السنن المأثورة

➊ یہ غزوہ خیبر سے واپسی پر 7 ہجری کا واقعہ ہے۔
➋ اس حدیث سے ثابت ہوا فوائت کے لیے اذان کہی جاسکتی ہے اور جماعت بھی کرائی جاسکتی ہے، اگر اس علاقے میں اذان ہو چکی ہو تو صرف اقامت کہہ کر جماعت کرا دینی چاہیے یا سپیکر کے بغیر اذان دے لی جائے تاکہ لوگ چہ میگویاں نہ کریں «خاطبوا الناس بما يعرفون.»
➌ فجر کی سنتیں نماز قضا کرتے ہوئے بھی پڑھی جائیں گی۔
➍ ایک حدیث کے لفظ ہیں جو نماز سے سو گیا یا بھول گیا اسے جب یاد آئے فوراً پڑھے اس کا یہی کفارہ ہے۔ یعنی اس نماز کا یہی وقت ہے وہ اداء ہی ہوگی۔ [صحیح بخاری: 597، صحیح مسلم: 684]
➎ ایک روایت کے الفاظ ہیں کہ تم کل نماز فجر کے ساتھ قضا بھی دینا۔ یہ راوی کا وہم ہے اسی ایک روایت میں راوی نے تین وہم کھائے جو حسب ذیل ہیں۔ [سنن ابی داؤد: 438]
(الف) اس واقعہ کو "جیش الامراء" یعنی غزوہ موتہ قرار دیا حالانکہ یہ خیبر سے واپسی کا قصہ ہے۔
(ب) اس راوی کے سنت فجر جو پڑھنا چاہیے پڑھ لے کے الفاظ ہیں حالانکہ سنت فجر ہر حال میں پڑھنی ہوتی ہیں۔
(ت) اگلے دن قضا بھی دینا حالانکہ جملہ رواۃ نے اس کا ذکر نہیں کیا اس لیے بعض ماہر فن نے اس روایت کو شاذ قرار دیا ہے اور کہا ہے کہ یہ راوی کا وہم ہے صحیح حدیث سے ثابت ہے کہ جب نمازی کو یاد آئے یا جاگے اسی وقت فوراً نماز پڑھے۔