السنن الكبرى للبيهقي

عبدالرحمن بن ابی لیلیٰ سے روایت ہے کہ انصار میں سے ایک آدمی اپنی قوم کے ساتھ عشاء کی نماز کے لیے نکلا تو اسے جنوں نے قیدی بنا لیا، وہ لاپتہ ہو گیا تو اس کی بیوی عمر بن خطاب رضی اللہ عنہ کے پاس آئی اور اس کا قصہ بیان کیا۔ عمر بن خطاب رضی اللہ عنہ نے اس کی قوم سے سوال کیا تو انہوں نے کہا: جی ہاں! وہ عشاء کی نماز کے لیے نکلا تھا اور پھر اسے گم پایا گیا۔ عمر بن خطاب رضی اللہ عنہ نے اسے حکم دیا کہ وہ چار سال تک انتظار کرے۔ جب چار سال گزر گئے تو وہ دوبارہ عمر بن خطاب رضی اللہ عنہ کے پاس آئی اور انہیں خبر دی، تو عمر بن خطاب رضی اللہ عنہ نے ان سے دوبارہ سوال کیا۔ انہوں نے کہا: جی ہاں! تو اسے عمر بن خطاب رضی اللہ عنہ نے حکم دیا کہ وہ شادی کر لے۔ چنانچہ اس نے شادی کر لی، پھر اس کا پہلا خاوند واپس آگیا، اس نے اس معاملے میں عمر بن خطاب رضی اللہ عنہ کی عدالت میں جھگڑا پیش کیا۔ عمر بن خطاب رضی اللہ عنہ نے فرمایا: تم میں سے کوئی ایک لمبا عرصہ غائب رہتا ہے اور اس کے اہل نہیں جانتے کہ وہ زندہ بھی ہے یا نہیں۔ اس نے عمر بن خطاب رضی اللہ عنہ سے عرض کیا: اے امیر المؤمنین! میرے پاس عذر ہے۔ آپ نے پوچھا: تیرا کیا عذر ہے؟ اس نے کہا: میں عشاء کی نماز کے لیے نکلا تو مجھے جنوں نے قید کر لیا اور میں ایک طویل عرصے تک ان کے درمیان رہا، پھر مومن یا مسلم جنوں نے ان سے لڑائی کی—اس کے بارے میں سعید کو شک ہوا ہے—انہوں نے ان سے قتال کیا اور ان پر غلبہ پایا، مومن جنوں نے ان کے جنوں کو قید کیا اور مجھے بھی قیدی بنایا، پھر انہوں نے کہا: ہم تمہیں مسلمان آدمی سمجھتے ہیں اور ہمارے لیے تمہیں قیدی بنانا حلال نہیں ہے، چنانچہ انہوں نے مجھے وہاں رہنے یا اپنے گھر والوں کی طرف لوٹ جانے کے درمیان اختیار دیا، تو میں نے اپنے اہل کی طرف لوٹنے کو اختیار کیا، وہ میرے ساتھ آئے، رات کو آئے یا دن کو آئے—انہوں نے مجھے یہ بیان نہیں کیا—میں ان کی ہوا کی پیروی کرتا رہا۔ عمر بن خطاب رضی اللہ عنہ نے اس سے پوچھا: ان میں تیرا کھانا کیا تھا؟ اس نے کہا: «الْفُولُ» ”لوبیا“ اور وہ چیز جس پر اللہ کا نام نہ لیا گیا ہو۔ عمر بن خطاب رضی اللہ عنہ نے فرمایا: اس میں تیرا پینا کیا تھا؟ اس نے کہا: «الْجَدَفُ» ”جدف“۔ قتادہ فرماتے ہیں: «الْجَدَفُ» ”جدف“ وہ شراب ہے جو سکر پیدا ہونے سے پہلے استعمال کرتے ہیں۔ عمر بن خطاب رضی اللہ عنہ نے اس شخص کو حق مہر اور اس کی بیوی کے درمیان اختیار دے دیا۔ سعید فرماتے ہیں: اور مجھے مطر نے ابونضرہ سے حدیث بیان کی، انہوں نے عبدالرحمن بن ابی لیلیٰ سے، وہ عمر بن خطاب رضی اللہ عنہ سے قتادہ کی حدیث کی طرح نقل فرماتے ہیں، مگر مطر نے اس میں کچھ زیادہ کیا ہے، فرماتے ہیں: اسے حکم دیا کہ وہ چار سال، چار ماہ اور دس دن انتظار کرے۔

سیدنا عمر رضی اللہ عنہ سے اسی طرح روایت ہے جس طرح قتادہ رحمہ اللہ نے ابونضرہ رحمہ اللہ سے روایت کیا ہے اور اس کو ثابت بنانی رحمہ اللہ نے عبدالرحمن بن ابولیلیٰ رحمہ اللہ سے مختصر طور پر روایت کیا ہے اور اس میں اضافہ کیا ہے کہ اس کو سیدنا عمر رضی اللہ عنہ نے حق مہر اور اس کی بیوی کے مابین اختیار دیا۔ اس نے حق مہر کو اختیار کیا۔ حماد رحمہ اللہ فرماتے ہیں: میں سمجھتا ہوں کہ اس کو حق مہر بیت المال سے دیا۔
اس کو مجاہد رحمہ اللہ نے اس گم شدہ شخص سے روایت کیا ہے جس کو جن نے قیدی بنا لیا تھا، سیدنا عمر رضی اللہ عنہ سے روایت ہے اور یونس بن یزید کی روایت میں ہے، وہ ابن شہاب رحمہ اللہ سے روایت کرتے ہیں کہ سعید بن مسیب رحمہ اللہ سے روایت ہے، وہ سیدنا عمر بن خطاب رضی اللہ عنہ سے روایت کرتے ہیں کہ وہ گم شدہ خاوند کی عورت کے بارے میں فرماتے ہیں: اگر اس کا خاوند آ جائے اور وہ شادی کر چکی ہے تو اس کو اس کی بیوی اور اس کی بیوی کے حق مہر کے درمیان اختیار دیا جائے گا اور اگر وہ حق مہر کو اختیار کرے تو وہ اس عورت کے دوسرے خاوند کے پاس ہو گی اور اگر وہ اپنی بیوی کو اختیار کرے تو وہ عدت گزارے گی حتیٰ کہ وہ حلال ہو جائے۔ پھر وہ اپنے پہلے خاوند کی طرف رجوع کرے گی اور اس کے لیے اس کے دوسرے خاوند سے حق مہر ہو گا، اس لیے کہ اس نے اس کی شرمگاہ کو حلال کیا اور ابن شہاب رحمہ اللہ نے فرمایا: اسی کے ساتھ سیدنا عمر بن خطاب رضی اللہ عنہ کے بعد سیدنا عثمان رضی اللہ عنہ نے فیصلہ کیا اور مالک بن انس رحمہ اللہ اس کی روایت کا انکار کرتے ہیں جس نے سیدنا عمر رضی اللہ عنہ سے اختیار کے بارے میں روایت کیا ہے۔

مالک رحمہ اللہ نے ہمیں حدیث بیان کی، فرمایا: میں لوگوں کو پاتا ہوں کہ وہ اس کا انکار کرتے ہیں جو بعض لوگوں نے عمر رضی اللہ عنہ کے بارے میں کہا ہے کہ انہوں نے کہا: ”اس کے خاوند کو اختیار دیا جائے گا جب وہ آ جائے۔“ اگر وہ نکاح کر چکی تو اسے حق مہر میں اور عورت میں اختیار دیا جائے۔ مالک رحمہ اللہ فرماتے ہیں: جب وہ اپنی عدت کے ختم ہونے کے بعد شادی کرے، اگرچہ اس نے اس کے ساتھ دخول کیا ہے یا نہیں کیا، اس کے پہلے خاوند کے لیے اس کی طرف کوئی راستہ نہیں ہے اور یہی مسئلہ ہمارے لیے بھی ہے۔ امام مالک رحمہ اللہ فرماتے ہیں: اگر اس کا خاوند اس کی عدت کے ختم ہونے سے پہلے آ جائے تو وہی اس کا حق دار ہے۔

ہمیں ربیع رحمہ اللہ نے خبر دی، میں نے امام شافعی رحمہ اللہ سے کہا: ہمارے ساتھی نے کہا ہے: میں ان لوگوں کو پاتا ہوں جو انکار کرتے ہیں اس کا جو بعض لوگوں نے عمر رضی اللہ عنہ کے بارے میں کہا ہے۔ امام شافعی رحمہ اللہ فرماتے ہیں: ہم نے دیکھا ہے جو عمر رضی اللہ عنہ کے فیصلے کا انکار کرتا ہے ان تمام کا جو گم شدہ خاوند کی عورت کے بارے میں ہیں اور وہ کہتا ہے: یہ اس کے مشابہ نہیں ہے کہ وہ عمر رضی اللہ عنہ کے فیصلے میں سے ہو۔ ثقہ راویوں نے جب اس کو عمر رضی اللہ عنہ سے بیان کیا ہو، پھر ان پر تہمت نہیں لگائی جائے گی۔ اسی طرح حجت آپ پر ہوگی اور یہ کیسے جائز ہے کہ ثقہ راوی عمر رضی اللہ عنہ سے ایک حدیث روایت کریں اور ہم اس کے بعض کو لیں اور بعض کو چھوڑ دیں۔

شعبی، مسروق سے روایت کرتے ہیں یا فرمایا: میں گمان کرتا ہوں کہ مسروق سے روایت ہے کہ اگر سیدنا عمر رضی اللہ عنہ نے گم شدہ خاوند کو اس کی بیوی اور حق مہر کے درمیان اختیار نہ دیا ہوتا، تو میں سمجھتا کہ وہ اس کا زیادہ حق دار ہوتا جب وہ آجاتا۔
امام شافعی رحمہ اللہ فرماتے ہیں کہ سیدنا علی بن ابی طالب رضی اللہ عنہ نے فرمایا کہ گم شدہ خاوند کی بیوی ایسی عورت ہے جس کی آزمائش کی گئی ہے، وہ صبر کرے اور نکاح نہ کرے یہاں تک کہ اس کی موت کی یقینی خبر آجائے۔ امام شافعی رحمہ اللہ فرماتے ہیں: یہی ہم کہتے ہیں۔
امام بیہقی رحمہ اللہ نے فرمایا: اور اسے قتادہ نے خلاس بن عمرو سے، ابوملیح سے اور انہوں نے سیدنا علی رضی اللہ عنہ سے روایت کیا ہے کہ وہ فرماتے ہیں کہ جب اس کا پہلا خاوند آجائے تو اسے دوسرے حق مہر اور اس کی بیوی کے درمیان اختیار دیا جائے گا۔
اور خلاس کی روایت سیدنا علی رضی اللہ عنہ سے ضعیف ہے اور ابوملیح نے سیدنا علی رضی اللہ عنہ سے نہیں سنا ہے۔

یحییٰ بن ابو طالب نے حدیث بیان کی، انہوں نے کہا کہ ابو نصر عبدالوہاب بن عطاء نے کہا: میں نے سعید سے گم شدہ خاوند کے بارے میں سوال کیا۔ انہوں نے ہمیں قتادہ سے خبر دی کہ ابو الملیح ہذلی نے کہا: مجھے حکم بن ایوب سہمیہ کی طرف بھیجا گیا، میں نے اس سے سوال کیا، اس نے مجھے حدیث بیان کی کہ اس کے خاوند صیفی بن قتیل کے فوت ہونے کا قندابیل سے اس کے لیے اعلان کیا گیا۔ اس کے بعد عباس بن طریف قیسی نے اس سے شادی کر لی، پھر اس کا پہلا خاوند بھی آ گیا۔ ہم عثمان بن عفان رضی اللہ عنہ کے پاس آئے اور وہ قید میں تھے۔ انہوں نے ہم پر جھانکا اور فرمایا: میں تمہارے درمیان کیسے فیصلہ کروں اور میں اس حال میں ہوں؟ ہم نے کہا: ہم آپ کے فرمان کے ساتھ راضی ہو جائیں گے۔ انہوں نے فیصلہ کیا کہ پہلے خاوند کو حقِ مہر اور اس کی بیوی کے درمیان اختیار دیا جائے گا۔ پھر عثمان رضی اللہ عنہ نے فرمایا: پہلے خاوند کو اس کی بیوی اور حقِ مہر کے درمیان اختیار دیا گیا ہے۔ اس نے حقِ مہر کو اختیار کیا۔ اس نے مجھ سے دو ہزار لیے اور میرے خاوند سے بھی دو ہزار لیے اور وہ اس کا حقِ مہر تھا جو اس نے عورت کو دیا تھا۔ فرماتے ہیں: وہ اس کے لیے امِ ولد رہی، اس نے اس کے بعد شادی کر لی، اس نے اس کے لیے اولاد کو جنم دیا۔ اس نے اس کو اس پر لوٹا دیا اور عبدالوہاب نے فرمایا: سعید نے کہا: ہمیں ایوب نے ابو الملیح سے اسی حدیث کی طرح حدیث بیان کی۔ اس کے علاوہ ایوب نے کہا: کیا اس کی اولاد کو ان کے باپ کے لیے (قرار دیا)؟ فرمایا: قتادہ فرماتے تھے: وہ دوسرے کا حقِ مہر لے، اور قتادہ کی حسن سے روایت ہے کہ انہوں نے کہا: وہ پہلے کا حقِ مہر لے۔