السنن الكبرى للبيهقي

جابر رضی اللہ عنہ سے روایت ہے کہ خالہ کو تین طلاقیں دی گئیں۔ وہ نکلیں اور کھجوریں کاٹ رہی تھیں کہ انہیں ایک شخص ملا، اس نے انہیں منع کیا۔ وہ نبی ﷺ کے پاس آئیں اور اس کا ذکر کیا تو آپ ﷺ نے فرمایا: ”تو نکل جا اور کھجوریں کاٹ، شاید تو صدقہ کرے یا نیکی کرے۔“ اس کو مسلم نے روایت کیا ہے۔
امام شافعی رحمہ اللہ فرماتے ہیں: انصار کی کھجوریں ان کے گھروں کے قریب تھیں اور وہ صبح کو کھجوریں کاٹتے تھے۔
اس کو مسلم نے نکالا ہے۔

مجاہد رحمہ اللہ سے روایت ہے کہ احد کے دن بہت سے آدمی فوت ہو گئے اور وہ ایک گھر میں پڑوسنیں تھیں۔ وہ نبی ﷺ کے پاس آئیں، انہوں نے کہا: ”اے اللہ کے رسول! ہم رات کو وحشت محسوس کرتی ہیں، ہم رات اپنے کسی عزیز کے پاس گزارتی ہیں۔ جب ہم صبح کرتی ہیں تو اپنے گھروں کی طرف چلی جاتی ہیں۔“ نبی ﷺ نے فرمایا: ”تم آپس میں باتیں کرو، جب تم سونے کا ارادہ کرو تو تم میں سے ہر ایک اپنے گھر کی طرف لوٹ جائے۔“

سیدنا عبداللہ رضی اللہ عنہ سے روایت ہے کہ کسی عورت کے لیے جائز نہیں ہے کہ وہ ایک رات اپنے گھر سے باہر گزارے جب وہ اپنے خاوند کی وفات کی عدت میں ہو یا عدتِ طلاق میں ہو۔

سیدنا عبداللہ بن عمر رضی اللہ عنہما سے روایت ہے کہ طلاق شدہ عورت اور وہ عورت جس کا خاوند فوت ہو چکا ہو وہ دن میں نکلیں اور مکمل رات اپنے گھر کے علاوہ کسی دوسرے کے گھر میں نہ گزاریں۔
سفیان سے روایت ہے کہ مجھے موسیٰ بن عقبہ نے حدیث بیان کی، وہ نافع سے روایت کرتے ہیں، وہ سیدنا عبداللہ بن عمر رضی اللہ عنہما سے نقل فرماتے ہیں کہ طلاقِ بتہ والی عورت دن کو زیارت کرے اور اپنے گھر کے علاوہ رات نہ گزارے۔
علقمہ سے روایت ہے کہ ہمدان قبیلے کی عورتوں کے لیے ان کے خاوندوں کی (وفات) کا اعلان کیا گیا، انہوں نے سیدنا عبداللہ بن مسعود رضی اللہ عنہ سے سوال کیا کہ ہم وحشت محسوس کرتی ہیں، انہوں نے ان کو حکم دیا کہ وہ دن کو اکٹھی ہو جایا کریں اور جب رات ہو تو ہر ایک عورت اپنے گھر کی طرف پلٹ جائے۔
اسلم قبیلے کے ایک شخص سے روایت ہے کہ ایک عورت نے سیدہ ام سلمہ رضی اللہ عنہا سے سوال کیا کہ اس کا خاوند فوت ہو گیا ہے، کیا وہ اپنے والد کی بیمار پرسی کر سکتی ہے؟ سیدہ ام سلمہ رضی اللہ عنہا نے کہا: تو رات کے دو حصوں میں سے ایک حصہ اپنے گھر میں گزار۔

یحییٰ بن سعید سے روایت ہے کہ مجھے یہ بات پہنچی کہ سیدنا سائب بن یزید رضی اللہ عنہ فوت ہو گئے اور ان کی بیوی سیدنا عبداللہ بن عمر رضی اللہ عنہما کے پاس آئیں، انہوں نے اپنے خاوند کی وفات کا تذکرہ کیا اور ان کے لیے اپنی کھیتی کا ذکر بھی کیا جو قناۃ نامی جگہ میں ہے اور ان سے سوال کیا کہ کیا ان کے لیے درست ہے کہ وہ اس میں رات گزاریں؟ انہوں نے ان کو اس سے منع کیا۔ وہ مدینہ سے سحری کے وقت نکلتیں، وہ دن اپنی کھیتی میں گزارتیں اور صبح اپنی کھیتی میں کرتیں، پھر جب شام ہو جاتی تو وہ مدینہ میں داخل ہوتیں اور رات اپنے گھر میں گزارتیں۔