السنن الكبرى للبيهقي

سیدنا سعد بن مالک رضی اللہ عنہ فرماتے ہیں کہ نبی ﷺ میری عیادت کے لیے میرے پاس آئے اور میں اس بات کو ناپسند کرتا تھا کہ مجھے اسی زمین میں موت آئے جہاں سے میں نے ہجرت کی ہے تو میں نے کہا: اے اللہ کے رسول ﷺ! کیا میں سارے مال کی وصیت کر دوں؟ آپ ﷺ نے فرمایا: ”نہیں“ میں نے کہا: آدھے مال کی؟ آپ ﷺ نے فرمایا: ”نہیں۔“ میں نے کہا: ایک تہائی مال کی۔ آپ ﷺ نے فرمایا: ”ایک تہائی بھی زیادہ ہے۔“ آپ ﷺ نے فرمایا: ”تم اپنے وارثوں کو مال داری کی حالت میں چھوڑ جاؤ، یہ بہتر ہے اس سے کہ تم ان کو فقیری کی حالت میں چھوڑو اور وہ لوگوں کے سامنے ہاتھ پھیلاتے پھریں اور آپ جب کبھی بھی اللہ کے راستے میں کچھ خرچ کریں گے تو وہ آپ کے حق میں صدقہ بن جائے گا حتیٰ کہ وہ نوالہ جو تم اپنی بیوی کے منہ کی طرف اٹھاتے ہو (اس پر بھی اجر ملتا ہے) اور شاید کہ رفعت عطا فرمائے اور تیری وجہ سے بہت سے لوگوں کو فائدہ پہنچائے اور دوسروں (یعنی کافروں، مشرکوں) کو نقصان۔“

مذکورہ حدیث کو اسی سند اور اسی معنیٰ کے ساتھ بیان کیا سوائے ان الفاظ کی زیادتی کے ساتھ کہ میں مکہ میں مریض تھا اور آپ ﷺ میری عیادت کے لیے تشریف لائے اور وہ ناپسند کرتے تھے کہ ان کی وفات اسی زمین پر ہو جس سے انہوں نے ہجرت کی ہے۔ پھر نبی اکرم ﷺ نے فرمایا: ”اے ابن عفراء! اللہ تجھ پر رحم کرے۔“ پھر پوری حدیث بیان کی۔

عامر بن سعد بن ابی وقاص رحمہ اللہ فرماتے ہیں کہ ان کو ان کے والد (سعد بن ابی وقاص رضی اللہ عنہ) نے خبر دی کہ وہ فتح مکہ کے سال مکہ میں بیمار ہوئے اور اس بیماری میں ان کو اپنی موت کا اندیشہ ہوا اور نبی ﷺ عیادت کرنے کے لیے آئے۔ میں نے کہا: اے اللہ کے رسول! کیا میں اپنی ہجرت سے پیچھے چھوڑ دیا جاؤں گا؟ آپ ﷺ نے فرمایا: ”تو میرے بعد ہرگز پیچھے نہیں چھوڑا جائے گا، پس تم نیک اعمال کرتے رہو اور جو بھی تم اللہ کی رضا کے لیے کام کرو گے تو اللہ تعالیٰ اس کے ذریعے سے تمہارے مقام و مرتبے کو بڑھاتے جائیں گے اور یہ بھی ہو سکتا ہے کہ تجھے پیچھے چھوڑ دیا جائے اور تیری وجہ سے اللہ بعض لوگوں کو نفع پہنچائیں اور بعضوں کو نقصان۔“ پھر آپ ﷺ نے دعا فرمائی: «اللَّهُمَّ أَمْضِ لِأَصْحَابِي هِجْرَتَهُمْ، وَلَا تَرُدَّهُمْ عَلَى أَعْقَابِهِمْ» ”اے اللہ! میرے صحابہ کی ہجرت کو پورا فرما اور ان کو ایڑیوں کے بل نہ لوٹا دینا۔“ لیکن فقیر سعد بن خولہ رضی اللہ عنہ، ان کے لیے مرثیہ پڑھتے کہ وہ مکہ میں ہی فوت ہو گئے۔

اسی سند اور انہی معنی کے ساتھ مذکورہ بالا روایت منقول ہے، سوائے ان الفاظ کے کہ رسول اکرم ﷺ ان کے لیے مرثیہ پڑھتے کہ وہ مکہ میں فوت ہوئے اور سفیان رحمہ اللہ نے کہا کہ سعد بن خولہ رضی اللہ عنہ بنو عامر بن لؤی قبیلہ کے ایک آدمی ہیں۔

سیدنا سعد رضی اللہ عنہ کے تین بیٹے سب کے سب اپنے والد سے نقل فرماتے ہیں کہ نبی ﷺ مکہ میں ان کی عیادت کرنے کے لیے ان کے پاس تشریف لائے تو وہ رونے لگ گئے، تو آپ ﷺ نے فرمایا: ”تجھے کون سی چیز رلا رہی ہے؟“ انہوں نے کہا کہ مجھے ڈر ہے کہ میری موت اس زمین میں واقع ہو جس سے میں نے ہجرت کی ہے، جیسا کہ سعد بن خولہ رضی اللہ عنہ کی وفات اسی شہر میں ہوئی، تو آپ ﷺ نے فرمایا: «اللّٰهُمَّ اشْفِ سَعْدًا، اللّٰهُمَّ اشْفِ سَعْدًا» ”اے اللہ! سعد کو شفا دے، اے اللہ! سعد کو شفا دے۔“ تین دفعہ آپ ﷺ نے دعا کی۔

سیدنا عمرو قاری رضی اللہ عنہ فرماتے ہیں کہ رسول اللہ ﷺ تشریف لائے، اور جب آپ ﷺ حنین جانے لگے تو آپ ﷺ نے سیدنا سعد رضی اللہ عنہ کو پیچھے چھوڑ دیا، اور جب آپ ﷺ جعرانہ سے عمرہ کرنے آئے تو آپ ﷺ سیدنا سعد رضی اللہ عنہ کے پاس تشریف لائے اور وہ تکلیف سے نڈھال غشی کی حالت میں تھے۔ (افاقہ کے بعد) سیدنا سعد رضی اللہ عنہ نے عرض کیا: اے اللہ کے رسول! میں مال دار آدمی ہوں اور میرا وارث بھی کوئی نہیں ہے (یعنی کلالہ)، کیا میں سارے مال کی وصیت کر جاؤں یا صدقہ کر دوں؟ آپ ﷺ نے فرمایا: ”نہیں۔“ انہوں نے عرض کیا: کیا دو تہائی مال کا صدقہ کر دوں؟ آپ ﷺ نے فرمایا: ”نہیں۔“ پھر سیدنا سعد رضی اللہ عنہ نے عرض کیا: کیا آدھے مال کی وصیت کر دوں؟ آپ ﷺ نے فرمایا: ”نہیں۔“ انہوں نے پھر عرض کیا: کیا ایک تہائی مال کو صدقہ کر دوں؟ آپ ﷺ نے فرمایا: ”ہاں! اور یہ بھی زیادہ ہے۔“ پھر سیدنا سعد رضی اللہ عنہ نے عرض کیا: اے اللہ کے رسول! میں ایسی جگہ پر بیماری میں مبتلا ہوں جہاں سے میں نے ہجرت کی تھی، آپ ﷺ نے فرمایا: ”مجھے امید ہے کہ اللہ تعالیٰ تیرے درجات کو بلند کرے گا اور تیرے ذریعے سے کچھ لوگوں کو نقصان پہنچائے گا اور بعض کو فائدہ۔“ پھر آپ ﷺ نے فرمایا: ”اے عمرو بن قاری! اگر میرے بعد سعد فوت ہو جائے تو اسے یہاں دفن کرنا۔“ آپ ﷺ نے مدینہ کے راستے کی طرف اپنے ہاتھ سے اشارہ کر کے بتایا۔ یہ روایت بھی سفیان کی روایت کے موافق ہے جس میں ہے کہ یہ واقعہ عام الفتح میں پیش آیا، جبکہ باقی رواۃ زہری کے طریق سے کہتے ہیں کہ یہ واقعہ حجۃ الوداع کے سال میں پیش آیا، اور اسی طرح اس روایت میں ابن خیثم نام کے آدمی میں بھی اختلاف کیا گیا ہے جو عمرو بن قاری کے پوتے ہیں۔

حضرت عبدالرحمن اعرج رحمہ اللہ فرماتے ہیں کہ نبی ﷺ نے حضرت سعد رضی اللہ عنہ پر ایک آدمی مقرر کیا اور فرمایا: ”اگر وہ یہاں فوت ہو جائیں تو انہیں اس جگہ دفن نہ کرنا۔“

سیدنا ابو بردہ رضی اللہ عنہ فرماتے ہیں کہ سیدنا سعد رضی اللہ عنہ نے نبی ﷺ سے کہا: کیا یہ بات آدمی کے لیے ناپسندیدہ ہے کہ جس زمین سے اس نے ہجرت کی ہو اسی میں اس کو موت آئے؟ آپ ﷺ نے فرمایا: ”ہاں!“ یہ روایت بھی مرسل ہے اور اس سے ماقبل بھی۔

حضرت سعد بن ابی وقاص رضی اللہ عنہ فرماتے ہیں کہ میں نے نبی ﷺ سے سنا، آپ ﷺ فرما رہے تھے: ”آدمی کے لیے یہ چیز ناپسندیدہ ہے کہ جس زمین سے وہ ہجرت کرے اور پھر اسی ہی زمین پر اسے موت آئے۔“

سیدنا عبداللہ بن عمر رضی اللہ عنہما فرماتے ہیں کہ رسول اللہ ﷺ جب مکہ میں داخل ہوتے تو فرماتے: «اللَّهُمَّ لَا تُمِتْنَا فِي أَرْضٍ هَاجَرْنَا مِنْهَا» ”اے اللہ! ہمیں اس زمین پر موت نہ دینا جس سے ہم نے ہجرت کی ہے۔“ وکیع نے عبداللہ بن سعید کی متابعت کی ہے۔

سیدنا عبداللہ بن عمر رضی اللہ عنہما فرماتے ہیں کہ میں نے رسول اللہ ﷺ سے سنا، آپ ﷺ فرما رہے تھے: ”لوگ سو اونٹ کی طرح ہیں جن میں ایک بھی سواری کے قابل نہ ہو۔“
ابن شہاب زہری رحمہ اللہ کہتے ہیں: سیدنا عمر رضی اللہ عنہ فرمایا کرتے تھے: اے مہاجرین کی جماعت! اپنے مالوں کو مکہ میں جمع نہ کرو اور ان کو اپنے ہجرت کے گھر میں مہیا نہ کرو، کیونکہ آدمی کا دل اس کے مال کے پاس ہوتا ہے۔