السنن الكبرى للبيهقي

امام شافعی رحمہ اللہ نے فرمایا: ”کیونکہ مسلمانوں کے لیے قتل ہونا شہادت ہے، اور اسلام اس سے کہیں زیادہ باعزت ہے کہ کسی مشرک کو اس شرط پر (مال) دیا جائے کہ وہ اہل اسلام سے (جنگ کرنے سے) باز رہے، کیونکہ اہل اسلام خواہ قتل کرنے والے ہوں یا قتل ہونے والے، (ہر حال میں) حق پر غالب ہیں۔“
شیخ (امام بیہقی) رحمہ اللہ نے فرمایا: ”ہمیں سیدنا مغیرہ بن شعبہ رضی اللہ عنہ کی حدیث میں اہواز کے قصے کے بارے میں روایت پہنچی ہے کہ انہوں نے کہا: ’ہمارے نبی (ﷺ) نے ہمیں ہمارے رب کے پیغام سے آگاہ فرمایا کہ ہم میں سے جو قتل ہو گا وہ ایسی جنت اور نعمتوں کی طرف جائے گا جن کی مثل کبھی دیکھی نہیں گئی، اور ہم میں سے جو باقی رہے گا وہ تمہاری گردنوں کا مالک بنے گا۔‘“...

سیدنا انس بن مالک رضی اللہ عنہ بیان کرتے ہیں کہ رسول اللہ ﷺ نے ان کے ماموں سیدنا حرام رضی اللہ عنہ کو، جو سیدہ ام سلیم رضی اللہ عنہا کے بھائی تھے، ان ستر آدمیوں میں روانہ کیا جو بئر معونہ پر شہید کر دیے گئے۔ مشرکین کا سردار عامر بن طفیل نبی کریم ﷺ کے پاس آیا اور اس نے کہا: ”میں آپ کو تین باتوں میں اختیار دیتا ہوں: (پہلی یہ کہ) شہر والے لوگ («المَدَر») آپ کے لیے ہوں اور دیہاتی لوگ میرے لیے، (دوسری یہ کہ) میں آپ کے بعد خلیفہ ہوں گا اور (تیسری یہ کہ) میں آپ کے خلاف ایک ہزار سرخ و سفید رنگت والے نوجوانوں کے ساتھ جنگ کروں گا۔“ راوی کہتے ہیں کہ بنو فلاں کی ایک عورت کے گھر میں اسے طاعون کی بیماری لاحق ہو گئی، اس نے اپنا گھوڑا منگوایا اور وہ عامر بن طفیل اپنے گھوڑے پر سوار ہی فوت ہو گیا۔ (ادھر) سیدہ ام سلیم رضی اللہ عنہا کے بھائی سیدنا حرام رضی اللہ عنہ اور ان کے ساتھ دو شخص اور بھی چلے، ایک لنگڑا اور ایک بنو فلاں قبیلے کا شخص۔ سیدنا حرام رضی اللہ عنہ نے کہا: ”تم دونوں میرے قریب رہو، میں ان کے پاس جاتا ہوں، اگر انہوں نے مجھے پناہ دے دی تو (بہتر ہے) اور اگر انہوں نے مجھے قتل کر دیا تو تم اپنے ساتھیوں کے پاس چلے جانا۔“ جب سیدنا حرام رضی اللہ عنہ ان کے پاس پہنچے تو کہنے لگے: ”میں تمہیں رسول اللہ ﷺ کا پیغام پہنچاتا ہوں، کیا تم ایمان لاؤ گے؟“ انہوں نے (بظاہر) حامی بھری تو سیدنا حرام رضی اللہ عنہ نے انہیں وعظ کرنا شروع کر دیا، اسی دوران انہوں نے ایک شخص کو پیچھے سے بھیجا جس نے نیزہ مار کر سیدنا حرام رضی اللہ عنہ کو شہید کر دیا۔ ہمام کہتے ہیں کہ میرا گمان ہے کہ جب انہیں نیزہ لگا تو انہوں نے کہا: «اللهُ أَكْبَرُ، فُزْتُ وَرَبِّ الْكَعْبَةِ» ”اللہ سب سے بڑا ہے، رب کعبہ کی قسم! میں کامیاب ہو گیا۔“ پھر اس شخص نے باقی افراد کو بھی قتل کر ڈالا سوائے اس لنگڑے شخص کے، کیونکہ وہ پہاڑ کی چوٹی پر (پہنچ گیا) تھا۔
(ب) سیدنا انس بن مالک رضی اللہ عنہ فرماتے ہیں کہ (ان شہداء کے بارے میں یہ پیغام) ہمارے پاس لایا گیا، پھر یہ عبارت منسوخ ہو گئی کہ: «أَن قد لَقِينَا رَبَّنَا فَرَضِيَ عَنَّا وَأَرْضَانَا» ”ہم اپنے رب سے جا ملے ہیں، وہ ہم سے راضی ہو گیا ہے اور ہم اس سے راضی ہو گئے ہیں۔“ نبی ﷺ نے ستر دن تک رعل، ذکوان اور بنو لحیان کے قبیلوں پر بددعا کی کیونکہ انہوں نے اللہ اور اس کے رسول ﷺ کی نافرمانی کی تھی۔

سیدنا انس بن مالک رضی اللہ عنہ فرماتے ہیں کہ جب حرام بن ملحان رضی اللہ عنہ کو، جو ان کے ماموں تھے، بئر معونہ کے دن نیزہ مارا گیا تو انہوں نے خون نکلتے وقت اسے اپنے چہرے اور سر پر ملتے ہوئے کہا: «فُزْتُ وَرَبِّ الْكَعْبَةِ» ”رب کعبہ کی قسم! میں کامیاب ہو گیا۔“

حضرت عائشہ رضی اللہ عنہا فرماتی ہیں کہ حضرت ابوبکر رضی اللہ عنہ نے نبی ﷺ سے ہجرت کی اجازت طلب کی، انہوں نے ہجرت کے متعلقہ حدیث ذکر کی، ان کے ساتھ عامر بن فہیرہ رضی اللہ عنہ تھے، کہتے ہیں: عامر بن فہیرہ رضی اللہ عنہ بئر معونہ کے دن قتل کر دیے گئے، عمرو بن امیہ ضمری رضی اللہ عنہ قیدی بنا لیے گئے، عامر بن طفیل نے مقتول کی جانب اشارہ کرتے ہوئے کہا: یہ کون ہے؟ تو عمرو بن امیہ رضی اللہ عنہ نے کہا: یہ عامر بن فہیرہ ہیں۔ اس نے کہا: میں نے اس کے قتل کے بعد دیکھا کہ اسے آسمان و زمین کے درمیان اٹھایا گیا، راوی کہتے ہیں کہ ان کے قتل کی خبر نبی ﷺ کو دی گئی تو آپ ﷺ نے فرمایا: ”تمہارے ساتھی شہید کر دیے گئے تو انہوں نے اپنے رب سے سوال کیا کہ اے ہمارے رب! ہمارے بھائیوں کو خبر دے دینا کہ تو ہم سے راضی اور ہم تجھ سے راضی ہیں“۔ راوی کہتے ہیں: ان کی جانب سے خبر دی گئی۔ اس دن عروہ بن اسماء بن صلت جس کو عروہ اور منذر بن عمر کے نام سے یاد کیا جاتا تھا۔

سیدنا ثوبان رضی اللہ عنہ سے روایت ہے کہ رسول اللہ ﷺ نے فرمایا: ”میری امت کا ایک گروہ ہمیشہ حق پر ہی رہے گا، ان کو کوئی گمراہی نقصان نہ دے گی، یہاں تک کہ قیامت آ جائے اور وہ اسی حالت پر رہے گا۔“