صحيح الادب المفرد

سیدنا عبداللہ بن عمرو رضی اللہ عنہما سے روایت ہے، انہوں نے کہا: ایک دفعہ ہم مکہ اور مدینہ کے درمیان ایک درخت کے سائے میں نبی صلی اللہ علیہ وسلم کے پاس بیٹھے ہوئے تھے کہ ایک اعرابی آیا جو لوگوں میں سب سے زیادہ اجڈ اور سخت مزاج تھا، اس نے کہا: السلام علیکم۔ تو لوگوں نے کہا: ”وعلیکم (السلام) ۔“

ابوجمرہ سے روایت ہے، (انہوں نے کہا:) میں نے سیدنا ابن عباس رضی اللہ عنہما کو سنا کہ جب انہیں سلام کیا جاتا تو وہ کہتے: «وعليك، ورحمة الله» ”اور تم پر بھی (سلام) اور اللہ کی رحمت ہو ۔“

ابو عبداللہ (امام بخاری) نے کہا: اور سیدہ قیلہ رضی اللہ عنہا نے بیان کیا: ایک آدمی نے کہا: السلام علیکم یا رسول اللہ! (اے اللہ کے رسول! آپ پر سلام ہو) تو آپ صلی اللہ علیہ وسلم نے فرمایا : ”وعلیک السلام ورحمۃ اللہ (اور تم پر بھی سلام اور اللہ کی رحمت ہو) ۔“

سیدنا ابوذر رضی اللہ عنہ سے روایت ہے، انہوں نے کہا: میں نبی صلی اللہ علیہ وسلم کے پاس اس وقت آیا جب آپ اپنی نماز سے فارغ ہوئے، تو میں پہلا شخص تھا جس نے آپ کو اسلام کے سلام کے ساتھ سلام کیا، آپ صلی اللہ علیہ وسلم نے فرمایا : ”وعلیک ورحمۃ اللہ (اور تم پر بھی سلام اور اللہ کی رحمت ہو)، تم کن لوگوں میں سے ہو ؟“ میں نے کہا: (قبیلہ) غفار سے ۔

معاویہ بن قرہ سے روایت ہے، انہوں نے کہا: مجھ سے میرے والد نے فرمایا : ”اے میرے بیٹے! جب کوئی آدمی تمہارے پاس سے گزرے اور کہے: السلام علیکم، تو تم (صرف) وعلیک نہ کہو، گویا کہ تم اسی اکیلے کو اس (جواب) کے ساتھ خاص کر رہے ہو، کیونکہ وہ اکیلا نہیں ہوتا، بلکہ تم (بھی) کہو: السلام علیکم ۔“