السنن المأثورة

➊ جفتی کے عوض قیمت وصول کرنا منع ہے ہاں اگر اکراماً استفادہ کرنے والا کچھ دے دے تو جواز موجود ہے۔ قبیلہ کلاب کے ایک آدمی نے نبی اکرم صلی اللہ علیہ وسلم سے نر کو مادہ پر چھوڑنے کی اجرت لینے کے بارے میں دریافت کیا، تو آپ صلی اللہ علیہ وسلم نے منع فرمایا: اس آدمی نے پھر عرض کیا: اللہ کے رسول! ہم مادہ پر نر چھوڑتے ہیں تو ہمیں لوگ بلا مطالبہ کچھ دے دیتے ہیں۔ اس کا حکم کیا ہے؟ تو آپ صلی اللہ علیہ وسلم نے ایسا عطیہ لینے کی اجازت دے دی۔ [سنن ترمذی: 1274]
➋ ممانعت کی ایک حکمت یہ بیان کی گئی ہے کہ جو چیز فروخت کی جا رہی ہے اس کی مقدار معلوم نہیں اس لیے اس کی فروخت درست نہیں۔
➌ افزائش نسل کے لیے ٹیکے کا مصنوعی عمل جائز ہے یا نہیں، اس کے جواز پر تابیر النخل (نر کھجور کا بورا مادہ کھجور پر ڈالنے) سے استدلال کیا جا سکتا ہے لیکن انسانوں میں ایسا کرنا جائز نہیں۔
➍ بے اولاد خواتین جن کو حمل نہیں ٹھہرتا، جدید طبی طریقوں سے جرثومے آلات کے ذریعے ان کی بچہ دانی میں چھوڑے جاتے ہیں بشرطیکہ وہ جرثومے اس کے خاوند سے لیے گئے ہوں۔ اس مسئلہ کے فقہ المعاصر میں جواز کے فتاویٰ موجود ہیں، اگر جرثومے غیر خاوند کے ہیں تو حرام و ناجائز مانند زنا ہے جو کسی مسلمان کے لیے جائز نہیں۔