السنن الكبرى للبيهقي

سیدنا عثمان بن عفان رضی اللہ عنہ کے غلام ہانی رحمہ اللہ فرماتے ہیں کہ جب سیدنا عثمان بن عفان رضی اللہ عنہ قبر پر کھڑے ہوتے تو اتنا روتے کہ داڑھی مبارک تر ہو جاتی، کہا گیا کہ آپ کے پاس جنت اور دوزخ کا تذکرہ ہوتا ہے آپ نہیں روتے مگر قبر کے تذکرے سے کیوں روتے ہو؟ تو وہ فرماتے: میں نے رسول اللہ ﷺ سے سنا ہے کہ ”قبر آخرت کی پہلی منزل ہے، جو اس سے نجات پا گیا بعد والی منازل اس کے لیے آسان ہو جائیں گی اور جو کوئی اس سے نجات حاصل نہ کر سکا تو اس کے بعد کی منازل بہت مشکل ہوں گی“ اور فرماتے: ”میں نے قبر جیسا بھیانک منظر کبھی نہیں دیکھا“ اور جب آپ ﷺ دفنِ میت سے فارغ ہوتے تو کہتے: ”اپنی میت کی بخشش طلب کرو اور ثابت قدمی کی دعا کرو، یقیناً اس وقت اس سے پوچھ گچھ کی جا رہی ہے۔“
اس میں ہشام کے علاوہ دیگر نے اضافہ کیا ہے اور موقوف قرار دیا ہے۔ پھر انہوں نے کہا: توبہ و استغفار کرو اور سنداً یہ بیان کیا کہ میں نے کبھی اس طرح نبی کریم ﷺ کو نہیں دیکھا۔

کثیر بن مدرک رحمہ اللہ فرماتے ہیں کہ سیدنا عمر رضی اللہ عنہ جب میت پر مٹی برابر کرتے تو کہتے: «اللَّهُمَّ أَسْلَمَهُ إِلَيْكَ الْأَهْلُ وَالْمَالُ وَالْعَشِيرَةُ، وَذَنْبُهُ عَظِيمٌ، فَاغْفِرْ لَهُ» ”اے اللہ! اس کے اہل، مال اور خاندان نے اسے تیرے سپرد کر دیا ہے اور اس کے گناہ عظیم ہیں، پس تو اسے معاف کر دے۔“

ابن جریج رحمہ اللہ فرماتے ہیں: میں نے ابن ابی ملیکہ رحمہ اللہ کو کہتے ہوئے سنا کہ میں نے سیدنا عبداللہ بن عباس رضی اللہ عنہما کو دیکھا، جب وہ سیدنا عبداللہ بن سائب رضی اللہ عنہ کی قبر سے فارغ ہوئے تو کھڑے ہو گئے اور لوگ بھی کھڑے ہو گئے اور ان کے لیے دعا کی۔

سیدنا عمرو بن عاص رضی اللہ عنہ نے اپنے بیٹے سیدنا عبداللہ رضی اللہ عنہما سے کہا: جب میں فوت ہو جاؤں تو میرے ساتھ نوحہ کرنے والی نہ لے کر آنا اور نہ ہی آگ لانا، جب مجھے دفن کر دو تو مجھ پر مٹی ڈالو۔ جب تم میری قبر سے فارغ ہو جاؤ تو میری قبر کے ارد گرد اتنی دیر کھڑے رہنا جس قدر اونٹ ذبح کر کے تقسیم کیا جاتا ہے، میں تم سے انس محسوس کروں گا جب تک میں جان نہ لوں کہ میرے رب کے بھیجے ہوئے فرشتے واپس جا چکے ہیں۔