المستدرك على الصحيحين

عمرہ سے روایت ہے کہ سیدہ عائشہ رضی اللہ عنہا نے فرمایا: میں نے خواب میں دیکھا گویا تین چاند میرے حجرے میں گر پڑے ہیں، میں نے اپنا خواب سیدنا ابوبکر رضی اللہ عنہ کو سنایا، پھر جب نبی کریم ﷺ کو میرے گھر میں دفن کیا گیا تو سیدنا ابوبکر رضی اللہ عنہ نے فرمایا: ”یہ تمہارے ان چاندوں میں سے ایک ہے اور یہ ان سب میں بہترین ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابو ایوب رضی اللہ عنہ سے روایت ہے کہ نبی کریم ﷺ نے فرمایا: ”میں نے خواب میں دیکھا کہ کالی بھیڑیں ہیں جن کے پیچھے سفید بھیڑیں چل رہی ہیں، اے ابوبکر! اس کی تعبیر بیان کریں،“ سیدنا ابوبکر رضی اللہ عنہ نے عرض کی: اے اللہ کے رسول! اس سے مراد عرب لوگ ہیں جو آپ کی پیروی کریں گے، پھر ان کے پیچھے عجم (غیر عرب) آئیں گے یہاں تک کہ وہ اسے (اسلام سے) بھر دیں گے، تو نبی کریم ﷺ نے فرمایا: ”فرشتے نے سحری کے وقت اسی طرح تعبیر دی تھی۔“

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا: ”میں نے کالی بھیڑوں کی ایک کثیر تعداد دیکھی جن میں بہت سی سفید بھیڑیں داخل ہو گئیں،“ صحابہ نے عرض کی: اے اللہ کے رسول! آپ نے اس کی کیا تعبیر لی ہے؟ آپ ﷺ نے فرمایا: ”عجم تمہارے دین اور تمہارے نسب میں تمہارے شریک ہو جائیں گے،“ صحابہ نے حیرت سے پوچھا: اے اللہ کے رسول! کیا عجم؟ آپ ﷺ نے فرمایا: «لَوْ كَانَ الْإِيمَانُ مُعَلَّقًا بِالثُّرَيَّا لَنَالَهُ رِجَالٌ مِنَ الْعَجَمِ» ”اگر ایمان ثریا ستارے کے ساتھ لٹکا ہوا ہوتا تو عجم کے کچھ لوگ اسے ضرور پا لیتے اور ان کے ذریعے سے لوگ سعادت حاصل کرتے۔“
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔