المستدرك على الصحيحين

سیدنا عبداللہ بن عباس رضی اللہ عنہما سے روایت ہے کہ دورِ جاہلیت کے لوگ (اپنی پسند کے مطابق) کچھ چیزیں کھاتے تھے اور کچھ چیزوں کو ناپسندیدگی کی بنا پر چھوڑ دیتے تھے، پھر اللہ تعالیٰ نے اپنے نبی ﷺ کو مبعوث فرمایا اور اپنی کتاب نازل کی، اس کے حلال کو حلال اور حرام کو حرام قرار دیا، پس جسے اللہ نے حلال کیا وہ حلال ہے اور جسے حرام کیا وہ حرام ہے، اور جس چیز سے اللہ نے خاموشی اختیار فرمائی وہ معاف (یعنی مباح) ہے؛ اور انہوں نے یہ آیت تلاوت کی: ﴿قُلْ لَا أَجِدُ فِي مَا أُوحِيَ إِلَيَّ مُحَرَّمًا﴾ ”(اے نبی!) آپ کہہ دیں کہ جو وحی میری طرف آئی ہے اس میں میں کوئی ایسی چیز نہیں پاتا جو (کھانے والے پر) حرام ہو۔“ [سورة الأنعام: 145]
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابوثعلبہ خشنی رضی اللہ عنہ سے روایت ہے کہ رسول اللہ ﷺ نے فرمایا: ”بیشک اللہ تعالیٰ نے کچھ حدیں مقرر کی ہیں پس ان سے تجاوز نہ کرو، اور تمہارے لیے کچھ فرائض مقرر کیے ہیں پس انہیں ضائع نہ کرو، اور کچھ چیزوں کو حرام قرار دیا ہے پس ان کی حرمت پامال نہ کرو، اور تمہارے رب نے بھولے بغیر محض تمہارے لیے رحمت کے طور پر کچھ چیزوں سے خاموشی اختیار فرمائی ہے، پس انہیں (بطورِ نعمت) قبول کرو اور ان کی (بلاوجہ) کھوج نہ لگاؤ۔“