صحيح الادب المفرد

سیدنا ابن مسعود رضی اللہ عنہ سے روایت ہے، انہوں نے فرمایا: ”تم ایسے زمانے میں ہو جس میں فقہاء (دین کی سمجھ رکھنے والے) زیادہ ہیں اور خطیب کم ہیں، مانگنے والے کم ہیں اور دینے والے زیادہ ہیں، اس میں عمل خواہش کی رہنمائی کرتا ہے۔ اور تمہارے بعد ایک ایسا زمانہ آئے گا جس میں فقہاء کم ہوں گے اور خطیب زیادہ ہوں گے، مانگنے والے زیادہ ہوں گے اور دینے والے کم ہوں گے، اس میں خواہش عمل کی رہنمائی کرے گی۔ جان لو کہ آخری زمانے میں اچھی سیرت و روش بعض اعمال سے بہتر ہو گی۔“

جریری سے روایت ہے کہ سیدنا ابوالطفیل رضی اللہ عنہ سے میں نے پوچھا: کیا آپ نے نبی صلی اللہ علیہ وسلم کو دیکھا ہے؟ انہوں نے فرمایا: ”ہاں، اور میں روئے زمین پر اپنے سوا کسی ایسے زندہ آدمی کو نہیں جانتا جس نے نبی صلی اللہ علیہ وسلم کو دیکھا ہو۔“ انہوں نے کہا: ”اور آپ صلی اللہ علیہ وسلم سفید رنگ والے، خوبصورت چہرے والے تھے۔“

سیدنا ابن عباس رضی اللہ عنہما نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”اچھی سیرت، اچھی وضع قطع اور میانہ روی نبوت کے پچیس حصوں میں سے ایک حصہ ہے۔“