المستدرك على الصحيحين

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے شراب پینے پر کوئی (مستقل) حد مقرر نہیں فرمائی تھی۔ ابن عباس رضی اللہ عنہما فرماتے ہیں کہ ایک شخص نے شراب پی کر نشہ کر لیا، وہ راستے میں لڑکھڑاتا ہوا پایا گیا تو ہم اسے نبی کریم ﷺ کی طرف لے جانے لگے، جب وہ سیدنا عباس رضی اللہ عنہ کے گھر کے برابر پہنچا تو وہ (ہمارے ہاتھ سے) چھوٹ کر بھاگ گیا اور سیدنا عباس رضی اللہ عنہ سے لپٹ گیا، اس بات کا ذکر نبی کریم ﷺ سے کیا گیا تو آپ ﷺ مسکرا دیے اور فرمایا: ”کیا اس نے ایسا کیا؟“ اور آپ ﷺ نے اس کے متعلق (سزا کا) کوئی حکم نہیں دیا۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عقبہ بن حارث رضی اللہ عنہ سے روایت ہے کہ نعیمان (یا ان کے صاحبزادے) کو شراب پیے ہوئے لایا گیا تو رسول اللہ ﷺ نے گھر میں موجود لوگوں کو حکم دیا کہ وہ اسے ماریں، راوی کہتے ہیں کہ میں بھی اسے مارنے والوں میں شامل تھا، ہم نے اسے جوتوں اور کھجور کی ٹہنیوں سے مارا۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عقبہ بن حارث رضی اللہ عنہ سے روایت ہے کہ نعیمان کو لایا گیا، تو رسول اللہ ﷺ نے گھر میں موجود لوگوں کو حکم دیا، چنانچہ انہوں نے انہیں ہاتھوں اور جوتوں سے مارا، اور میں بھی انہیں مارنے والوں میں شامل تھا۔

سیدنا سائب بن یزید رضی اللہ عنہ سے روایت ہے کہ رسول اللہ ﷺ کے عہدِ مبارک، سیدنا ابوبکر صدیق رضی اللہ عنہ کی خلافت اور سیدنا عمر فاروق رضی اللہ عنہ کے ابتدائی دورِ خلافت میں شراب پینے والے کو لایا جاتا تو ہم اٹھ کر اسے اپنے ہاتھوں، جوتوں اور چادروں سے مارتے تھے، یہاں تک کہ سیدنا عمر رضی اللہ عنہ کے دور کے ابتدائی حصے میں آپ نے اس پر چالیس کوڑے مقرر کیے، پھر جب لوگ اس میں حد سے بڑھ گئے اور فسق و فجور زیادہ ہوا تو آپ نے اس پر اسی کوڑے مقرر کیے۔
یہ حدیث شیخین کی شرط پر صحیح ہے۔

سیدنا عبد الرحمن بن ازہر رضی اللہ عنہ سے روایت ہے کہ نبی کریم ﷺ کے پاس ایک شراب پینے والے کو لایا گیا تو آپ ﷺ نے فرمایا: ”تم سب اٹھ کر اسے مارو۔“ پس لوگ اس کی طرف بڑھے اور اسے اپنے جوتوں سے مارا۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابوسعید خدری رضی اللہ عنہ سے روایت ہے، انہوں نے کہا: میں مٹی کے گھڑوں کا نبیذ اس وقت سے نہیں پیتا جب نبی کریم ﷺ کے پاس ایک مدہوش شخص کو لایا گیا، اس نے عرض کی: اے اللہ کے رسول! میں نے شراب نہیں پی بلکہ میں نے کدو کے برتن میں منقے اور کھجور کا نبیذ پیا تھا، تو آپ ﷺ کے حکم پر اسے ہاتھوں سے کچوکے لگائے گئے اور جوتوں سے مارا گیا، اور آپ ﷺ نے منقہ اور کھجور کو ملا کر بھگونے اور کدو کے برتن «دباء» کے استعمال سے منع فرما دیا۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبد الرحمن بن ازہر رضی اللہ عنہ سے روایت ہے، انہوں نے کہا: میں نے غزوہ حنین کے دن رسول اللہ ﷺ کو دیکھا کہ آپ ﷺ لوگوں کے درمیان سے گزرتے ہوئے سیدنا خالد بن ولید رضی اللہ عنہ کی منزل کے بارے میں دریافت فرما رہے تھے، اسی دوران ایک شرابی کو لایا گیا، تو رسول اللہ ﷺ نے اپنے پاس موجود لوگوں کو حکم دیا کہ ان کے ہاتھوں میں جو کچھ بھی ہے اس کے ساتھ اسے ماریں، راوی کہتے ہیں: اور رسول اللہ ﷺ نے اس کے چہرے پر مٹی بھی ڈالی، پھر سیدنا ابوبکر صدیق رضی اللہ عنہ کے پاس ایک شرابی لایا گیا تو انہوں نے اس دن کی مار کو مدنظر رکھتے ہوئے چالیس کوڑے لگائے، اور سیدنا عمر رضی اللہ عنہ نے بھی چالیس کوڑے لگائے۔

وبرہ کلبی سے روایت ہے، انہوں نے کہا کہ مجھے سیدنا خالد بن ولید رضی اللہ عنہ نے سیدنا عمر فاروق رضی اللہ عنہ کی طرف بھیجا، میں ان کے پاس پہنچا تو وہ مسجد میں تھے اور ان کے ساتھ سیدنا عثمان بن عفان، سیدنا علی، سیدنا عبد الرحمن بن عوف، سیدنا طلحہ اور سیدنا زبیر رضی اللہ عنہم مسجد میں تکیہ لگائے بیٹھے تھے، میں نے عرض کی: مجھے خالد بن ولید نے آپ کی طرف بھیجا ہے، وہ آپ کو سلام کہتے ہیں اور عرض کرتے ہیں کہ لوگ شراب نوشی میں بہت زیادہ ملوث ہو گئے ہیں اور سزا کو معمولی سمجھنے لگے ہیں، سیدنا عمر رضی اللہ عنہ نے فرمایا: یہ لوگ تمہارے سامنے موجود ہیں، ان سے مشورہ کر لو، تو سیدنا علی رضی اللہ عنہ نے فرمایا: ہماری رائے یہ ہے کہ ”جب وہ نشہ کرتا ہے تو ہذیان بکتا ہے، اور جب ہذیان بکتا ہے تو بہتان تراشی کرتا ہے، اور بہتان لگانے والے کی حد اسی کوڑے ہے۔“ سیدنا عمر رضی اللہ عنہ نے فرمایا: اپنے صاحب (خالد) کو بتا دو جو انہوں نے کہا ہے، چنانچہ سیدنا خالد رضی اللہ عنہ نے اسی کوڑے لگائے اور سیدنا عمر رضی اللہ عنہ نے بھی اسی کوڑے لگائے، پھر سیدنا عمر رضی اللہ عنہ کا معمول یہ تھا کہ جب کوئی طاقتور شخص جو شراب کا عادی ہو لایا جاتا تو اسے اسی کوڑے لگاتے اور جب کوئی کمزور شخص لایا جاتا جس سے لغزش ہو گئی ہوتی تو اسے چالیس کوڑے لگاتے، پھر سیدنا عثمان رضی اللہ عنہ نے بھی اسی اور چالیس کوڑے لگائے۔
یہ حدیث صحیح الاسناد ہے لیکن شیخین نے اسے روایت نہیں کیا۔