السنن المأثورة

➊ غزوہ خندق کا دوسرا نام غزوہ احزاب ہے جو 5ھ کو پیش آیا اس زمانے کا تمام کفر مل کر مدینہ منورہ پر حملہ آور ہوا کفر کے قائد ابو سفیان رضی اللہ عنہ تھے جو بعد میں مشرف بہ اسلام ہوئے ان کے جھنڈے تلے قریش، عطفانی، خیبر کے یہودی بعد میں مدینہ کے یہودی اور منافقین بھی تھے ان کی مجموعی تعداد دس ہزار سے متجاوز تھی جبکہ رسول اللہ صلی اللہ علیہ وسلم کے ساتھ تین ہزار جانثار تھے۔
➋ خندق گڑھے کو کہتے ہیں جو سلمان فارسی رضی اللہ عنہ کے مشورے سے مدینہ کے ایک جانب جبل احد اور سبع المساجد کے درمیان کھودی گئی جس کے باعث دشمن کا داخلہ مدینہ میں بند ہو گیا دونوں لشکر دور سے ایک دوسرے پر تیراندازی کرتے رہے جس سے فریقین کا کچھ نقصان بھی ہوا۔ بالآخر اہلِ کفر شکست و ہزیمت کے ساتھ واپس لوٹنے پر مجبور ہو گئے۔
➌ فوت شدہ نمازیں ترتیب سے اداء کی جائیں گی جیسا کہ رسول اللہ صلی اللہ علیہ وسلم نے اس موقع پر کیا۔
➍ فوت شدہ نمازیں با جماعت بھی ادا کی جاسکتی ہیں۔
➎ متعدد نمازیں جمع کرتے ہوئے ایک اذان اور ہر نماز کے لیے علیحدہ علیحدہ اقامت کہی جائے گی۔
➏ نماز فجر کی قضاء کے وقت بھی دورانِ سفر رسول اللہ صلی اللہ علیہ وسلم نے اذان کا حکم دیا تھا۔ [ديكهئے صحيح بخاري، رقم الحديث: 344، صحيح مسلم، رقم الحديث: 681]
➐ فوت شدہ نمازوں کی قضا میں جلدی کرنی چاہیے تاخیر مناسب نہیں، رسول اللہ صلی اللہ علیہ وسلم نے فرمایا: «من نسى صلاة او نام عنها فكفارتها ان يصليها اذا ذكرها» جو شخص نماز پڑھنا بھول گیا یا نماز کی ادائیگی سے سویا رہ گیا تو اس کا کفارہ یہ ہے کہ جب یاد آئے فوراً پڑھ لے۔ [صحيح بخاري، رقم الحديث: 597، صحيح مسلم، رقم الحديث: 684]
➑ قضاء نماز بھی بر وقت نماز کی طرح سکون واطمینان سے اداء کرنی ضروری ہے۔
➒ کفار کی کثرت اہل ایمان کا کچھ نہیں بگاڑ سکتی جبکہ اللہ تعالیٰ کی نصرت شامل حال ہو۔
➓ نماز خوف کا حکم غزوہ خندق کے بعد نازل ہوا۔
⓫ نماز خوف کے متعدد طریقے کتب احادیث میں مذکور ہیں موقع کی مناسبت سے کسی بھی طریقہ کو اختیار کیا جاسکتا ہے۔
⓬ راوی حدیث ابو سعید خدری رضی اللہ عنہ کا نام سعد بن مالک بن سنان ہے آپ خزرجی، انصاری صحابی ہیں، غزوہ احد کے وقت تیرہ برس کے تھے میدانِ جنگ میں شامل ہونا چاہتے تھے لیکن کم عمری کے باعث رسول اللہ صلی اللہ علیہ وسلم نے واپس کر دیا، آپ کے والد غزوہ احد میں شہید ہوئے۔ آپ غزوہ خندق، غزوہ خیبر، حنین، تبوک، صلح حدیبیہ، فتح مکہ وغیرہ میں شریک ہوئے اور مجاہدین اسلام کے شانہ بشانہ لڑے بروز جمعہ 64ھ آپ مدینہ منورہ میں فوت ہوئے مقبرہ بقیع میں مدفون ہیں۔

➊ اس آدمی کا نام شارحین نے حماد بن ثعلبہ رضی اللہ عنہ لکھا ہے، جو پہلے سے مسلمان تھے اس لیے بات کا آغاز نماز سے کیا۔
➋ معلوم ہوا یہ فرضیت حج 9ھ سے قبل کا واقعہ ہے۔
➌ اس حدیث سے معلوم ہوا کہ فلاح کا دارومدار فرائض کی پابندی پر ہے جبکہ سنن و نوافل فرائض کا تکملہ ہیں روز قیامت اگر فرائض میں کمی رہ گئی تو سنن و نوافل سے پوری کی جائے گی۔
➍ دین میں اپنی طرف سے نہ اضافہ کیا جا سکتا ہے کہ پانچ نمازوں کی بجائے چھ فرض کر لی جائیں اور نہ کمی کی جاسکتی ہے کہ تیس روزوں کی جگہ پندرہ فرض سمجھ لیے جائیں۔
➎ اخروی نجات کے لیے محض شہادتین کی ادائیگی ناکافی ہے۔
➏ نوافل کی ادائیگی کا شریعت نے مسلمان کو مکلف نہیں بنایا بلکہ اس کی مرضی و منشا پر موقوف کر دیا۔ البتہ نوافل کی ادائیگی آخرت میں بلندی درجات کا باعث ہے۔
➐ اس حدیث سے دعوت دین کا بہترین انداز اور اسلوب بھی اخذ ہوتا ہے کہ نو مسلم کو پہلے صرف فرائض سے آگاہ فرمایا جائے تاکہ بوجھ محسوس نہ کرے جب دین کی مٹھاس دل میں بیٹھ گئی تو نوافل، سنن پر خود بخود عمل پیرا ہو جائے گا۔

➊ سجدہ میں سات اعضاء کا زمین پر لگنا ضروری ہے، جبین مع ناک، دونوں ہاتھوں کی ہتھیلیاں، دونوں گھٹنے، اور دونوں پاؤں کے اگلے حصے۔
➋ اس حدیث میں سجدہ کا طریقہ بیان ہوا ہے جو لوگ سجدہ میں ناک اٹھائے رکھتے ہیں یا ایک پاؤں دوسرے پاؤں پر سوار کر لیتے ہیں ان کا سجدہ سجدہ محمدی نہیں۔
➌ جو لوگ رسول اللہ صلی اللہ علیہ وسلم سے نماز سیکھنے کی بجائے لغت سے سیکھنے کی کوشش کرتے ہیں کہ رکوع وسجود مطلق جھکنے کو کہتے ہیں اور اعتدال اطمینان کو ضروری نہیں سمجھتے ان کا بھی اس حدیث میں رد موجود ہے۔
➍ دورانِ نماز بالوں اور کپڑوں کو سنوارنا بھی درست نہیں ہے۔
➎ رسول اللہ صلی اللہ علیہ وسلم وحی الہی کے اوامر و نواہی کے پابند تھے، اور یہی آپ کے لیے حکم ربانی تھا۔
ارشاد باری تعالیٰ ہے: ﴿اتَّبِعْ مَا أُوحِيَ إِلَيْكَ مِنْ رَبِّكَ لَا إِلَهَ إِلَّا هُوَ وَأَعْرِضْ عَنِ الْمُشْرِكِينَ﴾ [الانعام: 106]
"آپ اس کی پیروی کریں جو آپ کی طرف آپ کے رب کی طرف سے وحی کی گئی ہے اس کے سوا کوئی معبود نہیں اور مشرکوں سے کنارا کر۔"
اسی طرح ایک مقام پر فرمایا: ﴿فَاسْتَمْسِكْ بِالَّذِي أُوحِيَ إِلَيْكَ إِنَّكَ عَلَى صِرَاطٍ مُسْتَقِيمٍ﴾ [الزخرف: 43]
"پس آپ اس کو مضبوطی سے پکڑے رکھیں جو آپ کی طرف وحی کی گئی ہے، یقیناً آپ سیدھے راستے پر ہیں۔"

➊ رسول اللہ صلی اللہ علیہ وسلم بھی وہی کام کرنے کے پابند تھے جو اللہ کا حکم ہوتا، اس سے ایک تو یہ ثابت ہوتا ہے کہ حدیث بھی وحی ہے آپ کو اللہ تعالیٰ نے سات اعضاء پر سجدہ کرنے کا حکم دیا جبکہ یہ حکم قرآن میں موجود نہیں تو ثابت ہوا بعض اللہ کے حکم بذریعہ حدیث معلوم ہوتے ہیں۔
➋ حالت نماز میں بے جا طور پر ہاتھوں کو حرکت دینے، کبھی بال درست کرنے، کبھی کپڑے سمیٹنے یا کوئی بھی ایسی حرکت جو عمل نماز کے منافی ہو اس سے اجتناب کرنا چاہیے۔
➌ بالوں کے جوڑے بنا کر، آستین چڑھا کر داڑھی کو گرہ لگا کر نماز پڑھنا اس حدیث کی روشنی میں منع ہے۔
➍ نماز کھیل تماشہ نہیں بلکہ اللہ تعالیٰ سے ہم کلامی کا ذریعہ ہے۔ اس لیے مؤدب انداز سے عاجزی کے ساتھ کھڑا ہونا چاہیے۔
➎ سیدنا عبداللہ بن عباس رضی اللہ عنہما رسول اللہ صلی اللہ علیہ وسلم کے چچا زاد بھائی ہیں ہجرت مدینہ سے تین سال قبل پیدا ہوئے ترجمان القرآن اور حبر الامہ ان کا لقب ہے آپ نے 68ھ طائف میں وفات پائی آپ کی روایات کی تعداد قریباً سولہ صد ساٹھ ہے۔

➊ ابو رافع رضی اللہ عنہ رسول اللہ صلی اللہ علیہ وسلم کے آزاد کردہ غلام ہیں، اللہ رب العزت نے ان کو فہم و بصیرت دین سے نواز رکھا تھا۔ خلاف سنت ایک عمل کا مشاہدہ کیا فوراً اس کی اصلاح فرما دی۔
➋ غلطی کسی بھی شخصیت سے ممکن ہے البتہ کتاب و سنت سے دلیل مل جانے پر اس کی اصلاح کر لینا یہی اہل علم و دانش کا شیوہ ہے۔
➌ مردوں کے لیے عورتوں کی طرح اپنے بالوں کے جوڑے بنانا درست نہیں
➍ نمازی کی غلطی پر دورانِ نماز بھی اس کی اصلاح کرنا درست ہے۔ جیسا کہ ابو رافع رضی اللہ عنہ نے کیا۔
➎ بعض امور کی انجام دہی شیطان کی خوشنودی کا باعث بنتی ہے مومن و مسلمان ایسے امور سے اجتناب کرتے ہیں۔

➊ نماز نہ پڑھنا غیر مسلم کا شیوہ ہے اس لیے رسول اللہ صلی اللہ علیہ وسلم نے از راہ تعجب فرمایا: کیا تو مسلمان نہیں؟
➋ معلم اعظم صلی اللہ علیہ وسلم نے وجہ دریافت کی جبکہ پیروکار پہلے فتوی لگاتے ہیں حالانکہ ایسا نہیں کرنا چاہیے۔
➌ اکیلے نماز پڑھی پھر جماعت مل گئی تو جماعت کے ساتھ شامل ہو جائیں پہلی نفل ہو جائے گی عقل پرست کہتے ہیں کہ فجر اور عصر و مغرب دوبارہ نہ پڑھے کیونکہ فجر وعصر کے بعد نفل جائز نہیں اور مغرب تین رکعت ہے اور تین رکعت نفل نہیں ہوتے حالانکہ اگر پہلی نفل ہو جائے تو عصر و فجر کا اشکال رفع ہو جاتا ہے۔
➍ مزید مسائل کے لیے دیکھئے حدیث نمبر 8۔

➊ سیدنا معاذ رضی اللہ عنہ کی پہلی نماز فرضی اور دوسری نفلی شمار ہوتی تھی۔
➋ امام و مقتدی کی نیت ایک جیسی ہونا ضروری نہیں۔
➌ شریعت میں آسانیاں ہیں اور عقل سے شریعت مقدم ہے۔
➍ نماز عشاء میں آدمی اگر اس وقت پہنچے کہ امام نماز تراویح پڑھا رہا ہو تو فرض کی نیت سے امام کے ساتھ اس حدیث کی روشنی میں شامل ہو جانا چاہیے امام سلام پھیر دے تو کھڑے ہو کر بقیہ نماز پوری کر لے۔ اسی طرح آدمی ظہر پڑھنے مسجد میں آئے اور عصر کی جماعت ہو رہی ہو تو اسے ظہر کی نیت سے شامل ہو جانا چاہیے بعد میں عصر اپنی پڑھ لے۔
➎ اس حدیث میں اس بات کی طرف بھی رہنمائی ہے کہ آئمہ مساجد کو اپنی ذمہ داری کا احساس ہونا چاہیے جماعت کا اتفاق نہ توڑیں نیکی اگر فتنہ کا سبب بن رہی ہو تو متبادل جائز عمل اپنا لیں۔
➏ مزدور پیشہ لوگوں کے امام کو مختصر قراءت پر اکتفاء کرنا چاہیے باقی تقوی اکیلے میں قراءت کر کے پورا کر لینا چاہیے رسول اللہ صلی اللہ علیہ وسلم بھی بیماروں، معذوروں، اور بچوں کا خیال رکھتے تھے۔
➐ امام کی ذمہ داری محض جماعت کرانا ہی نہیں بلکہ اتفاق اتحاد برقرار رکھنا بھی امام کی ذمہ داری ہے۔
➑ نماز عشا میں چھوٹی سورتوں کی قرآت مسنون ہے البتہ نماز فجر میں لمبی قرآت کرنا اولی ہے۔
➒ فہیم و صاحب بصیرت انسان سے غلطی ہو جائے تو سخت الفاظ سے مواخذہ جائز ہے۔
➓ سیدنا معاذ بن جبل خزرجی انصاری رضی اللہ عنہ ہیں امام الفقہاء لقب ہے رسول اللہ صلی اللہ علیہ وسلم نے ان کو یمن کا گورنر بنایا امیر المومنین سیدنا عمر رضی اللہ عنہ نے شام کا گورنر تعینات کیا نبوی ہجرت سے 18 سال قبل پیدا ہوئے 18 ھ کو 36 سال کی عمر میں عین جوانی کے عالم میں طاعون کی بیماری سے شام کے علاقوں میں کفر کے خلاف اسلامی سرحدوں کا پہرہ دیتے ہوئے وفات پائی۔

➊ معلوم ہوا سیدنا معاذ رضی اللہ عنہ نبی صلی اللہ علیہ وسلم کی اقتداء میں فرض ادا کرتے اور بعد میں بطور امام نوافل پڑھتے تھے۔
➋ فرض ادا کرنے والے کے پیچھے متنفل اور نفل پڑھنے والے کے پیچھے فرائض کی ادائیگی درست ہے۔
➌ سیدنا جابر بن عبد اللہ بن حرام رضی اللہ عنہ کے والد بیعت عقبہ ثانیہ میں شامل ہوئے، غزوہ احد میں شہید ہوئے سیدنا جابر رضی اللہ عنہ 19 غزوات میں صف اول کے مجاہد رہے اور انہوں نے رسول اللہ صلی اللہ علیہ وسلم کا حج اور غزوات کے واقعات خوب محفوظ کئے اور ان کو بیان کیا۔ ان کی وفات مدینہ میں 74 ھ اور بعض روایات کے مطابق 78 ھ میں ہوئی ہے جنازہ ابان بن عثمان رحمہ اللہ نے پڑھایا مرویات کی تعداد 1540 بتائی جاتی ہے۔

➊ سیدنا مالک بن حویرث رضی اللہ عنہ رسول اللہ صلی اللہ علیہ وسلم کی زندگی کے آخری سالوں میں آپ کے پاس رہے قبیلے کے ہم عمر نوجوانوں کے ساتھ مدینہ طیبہ آئے، اور انہوں نے مدینہ میں بیس دن قیام فرمایا، دورانِ قیام انہوں نے دین کے بنیادی امور کی تعلیم پائی، نماز اور اس سے متعلقہ مسائل خوب سیکھے۔
➋ رسول اللہ صلی اللہ علیہ وسلم کا فرمان ہے: «صَلُّوْا كَمَا رَأَيْتُمُونِي أُصَلَّى» تم اس طرح نماز پڑھو جس طرح تم نے مجھے پڑھتے ہوئے دیکھا۔ اس کو نبی صلی اللہ علیہ وسلم سے سیدنا مالک بن حویرث رضی اللہ عنہ نے بیان کیا اور عملی طور پر لوگوں کو نماز نبوی کی تعلیم بھی ارشاد فرمائی۔ [صحيح بخاري، رقم الحديث: 631]
➌ بلا سبب و ضرورت محض تعلیم کے لیے نماز کی ادائیگی کرنا درست ہے۔
➍ وہی نماز عند اللہ مقبول و منظور ہے جو طریقہ نبوی سے مماثلت و مطابقت رکھتی ہوگی۔
➎ جلسہ استراحت مسنون عمل ہے۔
➏ جلسہ استراحت سے متعلق بعض الناس کا یہ تاویل پیش کرنا کہ اس کا تعلق نبی صلی اللہ علیہ وسلم کے بڑھاپے سے ہے، لہذا اس پر عمل ضروری نہیں باطل ہے۔ سنت نبوی کا صدور کسی بھی صورت اور حالت میں ہوا ہو وہ قابل اتباع ہے۔

➊ شروع اسلام میں حضر و سفر کی نماز کی رکعات یکساں فرض کی گئیں بعد ازاں حضر کی رکعات میں اضافہ ہو گیا جبکہ سفر کی نماز دو رکعات ہی رہیں۔ سیدہ عائشہ رضی اللہ عنہا بیان کرتی ہیں کہ: «فرض الله الصلاة حين فرضها ركعتين ركعتين فى الحضر والسفر فاقرت صلاة السفر و زيد فى صلاة الحضر» اللہ تعالیٰ نے پہلے نماز میں دو دو رکعت فرض کی تھی سفر میں بھی اور حالت اقامت میں بھی، پھر سفر کی نماز تو اپنی اصلی حالت پر باقی رہی البتہ حالت اقامت کی نمازوں میں اضافہ کر دیا گیا [صحيح بخاري، رقم الحديث: 350، صحيح مسلم، رقم الحديث: 685]
➋ اس حدیث سے ثابت ہوتا ہے کہ سفر میں نماز قصر اداء کی جائے گی یعنی جو نماز آدھی ہو سکتی ہے وہ آدھی دو رکعات پڑھی جائے گی فجر پہلے ہی دو رکعات ہے دو رکعات ہی پڑھی جائے گی۔ نماز مغرب کی تین رکعات فرض ہیں تو تین ہی پڑھیں گے ڈیڑھ رکعت یا دو رکعت نہیں ہوگی البتہ سفر میں فجر کی سنتوں اور نماز وتر کا اہتمام کرنا بھی مسنون ہے۔
➌ شریعت نے مقدار سفر مقرر نہیں کی بلکہ عرف عام پر چھوڑ دیا ہے، جس کو لگے کہ وہ سفر کر رہا ہے اپنی آبادی، بستی سے نکلتے ہی نماز قصر شروع ہو جائے گی حتیٰ کہ اقامت گاہ پر پہنچ جائے۔ دوران سفر دو رکعات ہی پڑھے گا۔
➍ انسان کی اقامت گاہ دو طرح کی ہوتی ہے: (1) اقامت مستقلہ ... جو آدمی کا اپنا گھر ہے جدھر ہمیشہ رہتا ہے۔ وہ اقامت مستقلہ ہے۔
(2) اقامت موقتہ ... جہاں عارضی طور پر رہائش پذیر ہے جیسے سرکاری ملازم، ہاسٹل میں طلبہ، کاروباری حضرات جو عارضی رہائش رکھے ہوئے ہیں، طلبہ عرب ممالک جاتے ہیں بطور علامت اقامت شناختی کارڈ حاصل کرتے ہیں جو اقامت موقتہ کی واضح دلیل ہوتی ہے۔ تو اس طرح کی دونوں اقامت گاہوں میں پوری نماز ادا کرنا ہو گی، بعض طلبہ سعودی عرب میں چار سال تعلیم کے لیے جاتے ہیں اس دوران قصر نماز ادا کرتے ہیں ان کا نظریہ یہ ہوتا ہے کہ جب تک سعودی نیشنلٹی نہیں دیتا ہم قصر پڑھیں گے ہم مسافر ہیں ایسا عمل ہمارے نزدیک درست نہیں کیونکہ اقامت موقتہ کے احکام اقامت مستقلہ کے ہی ہیں۔
➎ سفر کی مقدار مسافت کسی نے نو میل، کسی نے 84 کلومیٹر کسی نے ایک دن رات کی مسافت اور کسی نے تین دن تین رات کی مسافت مقرر کی ہے یہ علماء کرام کے اپنے اپنے استدلال اور اجتہاد ہیں اس طرح کی قید کے مسئلہ میں کوئی واضح نص موجود نہیں سفر چونکہ ایک جیسے نہیں ہوتے اس لیے شریعت کو متعین کرنے کی ضرورت تھی۔
➏ ایک مسافر کتنے دن تک نماز قصر کر سکتا ہے اس سلسلہ میں جو مختلف اقوال ہیں: جائے پڑاؤ کے بارے میں احتیاط کے پیش نظر بعض نے کہا ہے کہ اگر سفر کا علم ہو جائے کہ اتنے دن بعد سفر کروں گا تو صرف چار دن قصر کرے پھر پوری نماز پڑھے اور اگر صورت حال غیر یقینی ہو تو جائے پڑاؤ پر چاہے پورا سال قیام کرے نماز قصر ہی ادا کرے گا۔ راقم کے نزدیک یقینی و غیر یقینی صورت حال کی بھی کوئی نص نہیں محض احتیاط ہی ہے۔ ہاں شاید یہ علماء چار ایام کے بعد اقامت موقتہ تصور کر لیتے ہیں۔
➐ حج وعمرہ والے اگر نماز اکیلے پڑھیں تو نماز قصر کریں گے اگر مقامی امام کی اقتداء میں پڑھیں تو پوری پڑھنا ہوگی۔
➑ سفر میں عام نوافل کوئی پڑھنا چاہے تو اجازت ہے اور مسنون ہے۔
➒ سفر جہاد اور سفر حج و عمرہ میں رسول اللہ صلی اللہ علیہ وسلم اور خلفاء عظام نے قصر نماز ہی اداء کی سیدنا عثمان رضی اللہ عنہ بھی چند سال نماز قصر ہی سفر حج میں ادا فرماتے تھے پھر منی میں چار رکعات یعنی مقیم کی نماز پڑھائی، تو بعض صحابہ نے اس پر اعتراض بھی کیا۔
➓ دوران سفر مکمل نماز پڑھنا بھی جائز ہے جیسا کہ سیدہ عائشہ رضی اللہ عنہا دوران سفر نماز مکمل پڑھتی تھیں۔ [صحيح بخاري، رقم الحديث: 1090]
⓫ سیدنا عثمان رضی اللہ عنہ کی منی میں مکمل نماز سے متعلق علماء کرام نے مختلف توجیہات بیان کی ہیں، بعض کا کہنا ہے کہ سیدنا عثمان رضی اللہ عنہ نے چونکہ مکہ میں جائیداد بنالی تھی اس لیے وہ وہاں مکمل نماز پڑھتے تھے مولانا داؤد راز رحمہ اللہ لکھتے ہیں: سیدنا عثمان رضی اللہ عنہ نے منی میں پوری نماز پڑھی تو فرمایا: میں نے یہ اس لیے کیا کہ بہت سے عوام مسلمان جمع ہیں ایسا نہ ہو کہ وہ نماز کی دو رکعت ہی سمجھ لیں۔ [حواله كتاب الصلاة من صحيح البخاري، ترجمه و شرح مولانا داؤد راز رحمه الله]
⓬ بعض حضرات کہتے ہیں اس وقت اونٹ گدھے گھوڑے پر سفر تھا اب سفر کی جدید ترین اور تیز رفتار سہولیات میسر ہیں لہذا قصر کی کیا ضرورت ہے؟ اس کا جواب یہ ہے کہ ٹیکنالوجی سنت رسول کو ختم نہیں کر سکتی یہی بات سیدنا یعلی بن امیہ رضی اللہ عنہ نے سیدنا عمر رضی اللہ عنہ سے دریافت کی کہ اب سفر پر امن ہو گئے ہیں تو سیدنا عمر رضی اللہ عنہ نے فرمایا: میں نے یہی سوال رسول اللہ صلی اللہ علیہ وسلم سے کیا تھا تو آپ صلی اللہ علیہ وسلم نے فرمایا: «صدقة تصدق الله بها عليكم فاقبلوا صدقته» یہ نماز قصر صدقہ ہے جو اللہ تعالیٰ نے تم پر کیا ہے، لہذا تم اللہ تعالیٰ کے صدقہ کو قبول کرو۔ [صحيح مسلم، رقم الحديث: 686]
⓭ بالا حدیث سے یہ بھی ثابت ہوا کہ اگر کوئی اہم سوال ہو تو داعی، معلم کو دیگر لوگوں کو متوجہ کرانا چاہیے تاکہ سب لوگوں کو دین کا علم ہو جائے۔
⓮ سیدنا عمران رضی اللہ عنہ نے اپنے جواب کے دلائل میں سنت رسول کے علاوہ خلفاء الراشدین کے عمل کا بھی تذکرہ فرمایا اور یہی عمل صالح کی معراج ہے کہ اس کے دلائل وحی سے ماخوذ ہوں اور اصحاب رسول اس پر عمل پیرا رہے ہوں۔
لوٹ جا عہد نبی کی سمت رفتار جہاں
پھر مری پسماندگی کو ارتقا در کار ہے

➊ اس حدیث سے معلوم ہوا نماز قصر صرف حالت جنگ یا دشمن کے خوف کے ساتھ خاص نہیں، پُر امن سفر میں بھی نماز قصر سنت ہے۔
➋ مزید دیکھئے فوائد حدیث نمبر 15۔

➊ یہ حدیث اس بات کی دلیل ہے کہ سفر شروع ہونے کے ساتھ ہی نماز قصر شروع ہو جاتی ہے۔ ذی الحلیفہ اہل مدینہ اور جو اس سمت سے حج یا عمرہ کے لیے جانے والے ہیں ان کا میقات ہے جس کا موجودہ نام آبیار علی ہے۔
➋ اس حدیث میں رسول اللہ صلی اللہ علیہ وسلم کے سفر حج کا بیان ہے آپ کی پہلی منزل یہی مقام تھا یہاں پڑاؤ کیا دوسرے دن ظہر کی نماز کے بعد احرام باندھا اور کوچ فرمایا۔

➊ اس حدیث میں رہ نمائی ہے کہ جس بات کا پتہ نہ ہو اپنے سے علم میں بڑے سے پوچھ لینی چاہیے۔ شفاء العی السوال۔
➋ سیدنا یعلی بن امیہ رضی اللہ عنہ نے سوچا اب سب مسلمان ہو گئے ہیں کسی جنگ کا خطرہ نہیں تو نماز ابھی بھی قصر ہے کیونکہ آیت قرآنی کہتی ہے سفر میں قصر اس صورت میں ہے جب تمہیں دشمن کا ڈر ہو اب دشمن تو رہا نہیں پھر قصر کیوں؟ تو اس کا جواب خود رسول اللہ صلی اللہ علیہ وسلم سے مل گیا کہ آیت کے نزول کے وقت کفار کے حملے کا ڈر تھا اس لیے اس کا ذکر آیت میں آیا ہے وگر نہ یہ حکم تا قیامت باقی ہے۔
➌ احادیث رسول صلی اللہ علیہ وسلم کے بغیر فہم قرآن ممکن نہیں اور احادیث قرآنی آیات کی بہترین تفسیر ہیں۔
➍ سنت پر عمل کرنے سے سکون ملتا ہے اجر ملتا ہے سنت زندہ ہوتی ہے۔ امن سکون، سہولت، نت نئی ایجادات مسنون عمل کو ختم نہیں کرسکتیں۔
➎ سیدنا یعلی بن امیہ رضی اللہ عنہ فتح مکہ کے دن مسلمان ہوئے، غزوہ طائف،حنین اور تبوک میں رسول اللہ صلی اللہ علیہ وسلم کے شریک سفر رہے۔ سیدنا عمر رضی اللہ عنہ اور سیدنا عثمان رضی اللہ عنہ کی خلافت میں بعض علاقوں کے گورنر بھی رہے۔ 43 ھ کے بعد وفات پائی۔

➊ سیدنا ابوسعید خدری رضی اللہ عنہ وہ جلیل قدر صحابی ہیں جو اکثر حکمرانوں کو رسول اللہ صلی اللہ علیہ وسلم کی سنت و احادیث سکھایا کرتے تھے۔ ایک دفعہ مروان نے خطبہ عید نماز سے پہلے دینا چاہا تو ایک آدمی نے اسے طریقہ نبوی یاد دلایا، سیدنا ابوسعید خدری رضی اللہ عنہ نے اس آدمی کی حوصلہ افزائی فرمائی۔ [صحیح مسلم: 49]
الحمد للہ آج بھی منہج سلف کے پیروکار علماء حقہ صحابہ کرام رضی اللہ عنہم کے راستے پر چلتے ہوئے عوام و خواص کو نبی کریم صلی اللہ علیہ وسلم کی سنتوں پر عمل پیرا رہنے کے لیے زور دیتے ہیں۔ کثر اللہ امثالهم - ایک دفعہ سیدنا کعب بن عجرہ رضی اللہ عنہ مسجد میں گئے ایک اموی گورنر عبدالرحمن ابن ام حکم بیٹھ کر جمعہ کا خطبہ دے رہا تھا سیدنا کعب بن عجرہ رضی اللہ عنہ نے کہا: اس خبیث کو دیکھو بیٹھ کر خطبہ دے رہا ہے جبکہ اللہ کا فرمان ہے: "اور جب وہ تجارت یا کوئی مشغلہ دیکھتے ہیں تو ادھر ٹوٹ پڑتے ہیں اور آپ صلی اللہ علیہ وسلم کو کھڑا جمعہ کا خطبہ دیتے ہوئے چھوڑ جاتے ہیں" [الجمعة: 11] [صحیح مسلم: 864]
➋ معلوم ہوا خطبہ جمعہ کھڑے ہو کر دینا فرض ہے اور یہی نبوی طریقہ ہے جس کی اتباع امت پر لازم ہے۔
➌ نبی اکرم صلی اللہ علیہ وسلم کی سنت ہی وہ واحد کسوٹی ہے جو اصلی عاشق اور دودھ پیتے مجنوں میں فرق کرتی ہے۔
➍ مذکورہ جملہ احادیث سے معلوم ہوتا ہے کہ بروز جمعہ مسجد میں دوران خطبہ بھی آنے والا پہلے دو رکعت تحیۃ المسجد پڑھے پھر بیٹھے، آج کل جو عقل پرست لوگوں کو بیٹھا دیتے ہیں پھر درمیان میں سنتوں کا ٹائم دیتے ہیں یہ محض دین سے جہالت کا نتیجہ ہے۔
➎ خطبہ شروع ہونے سے قبل مسجد میں آنے والوں کے لیے نوافل کی تعداد متعین نہیں وہ جتنے چاہیں نوافل پڑھ سکتے ہیں۔
➏ تحیۃ المسجد کا اہتمام حکم نبوی صلی اللہ علیہ وسلم ہے۔
➐ صحابہ کا جذبہ ایمان دیکھیں جس کو خود صدقہ کے کپڑے ملے وہ بھی فضائل صدقہ سن کر صدقہ سے لیا ہوا اللہ کی راہ میں دے دیتا تھا حتی کہ سرکار دو عالم صلی اللہ علیہ وسلم کو خود کہنا پڑتا کہ واپس لے لو یہ تمہارے اپنے ضرورت کی چیز ہے تم ہی اس کا زیادہ حقدار ہو
۔ ➑ یہ بھی معلوم ہوا کہ دوران خطبہ خطیب سامعین سے مخاطب ہو سکتا ہے بات چیت بھی کر سکتا ہے۔ خطبہ جمعہ کے دوران سامعین و حاضرین کا آس پاس لوگوں سے مصافحہ کرنا یا بات چیت کرنا منع ہے لیکن اگر خطیب بلائے تو اس کو جواب بھی دیا جا سکتا ہے۔
➒ سلیک غطفانی رضی اللہ عنہ کو رسول اللہ صلی اللہ علیہ وسلم نے مسلسل دو خطبہ جمعہ میں ایک ہی مسئلہ سمجھایا داعی کو ہر وقت حسب موقع لوگوں کی اصلاح کے لیے کمر بستہ رہنا چاہیے۔
➓ صحابہ کرام رضی اللہ عنہم رسول اللہ صلی اللہ علیہ وسلم سے مسئلہ سن کر نہ صرف خود عمل کرتے تھے بلکہ جب تک زندہ رہے لوگوں کو بھی عمل کرواتے رہے اور آگے ابلاغ بھی کرتے رہے۔

➊ اس حدیث سے معلوم ہوا کہ بچے کو اٹھا کر نماز پڑھنے سے نماز فاسد نہیں ہوتی۔
➋ یہ حدیث مسجد کے متولیوں کو بتاتی ہے کہ چھوٹے بچے مسجد میں آسکتے ہیں بچپن میں آئیں گے تو بڑے ہو کر بھی آئیں گے۔
➌ رسول اللہ صلی اللہ علیہ وسلم جنس عورت کو اٹھا کر مسجد میں لاتے تھے تاکہ امت دیکھ لے عورت کے لیے مسجد کے دروازے بند نہیں۔
➍ یہ حدیث اس عورت کے لیے آسانیاں پیدا کرتی ہے جس کا بچہ رو رہا ہے اور نماز کا وقت بھی ہو چکا کہ وہ بچے کو اٹھا کر بھی نماز پڑھ سکتی ہے۔
➎ سیدہ امامہ رضی اللہ عنہا کا نکاح سیدہ فاطمہ رضی اللہ عنہا کی وفات کے بعد 11ھ کو سیدنا علی رضی اللہ عنہ سے ہوا، سیدنا علی رضی اللہ عنہ کی شہادت کے بعد مغیرہ بن نوفل رضی اللہ عنہ کے عقد میں تاحیات رہیں۔
➏ نماز میں بوقت ضرورت حرکات کرنا جائز ہے۔ نماز میں ہر حرکت منع نہیں بلکہ سلام کا اشارے سے جواب دیا جا سکتا ہے۔ موذی چیز سانپ وغیرہ کو قتل کیا جا سکتا ہے۔ ہاتھ کے قریب دروازہ ہے تو کھولا جا سکتا ہے۔ جوتا اتارا جا سکتا ہے، تکلیف دہ چیز ایک حرکت سے ہٹائی جا سکتی ہے، موبائل فون نماز کے دوران شور کرے تو اسے بند کیا جا سکتا ہے۔ جان لیوا شے سے بچایا جا سکتا ہے جیسے بجلی کا سوئچ بند کر دینا وغیرہ، آگے سے گزرنے والے کو لڑائی کی حد تک روکا جا سکتا ہے۔ بچے کو اٹھایا جا سکتا ہے، مہالک سے بچایا جا سکتا ہے یہ وہ فقہ الدین ہے جس سے نام نہاد فقیہ عاری ہے۔