المستدرك على الصحيحين

سیدنا ابن عمر رضی اللہ عنہما سے روایت ہے کہ وہ قدامہ بن مظعون بن حبیب جمی ہیں، انہوں نے رسول اللہ ﷺ کے دارِ ارقم میں داخل ہونے اور وہاں (علانیہ) دعوت شروع کرنے سے پہلے ہی اسلام قبول کر لیا تھا، وہ سیدنا عثمان بن مظعون رضی اللہ عنہ کے بھائی ہیں، سیدنا قدامہ رضی اللہ عنہ نے حبشہ کی طرف دوسری ہجرت کی تھی، ان کے نکاح میں سیدنا عمر بن خطاب رضی اللہ عنہ کی بہن صفیہ بنت خطاب تھیں، اور سیدنا قدامہ رضی اللہ عنہ رسول اللہ ﷺ کے ہمراہ غزوہ بدر، احد، خندق اور تمام معرکوں میں شریک رہے۔

مصعب بن سعد سے روایت ہے کہ بدر کے معرکے سے پہلے مشرکین نے سیدنا حذیفہ رضی اللہ عنہ اور ان کے والد کو پکڑ لیا اور وہ انہیں قتل کرنا چاہتے تھے، پھر انہوں نے ان سے اللہ کا پختہ عہد و میثاق لیا کہ وہ ان کے خلاف (نبی کریم ﷺ کی) مدد نہیں کریں گے، چنانچہ ان دونوں نے ان کے لیے حلف اٹھا لیا اور انہوں نے انہیں رہا کر دیا، پھر وہ دونوں نبی کریم ﷺ کی خدمت میں حاضر ہوئے اور سارا واقعہ سنا کر عرض کیا: ہم نے ان سے حلف اٹھایا ہے، اگر آپ چاہیں تو ہم آپ کے ساتھ مل کر (اس عہد کے باوجود) قتال کریں، آپ ﷺ نے فرمایا: ”ہم (عہد) پورا کریں گے «نَفِي» اور ان کے خلاف اللہ سے مدد چاہیں گے۔“