المستدرك على الصحيحين

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ نے مدینہ تشریف لانے کے دسویں سال حج کیا، اور آپ ﷺ نے حجِ افراد ادا فرمایا تھا۔

سفیان سے روایت ہے، انہوں نے کہا: نبی کریم ﷺ نے ہجرت سے پہلے کئی بار حج کیے اور ہجرت کے بعد صرف حجۃ الوداع ادا فرمایا، آپ ﷺ کی قربانی کے جانوروں کی کل تعداد سو اونٹ تھی جن میں ایک ایسا اونٹ بھی شامل تھا جس کی ناک میں چاندی کا چھلا پڑا ہوا تھا، نبی کریم ﷺ نے اپنے دستِ مبارک سے تریسٹھ اونٹ ذبح کیے اور باقی سیدنا علی رضی اللہ عنہ نے ذبح کیے۔ ثوری سے پوچھا گیا کہ یہ کس کی روایت ہے؟ انہوں نے کہا: جعفر بن محمد اپنے والد سے اور وہ سیدنا جابر رضی اللہ عنہ سے، اور ابن ابی لیلیٰ، حکم سے، وہ مقسم سے اور وہ سیدنا عبداللہ بن عباس رضی اللہ عنہما سے روایت کرتے ہیں۔
امام حاکم فرماتے ہیں: جہاں تک حجۃ الوداع کی تفسیر میں منقول احادیث کا تعلق ہے تو شیخین نے انہیں ان کی شرائط پر صحیح اسناد کے ساتھ روایت کرنے پر اتفاق کیا ہے، اور ان میں سب سے زیادہ صحیح اور مکمل جعفر بن محمد صادق کی اپنے والد کے واسطے سے سیدنا جابر رضی اللہ عنہ سے مروی حدیث ہے جسے امام مسلم نے انفرادی طور پر روایت کیا ہے۔ اللہ تعالیٰ کی مشیئت اور اس کی مدد سے اب ہم رسول اللہ ﷺ کے مرضِ وصال کی ابتدا کے ذکر تک پہنچ چکے ہیں۔