صحيح الادب المفرد

سیدہ عائشہ رضی اللہ عنہا سے روایت ہے ، انہوں نے کہا : ایک دن سیدنا ابوبکر رضی اللہ عنہ نے فرمایا : ”اللہ کی قسم ! روئے زمین پر کوئی آدمی مجھے عمر سے زیادہ محبوب نہیں ۔“ پھر جب وہ باہر گئے تو لوٹ کر آئے اور فرمایا : بیٹی ! میں نے کس طرح قسم کھائی تھی ؟ میں نے انہیں (وہ الفاظ) بتا دیے ۔ تو انہوں نے فرمایا : ”(عمر) مجھے زیادہ عزیز ہیں ، مگر اولاد دل سے زیادہ چمٹی ہوئی ہوتی ہے ۔“

ابن ابی نعم سے روایت ہے ، انہوں نے کہا : میں سیدنا ابن عمر رضی اللہ عنہما کے پاس موجود تھا کہ ایک آدمی نے ان سے مچھر کے خون کے بارے میں پوچھا ۔ انہوں نے فرمایا : تم کہاں کے ہو ؟ اس نے کہا : عراق والوں میں سے ہوں ۔ انہوں نے فرمایا : اسے دیکھو ! یہ مجھ سے مچھر کے خون کے بارے میں پوچھتا ہے ، حالانکہ ان لوگوں نے نبی صلی اللہ علیہ وسلم کے بیٹے (نواسے) کو قتل کر دیا ، میں نے نبی صلی اللہ علیہ وسلم کو یہ فرماتے ہوئے سنا : ”وہ دونوں (حسن و حسین) دنیا میں میرے دو پھول ہیں ۔“