رسول اللہ صلی اللہ علیہ وسلم عام فہم اور معاشرے کے حالات کے مطابق مثال دے کر بات سمجھایا کرتے تھے، اونٹ کو اگر کھول دیا جائے تو گم ہو جاتا ہے دور نکل جاتا ہے مالک کو بسا اوقات تلاش بسیار کے بعد مل جاتا ہے اور کبھی نہیں ملتا ہے ایسے ہی حافظ قرآن اگر قرآن کی مشق نہ کرے تو بھول جاتا ہے ساری محنت ضائع ہو جاتی ہے کبھی جہد مسلسل سے دوبارہ یاد کر پاتا اور کبھی نام کا حافظ رہ جاتا ہے۔ «والله المستعان!»
➋ اللہ رب العزت نے جس انسان کو حفظ القرآن کی نعمت سے نوازا ہو اسے اس کی قدر کرنی چاہیے۔

➊ پختہ قسم کھانے پر پوری کرنی واجب ہو جاتی ہے اگر قسم حلال کام پر کھائی جائے تو پوری کرے وگرنہ اس کا کفارہ ادا کرنا ہوتا ہے۔
➋ قسم کا کفارہ اوسط درجے کا دس مساکین کو کھانا کھلانا یا دس مساکین کو کپڑے ہدیہ کرنا، یا غلام آزاد کرنا ہوتا ہے جسے مذکورہ استطاعت نہ ہو وہ تین دن کے روزے رکھے گا۔ [المائدہ: 89]
➌ اگر قسم کھاتے وقت ان شاء اللہ کہہ دے تو حانث نہیں ہو گا۔ (حانث قسم توڑنے والے کو کہتے ہیں) کیونکہ اس نے ان شاء اللہ کہہ کر قسم پورا کرنے سے استثناء حاصل کر لیا ہے۔
➍ ایک حدیث میں ہے: «من حلف على يمين فقال إن شاء الله فهو بالخيار إن شاء أمضى وإن شاء ترك»
"جس نے ان شاء اللہ کہہ کر قسم کھائی اسے اختیار ہے پورا کرے یا قسم توڑ دے (اس پر کوئی کفارہ نہیں)۔" [سنن نسائي، رقم الحديث: 3820، وقال الالباني: صحيح]
➎ یہ اس صورت میں ہے جب ظاہراً ان شاء اللہ الفاظ کے ساتھ کہے اگر دل میں کہتا ہے تو اس کا اعتبار نہیں کیونکہ قسم ظاہری الفاظ سے منعقد ہوتی ہے حکم بھی ظاہر پر لگتا ہے لفظ ان شاء اللہ سے معلوم ہوتا ہے کہ قسم حتمی نہیں اگر پوری کر سکا تو ٹھیک وگرنہ اللہ نے یہی چاہا تھا اس لیے پورا کرنا ضروری نہیں۔
➏ اگر پہلے سے ہی قسم توڑنے کا ارادہ ہے مخالف کو دھوکا دینے کے لیے ان شاء اللہ کو بطور ڈھال استعمال کرتا ہے تو یہ بڑا گناہ ہے۔
➐ قسم صرف اللہ کے نام وصفات کی کھائی جا سکتی ہے قرآن کی قسم جائز ہے کیونکہ قرآن اللہ تعالیٰ کا کلام ہے جو کہ اللہ کی صفت ہے۔ مخلوق کی قسم کھانا شرک ہے سیدنا ابن عمر رضی اللہ عنہما نے ایک آدمی کو کعبہ کی قسم کھاتے سنا تو اس کو مخاطب کر کے کہا: میں نے رسول اللہ صلی اللہ علیہ وسلم کو بیان کرتے سنا ہے: جس نے غیر اللہ کی قسم کھائی اس نے شرک کیا۔ [سنن ابي داؤد، رقم الحديث: 3251، وقال الالباني صحيح سنن ترمذي، رقم الحديث: 1535، وقال حسن]

➊ بچے کی بھی کنیت رکھی جا سکتی ہے۔
➋ رسول اللہ صلی اللہ علیہ وسلم بچوں سے بھی گھل مل جاتے تھے۔
➌ ابو عمیر رضی اللہ عنہ بچپن میں ہی فوت ہو گیا جب سیدنا ابو طلحہ رضی اللہ عنہ سفر پر تھے واپس آئے پہلے سیدہ ام سلیم رضی اللہ عنہا نے کھانا پیش کیا سیدنا ابو طلحہ رضی اللہ عنہ نے کھانا کھایا ام سلیم رضی اللہ عنہا سے ہم بستری کی اس کے بعد سیدہ ام سلیم رضی اللہ عنہا نے بتایا کہ ابو عمیر رضی اللہ عنہ فوت ہو گیا تھا اسے دفن فرمائیں اس صبر و شکر کی تاریخی مثال پیش کرنے سے قاصر ہے اسی کی برکت سے اس رات سیدہ ام سلیم رضی اللہ عنہا کو حمل ٹھہر گیا تو اللہ تعالیٰ نے ایک اور بچہ عطا فرما دیا۔ [صحیح بخاری، رقم الحدیث: 5470,1301، صحیح مسلم، رقم الحديث: 2144]

➊ اگر کوئی شخص چیز ادھار بغرض استعمال لیتا ہے تو اس کی حفاظت کا ذمہ دار ہے ضائع کرنے کی صورت میں چٹی ادا کرنی ہوگی۔
➋ سنن الکبریٰ بیہقی میں اس حدیث کو باب العاریہ مضمونہ کے تحت لایا گیا ہے۔ ایک حدیث غزوہ حنین سے متعلق بھی آئی ہے کہ رسول اللہ صلی اللہ علیہ وسلم نے صفوان بن امیہ رضی اللہ عنہ سے جنگی سامان ادھار لیا تھا واپسی کے وقت کچھ گم ہو گیا تو اس سے پوچھا: اگر آپ چاہیں تو ہم چٹی ادا کر دیں۔ انہوں نے چٹی لینے سے انکار کر دیا۔ جس سے ثابت ہوتا ہے کہ ضائع کرنے والا ذمہ دار ہے۔ [ابوداؤد: 3563]

➊ ان احادیث سے مراد یہ ہے کہ اگر کسی عذر کے باعث سو گیا تھا یا کسی معقول وجہ سے لیٹ ہو گیا۔ آخری وقت میں نماز پڑھنے لگا نماز فجر کی ایک رکعت پڑھی تھی کہ سورج نکل آیا یا عصر کی ایک رکعت پڑھی سورج غروب ہو گیا تو بقیہ نماز پوری کرے اس نے نماز پالی ہے۔
➋ یہ دین کی آسانیاں ہیں لیکن جان بوجھ کر نماز لیٹ کرنا گناہ ہے اسی طرح اگر جماعت کے ساتھ ایک رکعت مل گئی تو جماعت کا ثواب مل گیا۔
➌ اہل رائے کے نزدیک نماز مغرب تو ہو جائے گی کیونکہ شروع بھی مکروہ وقت میں کی تھی اور ختم بھی مکروہ وقت میں ہوئی ہے جبکہ فجر نہیں ہوگی کیونکہ شروع صحیح وقت میں کی ہے اور ختم مکروہ وقت میں کی ہے۔ جبکہ ان کا یہ نظریہ حدیث رسول صلی اللہ علیہ وسلم سے تصادم کی بنا پر مردود ہے۔ یقیناً ایسے لوگوں کا طرز عمل اس فرمانِ الہی کا مصداق ہے: ﴿وَلَوْ أَنَّا كَتَبْنَا عَلَيْهِمْ أَنِ اقْتُلُوا أَنفُسَكُمْ أَوِ اخْرُجُوا مِن دِيَارِكُمْ مَا فَعَلُوهُ إِلَّا قَلِيلٌ مِّنْهُمْ﴾ [النساء: 66]
"اگر ہم ان پر فرض کر دیتے کہ قتل کرو اور گھروں سے نکلو تو ایسے نہ کرتے مگر تھوڑے یعنی حکم ہوا قتل نہ کرو تو انہوں نے قتل کرنا شروع کر دیے اللہ فرماتے ہیں کہ اگر ہم حکم دیتے قتل کرو تو پھر قتل سے باز آجاتے۔"
امام ابن کثیر رحمہ اللہ نے آیت بالا کی تفسیر میں لکھا کہ ان کی ردی طبیعتوں میں نافرمانی کوٹ کوٹ کر بھری ہوئی ہے اور یہی حال ان عقل پرستوں کا ہے۔

➊ وہ احادیث جن میں قبلہ رو ہو کر قضائے حاجت کی ممانعت کا حکم ہے اور جن احادیث میں نبی صلی اللہ علیہ وسلم کے عمل سے متعلق ابن عمر رضی اللہ عنہما نے خبر دی ان کی بہترین تطبیق کر دی گئی ہے کہ ممانعت کا تعلق صحرا اور کھلی فضا کے ساتھ ہے۔ عبد اللہ بن عمر رضی اللہ عنہما سے متعلق مروی ہے کہ انہوں نے سواری قبلہ رُخ بٹھائی پھر اس کی طرف منہ کر کے پیشاب کرنے لگے مروان بن اصفر رحمہ اللہ نے کہا اے ابو عبد الرحمن یہ تو منع ہے؟ آپ رضی اللہ عنہ نے فرمایا کہ کھلی فضا میں اس سے روکا گیا ہے مگر جب تمہارے اور قبلہ کے درمیان کوئی چیز حائل ہو تو کوئی حرج نہیں۔ [ابوداؤد: 11]
راجح بات یہی ہے کہ لیٹرین میں بھی قبلہ رخ نہیں ہونا چاہیے اگرچہ درمیان میں کوئی چیز حائل ہو کیونکہ ابو ایوب انصاری رضی اللہ عنہ جو عمر میں ابن عمر رضی اللہ عنہما سے بڑے ہیں انہوں نے اسے درست نہیں جانا اور پھر اگر قول اور فعل میں تعارض آ جائے تو فقہی قاعدہ ہے کہ قول حجت ہوگا کیونکہ فعل خاص بھی ہو سکتا ہے یا کوئی اور وجہ ہو سکتی ہے جیسے یہ فعل ممانعت سے پہلے کا ہو سکتا ہے یا بامر مجبوری ہو سکتا ہے یا قضاء حاجت سے فارغ ہو کر بیٹھے ہوں اس لیے قول مقدم ہے۔
➋ پیشاب کرتے وقت بیت اللہ کی طرف منہ کرنا یا پیٹھ کرنا منع ہے گزشتہ احادیث میں اسی مسئلے کو بیان کیا گیا ہے۔
➌ سیدنا عبد اللہ بن عمر رضی اللہ عنہما اتفاقاً اپنی بہن حفصہ رضی اللہ عنہا کے مکان کی چھت پر چڑھے تو رسول اللہ صلی اللہ علیہ وسلم پر نظر پڑ گئی۔
➍ مشرق و مغرب کی طرف رخ کرنے کا مطلب ہے رفع حاجت کے وقت اپنا منہ یا پشت قبلہ رخ کرے، یہ حکم اہل مدینہ کے لیے خاص تھا کیونکہ ان کا قبلہ جنوب کی طرف ہے۔
➎ کتاب وسنت کے منافی امور پر اظہارِ ناراضگی ایمان کی علامت ہے۔
➏ صحابہ کرام رضی اللہ عنہم پیارے نبی صلی اللہ علیہ وسلم کے ہر فرمان پر عمل پیرا ہوتے اور اس کی مخالفت کا تصور بھی نہیں کر سکتے تھے۔
➐ گھروں میں بیت الخلاء لیٹرین بنانا درست ہے۔
➑ سیدنا ابن عمر رضی اللہ عنہما ام المومنین سیدہ حفصہ رضی اللہ عنہا کے گھر کی چھت پر چڑھے تھے جس کو انہوں نے اپنا گھر کہا۔