السنن الكبرى للبيهقي

سیدنا عامر رضی اللہ عنہ فرماتے ہیں کہ رسول اللہ ﷺ کو سیدنا علی، سیدنا فضل اور سیدنا اسامہ بن زید رضی اللہ عنہم نے غسل دیا اور انہوں نے ہی آپ کو قبر میں داخل کیا، سدی کہتا ہے: مجھے مرحب یا ابن ابی نے حدیث بیان کی کہ ان کے ساتھ آپ کو قبر میں اتارتے وقت سیدنا عبد الرحمن بن عوف رضی اللہ عنہ بھی تھے، جب آپ کو دفن کر کے فارغ ہوئے تو سیدنا علی رضی اللہ عنہ فرمانے لگے: آدمی کے قریب اس کا اہل ہوتا ہے۔

سیدنا ابومرحب رضی اللہ عنہ فرماتے ہیں کہ سیدنا عبدالرحمن بن عوف رضی اللہ عنہ نبی ﷺ کی قبر مبارک میں اترے، گویا کہ میں ان چار آدمیوں کو دیکھ رہا ہوں۔

سیدنا علی بن ابی طالب رضی اللہ عنہ فرماتے ہیں: میں نے رسول اللہ ﷺ کو غسل دیا، میں نے آپ ﷺ میں وہ چیز دیکھنی چاہی جو میت میں دیکھی جاتی ہے تو مجھے کوئی چیز نظر نہ آئی، میں نے آپ ﷺ کو زندہ اور فوت ہوتے ہوئے پاک حالت میں دیکھا اور آپ ﷺ کی تدفین چار آدمیوں کے سپرد ہوئی: سیدنا علی رضی اللہ عنہ، سیدنا عباس، سیدنا فضل رضی اللہ عنہما اور رسول اللہ ﷺ کے غلام صالح رضی اللہ عنہ اور رسول اللہ ﷺ کے لیے لحد بنائی گئی اور اس پر کچی اینٹیں نصب کی گئیں۔

سیدنا عبداللہ بن عباس رضی اللہ عنہما فرماتے ہیں کہ جو لوگ رسول اللہ ﷺ کی قبر میں اترے تھے، ان میں سیدنا علی بن ابی طالب، سیدنا فضل بن عباس، سیدنا قثم بن عباس رضی اللہ عنہم اور رسول اللہ ﷺ کے غلام سیدنا شقران رضی اللہ عنہ تھے۔ سیدنا اوس بن خولی رضی اللہ عنہ نے سیدنا علی رضی اللہ عنہ سے کہا کہ میں تجھے اللہ کا واسطہ اور رسول اللہ ﷺ کی قرابت داری کے لحاظ سے سوال کرتا ہوں، انہوں نے فرمایا: اترو، تو وہ بھی لوگوں کے ساتھ اترے تو ان کی تعداد پانچ تھی۔ شیخ نے فرمایا: شقران رسول اللہ ﷺ کے غلام صالح کا لقب ہے۔

سیدنا جابر بن عبداللہ رضی اللہ عنہما سے روایت ہے کہ لوگوں نے قبرستان میں آگ دیکھی تو وہ وہاں آئے، تو دیکھا کہ رسول اللہ ﷺ قبر میں ہیں اور فرما رہے تھے: ”مجھے اپنے ساتھی کو پکڑاؤ“ جبکہ وہ وہ شخص تھا جو ذکر کے وقت اپنی آواز بلند کرتا تھا۔

سیدنا انس رضی اللہ عنہ فرماتے ہیں: ہم رسول اللہ ﷺ کی بیٹی کی وفات پر آپ کے پاس حاضر ہوئے اور آپ ﷺ ان کی قبر پر بیٹھے تھے، آپ کی آنکھیں آنسو بہا رہی تھیں۔ آپ ﷺ نے فرمایا: ”کیا تم میں سے کوئی ہے جو آج رات اپنے اہل کے پاس نہ گیا ہو؟“ تو سیدنا ابو طلحہ رضی اللہ عنہ نے کہا: میں اے اللہ کے رسول! آپ ﷺ نے فرمایا: ”تو اس کی قبر میں اتر۔“ تو وہ قبر میں اترے اور یونس نے «هَلْ مِنْكُمْ مِنْ رَجُلٍ» کے الفاظ نقل کیے ہیں۔

سیدنا عبداللہ بن عمرو رضی اللہ عنہما سے روایت ہے، انہوں نے کہا کہ ایک آدمی ان کے پاس آیا اور پوچھا: یہ کون سی حدیث ہے جو آپ بیان کرتے ہیں؟ آپ کہتے ہیں کہ قیامت فلاں فلاں وقت تک قائم ہو جائے گی؟ تو انہوں نے کہا: «سُبْحَانَ اللهِ» ”اللہ پاک ہے“ - یا «لَا إِلَهَ إِلَّا اللهُ» ”اللہ کے سوا کوئی معبود نہیں“ یا اسی طرح کا کوئی کلمہ کہا - میرا تو یہ ارادہ تھا کہ اب کبھی کسی سے کوئی بات بیان نہ کروں، میں نے تو صرف یہ کہا تھا کہ تم عنقریب ایک بڑا معاملہ دیکھو گے، بیت اللہ کو جلا دیا جائے گا، اور ایسا ایسا ہوگا، پھر انہوں نے کہا: رسول اللہ ﷺ نے فرمایا: ”میری امت میں دجال نکلے گا اور وہ چالیس - مجھے معلوم نہیں کہ چالیس دن یا چالیس مہینے یا چالیس سال - تک رہے گا، پھر اللہ تعالیٰ عیسیٰ بن مریم علیہ السلام کو مبعوث فرمائے گا، وہ (حلیے میں) عروہ بن مسعود رضی اللہ عنہ کی طرح ہوں گے، وہ اسے تلاش کریں گے اور اسے ہلاک کر دیں گے، پھر لوگ سات سال تک اس طرح رہیں گے کہ دو آدمیوں کے درمیان کوئی دشمنی نہیں ہوگی، پھر اللہ تعالیٰ شام کی طرف سے ایک ٹھنڈی ہوا بھیجے گا، تو روئے زمین پر کوئی ایسا شخص باقی نہیں رہے گا جس کے دل میں ایک ذرہ برابر بھی خیر یا ایمان ہو مگر وہ ہوا اس کی روح قبض کر لے گی، یہاں تک کہ اگر تم میں سے کوئی پہاڑ کے اندرونی حصے میں بھی داخل ہو جائے گا تو وہ ہوا وہاں بھی پہنچ کر اس کی روح قبض کر لے گی“، انہوں نے کہا: میں نے یہ رسول اللہ ﷺ سے سنا ہے، آپ ﷺ نے فرمایا: ”پھر بدترین لوگ باقی رہ جائیں گے جن کی تیزی پرندوں جیسی اور عقلیں درندوں جیسی ہوں گی، وہ نہ کسی نیکی کو پہچانیں گے اور نہ کسی برائی کا انکار کریں گے، پھر شیطان ان کے سامنے ایک صورت بنا کر آئے گا اور کہے گا: کیا تم (میری بات) قبول نہیں کرو گے؟ وہ کہیں گے: تو ہمیں کیا حکم دیتا ہے؟ تو وہ انہیں بتوں کی پوجا کرنے کا حکم دے گا، اور اس حال میں ان کا رزق فراواں ہوگا اور ان کی زندگی خوشحال ہوگی، پھر صور پھونکا جائے گا، جو بھی اسے سنے گا وہ اپنی گردن کا ایک پہلو جھکا دے گا اور دوسرا پہلو اٹھا دے گا، اور سب سے پہلے اسے وہ شخص سنے گا جو اپنے اونٹوں کا حوض درست کر رہا ہوگا، پس وہ بیہوش ہو جائے گا اور تمام لوگ بیہوش ہو جائیں گے، پھر اللہ تعالیٰ بارش نازل فرمائے گا - یا فرمایا: بارش بھیجے گا - جو شبنم کی طرح ہوگی - یا سائے کی طرح (راوی نعمان کو شک ہے) - جس سے لوگوں کے اجسام اگ آئیں گے، پھر دوبارہ اس میں صور پھونکا جائے گا تو اچانک وہ کھڑے ہو کر دیکھ رہے ہوں گے، پھر کہا جائے گا: اے لوگو! اپنے رب کی طرف آؤ، ﴿وَقِفُوهُمْ إِنَّهُمْ مَسْئُولُونَ﴾ [سورة الصافات: 24]، پھر کہا جائے گا: جہنم کا لشکر نکالو، پوچھا جائے گا: کتنوں میں سے؟ کہا جائے گا: ہر ہزار میں سے نو سو ننانوے، یہی وہ دن ہے جو ﴿يَجْعَلُ الْوِلْدَانَ شِيبًا﴾ [سورة المزمل: 17] اور جس دن ﴿يَوْمَ يُكْشَفُ عَنْ سَاقٍ﴾ [سورة القلم: 42]“۔

عبدالرحمن بن ابزی رضی اللہ عنہ فرماتے ہیں کہ عمر بن خطاب رضی اللہ عنہ نے زینب بنت جحش رضی اللہ عنہا پر چار تکبیرات کہیں، پھر ازواجِ نبی ﷺ کی طرف پیغام بھیجا کہ اسے قبر میں کون اتارے؟ تو انہوں نے کہا: جو ان کی زندگی میں ان کے پاس آتا تھا۔
یعلیٰ بن عبید اسماعیل سے نقل فرماتے ہیں اور اس میں یہ بات زیادہ ہے کہ عمر رضی اللہ عنہ پسند کرتے تھے کہ وہ انہیں قبر میں داخل کریں، سو جب انہوں نے کہا جو کہا: تو عمر رضی اللہ عنہ نے کہا انہوں نے سچ کہا۔