صحيح الادب المفرد

عبداللہ بن صامت سے روایت ہے، انہوں نے کہا: میں نے سیدنا ابوذر رضی اللہ عنہ سے کہا: میں عبدالرحمن بن ام الحکم کے پاس سے گزرا، میں نے سلام کیا تو اس نے مجھے کوئی جواب نہیں دیا ؟ انہوں نے فرمایا : ”اے بھتیجے! اس سے تمہارا کیا (نقصان) ہوتا ہے ؟ تمہیں اس نے جواب دے دیا جو اس سے بہتر ہے، یعنی وہ فرشتہ جو اس کی دائیں جانب ہے ۔“

سیدنا عبداللہ (بن مسعود) رضی اللہ عنہ سے روایت ہے، انہوں نے فرمایا : ”بیشک سلام اللہ کے ناموں میں سے ایک نام ہے، اللہ نے اسے زمین میں رکھا ہے، لہٰذا اسے آپس میں عام کرو۔ جب آدمی کچھ لوگوں کو سلام کرے اور وہ اسے جواب دیں تو اسے ان پر ایک درجہ فضیلت حاصل ہوتی ہے، کیونکہ اس نے انہیں سلام یاد دلایا، اور اگر وہ اسے جواب نہ دیں تو اسے وہ جواب دیتا ہے جو ان سے بہتر اور پاکیزہ ہے ۔“

حسن (بصری) سے روایت ہے، انہوں نے فرمایا : ”سلام کرنا نفل ہے اور اس کا جواب دینا فرض ہے ۔“