السنن المأثورة

➊ حدیث بالا میں صلاۃ الخوف کی جو صورت بیان ہوئی اس سے یہ بات واضح ہوتی ہے کہ نبی اکرم صلی اللہ علیہ وسلم نے ہر ایک گروہ کو ایک ایک رکعت پڑھائی اور ایک رکعت انہوں نے اپنے طور پر پڑھی، پہلے گروہ نے خود سلام پھیرا جبکہ دوسرے گروہ نے نبی اکرم صلی اللہ علیہ وسلم کے ساتھ سلام پھیرا۔
➋ غزوہ ذات الرقاع 7 ہجری کو غزوہ خیبر کے بعد ہوا تھا۔
➌ «عمن صلى مع رسول الله صلى الله عليه وسلم» سے مراد راجح قول کے مطابق صالح بن خوات کے والد صحابی رسول خوات بن جبیر رضی اللہ عنہ ہیں جیسا کہ ابن حجر رحمہ اللہ نے ابن مندہ کے حوالہ سے بیان کیا ہے۔ [دیکھئے: بلوغ المرام، کتاب الصلاة، باب الخوف]

➊ اہل سیر و مغازی نے چار مقامات کا ذکر کیا ہے جہاں پر رسول اللہ صلی اللہ علیہ وسلم نے نماز خوف پڑھائی: ذات الرقاع، بطن نخل، عسفان اور ذی قرد۔
➋ نماز وہ فریضہ ہے جو حالت جنگ میں بھی معاف نہیں نماز خوف حضر وسفر جہاں بھی دشمن کا خوف ہو پڑھی جاسکتی ہے ارشادِ باری تعالی ہے: ﴿وَإِذَا ضَرَبْتُمْ فِي الْأَرْضِ فَلَيْسَ عَلَيْكُمْ جُنَاحٌ أَن تَقْصُرُوا مِنَ الصَّلَوةِ إِنْ خِفْتُمْ أَن يَفْتِنَكُمُ الَّذِينَ كَفَرُوا إِنَّ الْكَفِرِينَ كَانُوا لَكُمْ عَدُوًّا مُّبِينًا﴾ [النساء: 101]
"اور جب تم زمین میں سفر کرو تو تم پر کوئی گناہ نہیں کہ تم نماز قصر کر لو، اگر تمھیں ڈر ہو کہ کافر (حملہ کر کے) تمھیں فتنے میں ڈال دیں گے، بے شک کافر تمھارے کھلے دشمن ہیں۔" [سنن ابی داود: 1240]
مروان بن حکم رحمہ اللہ نے سیدنا ابو ہریرہ رضی اللہ عنہ سے دریافت کیا، کیا آپ نے رسول اللہ صلی اللہ علیہ وسلم کے ساتھ نماز خوف ادا کی؟ تو انہوں نے فرمایا: ہاں۔
➌ صلاۃ الخوف کی کئی صورتیں ہیں جن کو مفصل شروحات میں دیکھا جائے۔ اگر جنگ جاری ہو نماز خوف کی کوئی صورت بھی ممکن نہ ہو تو ﴿فَرِجَالاً أَوْ رُكْبَانًا﴾ جس حالت میں ہیں نماز پڑھ سکتے ہیں بغیر قبلہ کے ہی پڑھ لیں۔
➍ اگر اوپر سے تیر یا گولے مسلسل برس رہے ہیں تو غزوہ احزاب کی طرح قضا و جمع بھی کی جا سکتی ہیں کیونکہ ایسی صورت میں سوائے جمع کرنے کے اور کوئی حل نہیں ہے۔

➊ نمازی کو سلام مناسب آواز میں کیا جاسکتا ہے، نمازی اشارے سے جواب دے گا جس کے چار طریقے احادیث میں آئے ہیں۔
(1) ہاتھ سے اشارہ کر کے۔
(2) ہتھیلی سے اشارہ کر کے۔
(3) انگلی سے اشارہ کر کے۔
(4) سر سے اشارہ کر کے۔
➋ اسلام میں پہلے نماز میں ایک دوسرے سے کلام کرنا بھی جائز تھا، نماز میں وعلیکم السلام کہہ کر جواب دیا جاتا تھا پھر جب کلام منع ہوا تو صرف اشارہ سے جواب دینے کی اجازت باقی رہی۔ [حدیث نمبر: 62]
➌ بعض الناس نے عبادات کے لیے خود ساختہ اصول وضوابط بنائے۔ اس لیے بہت سی سنتوں پر عمل کرنے سے محروم ہیں۔ احادیث صحیحہ کی روشنی میں اشارہ سے جواب دینا درست ہے۔
➍ سیدنا صہیب رومی رضی اللہ عنہ مشہور و معروف جلیل القدر صحابی ہیں آپ سابقون الاولون میں سے ہیں بدر واحد، خندق اور دیگر غزوات میں رسول اللہ صلی اللہ علیہ وسلم کے ساتھ شریک رہے آپ نے 38 ھ کو مدینہ منورہ میں وفات پائی۔

➊ یہ سفر کی بات ہے آپ صلی اللہ علیہ وسلم نفلی نماز سواری پر ادا کر رہے تھے۔
➋ سواری پر نماز شروع کرتے ہوئے قبلہ رخ ہونا چاہیے پھر جدھر بھی رخ رہے جائز ہے۔
➌ یہ نہی کلام فی الصلاۃ کا ابتدائی دور تھا سیدنا جابر رضی اللہ عنہ نہ سمجھ پائے اس لیے نبی صلی اللہ علیہ وسلم نے ان کو وضاحت فرمادی۔
➍ شریعت اسلامیہ میں نسخ موجود ہے۔
➎ نماز میں گفتگو ممنوع ہے۔
➏ سواری پر نفلی نماز ادا کرنے کی سنت کو بھی زندہ کرنا چاہیے۔

➊ مذکورہ احادیث میں اس بات کا ذکر ہے کہ ابتداء اسلام میں نماز میں کلام سے منع نہ کیا گیا تھا، اسلام کے احکام چونکہ آہستہ آہستہ نازل ہوئے ہیں جوں جوں حکم آتا گیا رسول اللہ صلی اللہ علیہ وسلم رہ نمائی کرتے گئے سیدنا ابن مسعود رضی اللہ عنہ یا سیدنا معاذ رضی اللہ عنہ کے فعل کو چونکہ حدیث تقریری سے اولا تائید ملی پھر قولی تائید ملی تو فی الحقیقت وہ رسول اللہ صلی اللہ علیہ وسلم کا ہی فرمان ہو گیا یہ نہیں کہا جا سکتا کہ سیدنا ابن مسعود رضی اللہ عنہ کی ہر بات سنت کا درجہ رکھتی ہے۔ امتی کی بات نہ سنت ہوتی ہے نہ دین جب تک کہ اس پر زبان رسالت سے مہر نہ ثبت ہو۔
➋ ان احادیث میں کوفیوں کا بھی رد ہے جو ﴿وَإِذَا قُرِئَ الْقُرْآنُ﴾ مکی آیت سے فاتحہ نہ پڑھنے پر استدلال کرتے ہیں آیت صحیح ہے البتہ استدلال باطل ہے کیونکہ مدینہ میں بھی ابتداء اسلام میں نماز میں کلام کی اجازت بھی تھی، سلام کا جواب دیا جاتا، رکعات کی تعداد تک بتائی جاتی تو مکی آیت نے اس کلام کو تو نہ روکا سورۃ فاتحہ خلف الامام کو کیسے روک دیا؟
خود بدلتے نہیں، قرآن کو بدل دیتے ہیں
ہوئے کس درجہ فقیہانِ حرم بے توفیق
➌ سیدنا معاذ بن جبل رضی اللہ عنہ کی روایت کے لیے دیکھئے [سنن ابی داؤد: 506، 507]

➊ مسجد اللہ کا گھر ہے جس کا ادب و احترام لازم ہے اس میں دوڑنا نامناسب ہے لہذا اپنی رکعت بچانے کے لیے مسجد کی بے حرمتی کرنا، دوڑ کر نمازیوں کے خشوع میں خلل ڈالنا کسی صورت مناسب نہیں۔ [صحیح بخاری: 636، صحیح مسلم: 602]
➋ ﴿فاقضوا﴾ سے معلوم ہوتا ہے کہ آدمی جب نماز میں داخل ہوتا ہے تو وہ اس کی پہلی رکعت ہوتی ہے اور جو سلام کے بعد پڑھتا ہے وہ آخری رکعات ہوتی ہیں لیکن یہ سادہ سی بات ان لوگوں کو کون سمجھائے جن کے ہاں نہ ترتیب وضوء ضروری اور نہ نماز میں رکعات کی ترتیب ضروری سمجھتے ہیں۔
عقل کے اندھوں کو سب الٹا نظر آتا ہے
لیلی نظر آتا ہے مجنوں نظر آتی ہے

➊ معلوم ہوا جب اقامت کی آواز سنائی دے صف بندی شروع کر دینی چاہیے، «حي على الصلاة» کے الفاظ سن کر اٹھنا اور صف بندی کرنا خود ساختہ طریقہ ہے۔
➋ نماز ذہنی و جسمانی تسکین کے لیے ہے لہذا نمازی کو نماز کے لیے پرسکون ہو کر آنا چاہیے۔

➊ فجر کی سنتوں سے متعلق نبی صلی اللہ علیہ وسلم نے فرمایا: «لهما أحب الي من الدنيا جميعا» یہ دو سنتیں مجھے ساری دنیا سے محبوب ہیں۔ [صحیح مسلم: 725]
➋ اس حدیث مبارکہ سے یہ مراد نہیں کہ آپ صلی اللہ علیہ وسلم فاتحہ نہیں پڑھتے تھے بلکہ سیدہ عائشہ رضی اللہ عنہا نے مبالغہ یہ بات کہی، کیونکہ رسول اللہ صلی اللہ علیہ وسلم عام نماز میں خصوصا تہجد میں بہت لمبا قیام کرتے اور سورۃ فاتحہ بھی انتہائی ٹھہر ٹھہر کر پڑھتے تھے اگر ان کا مقارنہ فجر کی سنتوں سے کیا جائے تو یہی خیال آئے گا جو امی جی کو آیا ہے۔
➌ رسول اللہ صلی اللہ علیہ وسلم سنت فجر کی پہلی رکعت میں سورہ کافرون اور دوسری رکعت میں سورۂ اخلاص پڑھتے تھے۔ [صحیح مسلم: 726]
➍ سیدنا ابن عباس رضی اللہ عنہما فرماتے ہیں نبی صلی اللہ علیہ وسلم سنت فجر کی پہلی رکعت میں سورۃ بقرہ کی آیت: ﴿قُولُوا آمَنَّا بِاللَّهِ وَمَا أُنزِلَ إِلَيْنَا﴾ [البقرة: 136] اور دوسری رکعت میں سورۃ آل عمران کی آیت: ﴿تَعَالَوْا إِلَىٰ كَلِمَةٍ سَوَاءٍ بَيْنَنَا وَبَيْنَكُمْ﴾ [آل عمران: 64] پڑھتے تھے۔ [صحیح مسلم: 727]

➊ امام کو صفیں درست کرائے بغیر جماعت نہیں کرانی چاہیے۔
➋ صفیں درست کرنے کا طریقہ یہ ہے کہ پاؤں کے ساتھ پاؤں کندھے کے ساتھ کندھا ٹخنے کے ساتھ ٹخنہ ملایا جائے پاؤں کو کندھوں کی چوڑائی کے برابر کھولنا چاہیے نہ زیادہ نہ کم۔
➌ ایک صف سے دوسری صف کے درمیان بھی اتنا ہی فاصلہ ہو جتنا کہ سجدہ ہو جائے۔
➍ سیدنا براء بن عازب رضی اللہ عنہ بیان کرتے ہیں رسول اللہ صلی اللہ علیہ وسلم صفوں کے درمیان ایک طرف سے دوسری طرف چلتے اس دوران آپ ہمارے سینوں اور کندھوں پر ہاتھ پھیرتے اور فرماتے «لا تختلفوا فتختلف قلوبكم» آگے پیچھے مت کھڑے ہوں ورنہ تمہارے دلوں میں بھی اختلاف آجائے گا۔ [سنن ابی داؤد: 664]
➎ جہاں دیگر بہت سی سنتیں متروک ہو چکیں صف بندی کے سلسلہ میں یہ اہتمام بھی عرب و عجم سے رخصت ہو رہا ہے۔ اللہ رب العزت ہمیں سنتوں پر عمل پیرا رکھے۔ «آمين!»
➏ یہ بھی معلوم ہوا کہ رسول اللہ صلی اللہ علیہ وسلم پیچھے بھی اسی طرح دیکھتے تھے جیسے آگے دیکھتے تھے یہ آپ صلی اللہ علیہ وسلم کا معجزہ تھا، مہر نبوت سے دیکھنا ہو تب بھی اور اگر ویسے اللہ دیکھا دے تب بھی یہ علم غیب نہیں بلکہ معجزہ رسول صلی اللہ علیہ وسلم ہے۔

➊ سیدنا انس بن مالک رضی اللہ عنہ کے گھرانے کو نبی اکرم صلی اللہ علیہ وسلم کے ساتھ خاص عقیدت تھی۔
➋ سیدہ ام سلیم رضی اللہ عنہا رسول اللہ صلی اللہ علیہ وسلم کے مبارک پسینہ کو "سُک" نامی خوشبو میں ملاتی اور بستر پر آپ صلی اللہ علیہ وسلم کے جھڑے ہوئے بال بھی جمع کر لیتی تھی، سیدنا انس رضی اللہ عنہ نے اس سک کو سنبھال کر رکھا جب ان کی وفات کا وقت ہوا تو انہوں نے وصیت فرمائی کہ ان کی حنوط میں اس کو ملایا جائے پھر اسی طرح کیا گیا۔ [صحیح بخاری: 6281]
سیدنا انس رضی اللہ عنہ کے گھرانے سے بعض افراد نے تبرک کے لیے نبی صلی اللہ علیہ وسلم کے مبارک بال حاصل بھی کیے تھے۔ [صحیح بخاری: 170]
رسول اللہ صلی اللہ علیہ وسلم ام سلیم رضی اللہ عنہا کے گھر گئے ام سلیم رضی اللہ عنہا گھر نہیں تھی ادھر چمڑے کے بستر پر آپ صلی اللہ علیہ وسلم سو گئے کسی نے ام سلیم رضی اللہ عنہا کو بتایا آپ کے گھر رسول صلی اللہ علیہ وسلم آئے ہیں اور آرام فرما رہے ہیں وہ آئیں دیکھا کہ آپ کا پسینہ چمڑے کے بستر پر جمع ہے سیدہ ام سلیم رضی اللہ عنہا نے خوشبوؤں کی ڈبیہ کھولی اور بستر سے پسینہ ڈبیہ میں ڈالنے لگی رسول اللہ صلی اللہ علیہ وسلم گھبرا کر اٹھے فرمایا سیدہ ام سلیم رضی اللہ عنہا یہ کیا کر رہی ہو؟ سیدہ ام سلیم رضی اللہ عنہا نے کہا: ہم اپنے بچوں کے لیے برکت کی امید رکھتے ہیں آپ صلی اللہ علیہ وسلم نے فرمایا تو نے درست کہا۔ [صحیح مسلم: 2331]
➌ یہ انبیاء علیہم السلام کا خاصہ ہے کہ ان کے مبارک اجسام اور ان کے استعمال میں رہنے والی اشیاء سے برکت حاصل کی جاتی ہے۔ رسول اللہ صلی اللہ علیہ وسلم نے حجۃ الوداع کے موقع پر سیدنا ابوطلحہ رضی اللہ عنہ کو اپنے مبارک سر کی دائیں جانب کے کٹے ہوئے مبارک بال دیئے اور پھر بائیں جانب کے بالوں سے متعلق حکم دیا کہ انہیں تقسیم کر دیں۔ [صحیح مسلم: 1305]
➍ آپ صلی اللہ علیہ وسلم کے مبارک پسینہ سے خوشبو آتی تھی، یہ برکت صرف رسول اللہ صلی اللہ علیہ وسلم کے ساتھ خاص ہے کسی امتی سے تبرکات حاصل کرنا امتی کو نبی صلی اللہ علیہ وسلم کے برابر کرنا ہے جو کہ سراسر جہالت ہے۔
➎ معلوم ہوا تعلق والوں کے ہاں آنا جانا سنت رسول صلی اللہ علیہ وسلم ہے۔
➏ اپنے گھر کے علاوہ کسی دوسرے کے گھر میں بھی سو جانے میں حرج نہیں۔
➐ دوسروں کے گھر میں جا کر نفلی نماز پڑھنا درست ہے۔

➊ اذان کے دوہرے الفاظ ہیں اور اقامت سنگل ہے۔
➋ اذان ٹھہر ٹھہر کر کہی جاتی ہے اور اقامت جلدی۔
➌ اذان کے وقت کانوں میں انگلیاں ہونی چاہیے جبکہ اقامت کے لیے یہ تقاضا نہیں ہے۔
➍ «حي على الصلاة» پر صرف گردن بدن کے بغیر دائیں جانب گھومانی چاہیے اور «حي على الفلاح» پر بائیں جانب۔
➎ اقامت کا بھی زیادہ حقدار وہی ہے جس نے اذان کہی۔
➏ بغیر عذر کے اذان کے بعد مسجد سے نہیں نکلنا چاہیے۔
➐ اذان سفر میں بھی دے کر نماز پڑھنی چاہیے ہاں اگر پاس آبادی ہے جس کی اذان وہاں گونج چکی ہے تو اذان نہ بھی دے تو کوئی حرج نہیں۔
➑ امام ضامن ہے یعنی اسے نماز کے آداب، طہارت، سنن، خشوع وخضوع کا خیال رکھنا چاہیے اور مؤذن کو امین کہا گیا ہے اس کی اذان پر اعتماد کر کے سحری افطاری، اور نماز ادا کی جاتی ہے لہذا اسے اوقات کا خیال رکھنا چاہیے۔
➒ ترجیع والی اذان کے 19 کلمات ہیں اس کو ہمارے عرف میں دوہری اذان کہتے ہیں اس کا طریقہ یہ ہے کہ مؤذن دوسری دفعہ جب «اشهد ان محمداً رسول الله» کہہ لے پھر دوبارہ سے «اشهد أن لا اله الا الله» سے شروع کر کے آخر تک جائے یہ سیدنا ابو محذورہ رضی اللہ عنہ کی اذان کے نام سے مشہور ہے، جو رسول اللہ صلی اللہ علیہ وسلم نے مکہ میں سکھائی اور وہ وہاں اسی طرح اذان دیتے تھے اگر اذان سیدنا ابو محذورہ رضی اللہ عنہ والی ہو تو اقامت سترہ کلمات پر مشتمل دوہری ہوگی۔ [سنن ابی داؤد: 502]
➓ بعض الناس نے سیدنا ابو محذورہ رضی اللہ عنہ کی اقامت لے لی لیکن ابو محذورہ رضی اللہ عنہ والی اذان سے انکار کر دیا اللہ تعالیٰ انہیں احادیث و سنن ماننے کی توفیق عطا فرمائے۔ «آمين!»
⓫ مؤذن ایسا شخص ہونا چاہیے جس کی آواز بلند اور خوبصورت ہو بعض بزرگ حضرات کو ضد نہیں کرنی چاہیے جن کی نہ تجوید اچھی ہو اور نہ آواز کہ ایک آواز کے ساتھ دس آوازیں اور نکلیں۔
⓬ جب اذان مشروع نہیں تھی مشورہ کیا گیا لوگوں کو کیسے اکٹھا کیا جائے ایک رائے آئی کہ نرسنگا یہودیوں کی طرح صور پھونکا جائے دوسری رائے آئی کہ عیسائیوں کی طرح ناقوس دو لکڑیاں آپس میں مار کر آواز پیدا کی جائے اہل کتاب عبادات کے لیے ایسے ہی جمع کرتے تھے ایک رائے آگ جلانے کی پیش ہوئی، ایک رائے اعلان کرانے کی کچھ عرصہ اس پر عمل ہوا اعلان ہوتا (الصلاة جامعة الصلاة جامعة) اب نماز کسوف وخسوف کے لیے اس طرح اعلان کیا جاتا ہے۔ حتی کہ سیدنا عمر رضی اللہ عنہ اور سیدنا عبد اللہ بن زید بن عبد ربہ رضی اللہ عنہ کو فرشتے نے خواب میں آکر اذان سکھائی چونکہ محض امتی کے خواب سے شرعی حکم ثابت نہیں ہوسکتا تو جب اس خواب کو رسول اللہ صلی اللہ علیہ وسلم نے درست قرار دیا اور اس پر عمل کا حکم دیا تو حکم شرعی بن گیا۔

➊ قبل ازیں اس کی تفصیل گزر چکی ہے کہ سیدنا مالک بن حویرث رضی اللہ عنہ بیس دن رسول اللہ صلی اللہ علیہ وسلم کو نماز پڑھتے دیکھتے رہے واپس جاتے ہوئے رسول اللہ صلی اللہ علیہ وسلم سے حکم ملا کہ نماز اسی طریقے سے پڑھنا جیسے مجھے دیکھ کر جا رہے ہو اور لوگوں کو اس کی تعلیم بھی دینا انہوں نے پھر ایسا ہی کیا مساجد میں عوام اکٹھی کر کے عملی طور پر نماز محمدی کی انہیں تعلیم دیتے کہ رسول اللہ صلی اللہ علیہ وسلم ایسے نماز پڑھتے تھے۔
➋ رسول اللہ صلی اللہ علیہ وسلم رحیم شفیق اور مزاج شناس تھے۔
➌ مہمانوں سے ان کے احوال کے علاوہ اہل خانہ کی خبر دریافت کرنا بھی سنت ہے۔
➍ صحابہ کرام رضی اللہ عنہم نبی صلی اللہ علیہ وسلم سے دینی تعلیم سیکھتے اور پھر اس کے داعی اور مبلغ بن کر اپنے علاقوں کو لوٹ جاتے تھے۔
➎ امامت کا حقدار علم میں بڑا آدمی ہے اگر سب اس صلاحیت میں برابر ہوں تو عمر میں بڑے آدمی کو ترجیح حاصل ہوگی۔