المستدرك على الصحيحين

سیدنا عبداللہ بن عمر رضی اللہ عنہما فرماتے ہیں کہ ہم (صحابہ) یہ کہا کرتے تھے کہ جس شخص نے اسلام لانے اور اس کی پہچان حاصل کرنے کے بعد اپنا دین چھوڑ دیا، اس کی توبہ قبول نہیں ہوگی، تب اللہ تعالیٰ نے ان کے متعلق یہ آیت نازل فرمائی: ﴿قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ﴾ [سورة الزمر: 53] ”(اے نبی!) کہہ دیجیے کہ اے میرے وہ بندو جنہوں نے اپنی جانوں پر زیادتی کی ہے، تم اللہ کی رحمت سے مایوس نہ ہو۔“ ابن عمر کہتے ہیں کہ میں نے یہ آیت اپنے ہاتھ سے لکھی اور اسے ہشام بن العاص بن وائل کی طرف بھیج دیا، انہوں نے اسے بلند آواز سے پڑھا، پھر اپنے اونٹ پر سوار ہوئے اور مدینہ منورہ پہنچ گئے۔

سیدنا عبداللہ بن زبیر رضی اللہ عنہما سے روایت ہے کہ جب مکہ فتح ہوا تو عکرمہ بن ابی جہل (خوف کے مارے) بھاگ گئے، ان کی زوجہ ام حکیم بنت حارث بن ہشام ایک نہایت عقل مند خاتون تھیں، انہوں نے اسلام قبول کیا اور پھر رسول اللہ ﷺ سے (اپنے شوہر کے لیے) امان طلب کی، آپ ﷺ نے انہیں عکرمہ کو واپس لانے کا حکم دیا۔ انہوں نے عکرمہ سے جا کر کہا: ”میں تمہارے پاس اس ہستی کے پاس سے آئی ہوں جو سب سے زیادہ صلہ رحمی کرنے والے، سب سے زیادہ نیکی کرنے والے اور لوگوں میں سب سے بہتر ہیں، میں نے تمہارے لیے امان طلب کی ہے اور انہوں نے تمہیں امان دے دی ہے“، چنانچہ عکرمہ ان کے ساتھ واپس آ گئے۔ جب وہ مکہ کے قریب پہنچے تو رسول اللہ ﷺ نے اپنے صحابہ سے فرمایا: ”تمہارے پاس عکرمہ بن ابی جہل مومن اور مہاجر بن کر آ رہا ہے، تم اس کے باپ کو برا بھلا نہ کہنا، کیونکہ مردے کو گالی دینا زندہ کو تکلیف پہنچاتا ہے جبکہ وہ مردے تک نہیں پہنچتی۔“ جب وہ رسول اللہ ﷺ کے دروازے پر پہنچے تو آپ ﷺ بہت خوش ہوئے اور ان کی آمد کی مسرت میں اپنے قدموں پر کھڑے ہو کر ان کا استقبال فرمایا۔