المستدرك على الصحيحين

ام صبیہ کے آزاد کردہ غلام عطاء سے روایت ہے، انہوں نے کہا کہ میں نے سیدنا ابوہریرہ رضی اللہ عنہ کو یہ فرماتے ہوئے سنا کہ رسول اللہ ﷺ نے فرمایا: ”عیسیٰ ابن مریم ضرور ایک عادل منصف اور انصاف پرور امام بن کر نازل ہوں گے، اور وہ حج یا عمرہ، یا ان دونوں کو ملا کر کرنے کے لیے ضرور کسی راستے سے گزریں گے، اور وہ ضرور میری قبر پر آئیں گے یہاں تک کہ مجھ پر سلام بھیجیں گے اور میں ضرور ان کے سلام کا جواب دوں گا۔“ سیدنا ابوہریرہ رضی اللہ عنہ (اپنے بھتیجے سے) فرماتے ہیں: ”اے میرے بھتیجے! اگر تم ان سے ملو تو کہنا: ابوہریرہ نے آپ کو سلام کہا ہے۔“
یہ حدیث صحیح الاسناد ہے لیکن شیخین نے اسے اس سیاق (ترتیب) کے ساتھ روایت نہیں کیا۔

سیدنا ابوہریرہ رضی اللہ عنہ سے روایت ہے کہ نبی کریم ﷺ نے فرمایا: ”بے شک اللہ کی روح عیسیٰ ابن مریم تم میں نازل ہونے والے ہیں، پس جب تم انہیں دیکھو تو پہچان لینا: وہ میانہ قد، سرخی و سفیدی مائل رنگت والے مرد ہوں گے، ان پر ہلکے زرد و سرخ رنگ کے دو کپڑے ہوں گے، ان کا سر ایسا معلوم ہوگا کہ گویا اس سے قطرے ٹپک رہے ہیں حالانکہ اسے تری نہیں پہنچی ہوگی، وہ صلیب کو توڑ دیں گے، خنزیر کو قتل کریں گے، جزیہ ختم کر دیں گے اور لوگوں کو اسلام کی دعوت دیں گے، اللہ ان کے زمانے میں مسیح دجال کو ہلاک کر دے گا اور زمین والوں پر ایسی امن و سلامتی نازل ہوگی کہ شیر اونٹوں کے ساتھ، چیتے گائے کے ساتھ اور بھیڑیے بکریوں کے ساتھ چریں گے، اور بچے سانپوں کے ساتھ کھیلیں گے اور وہ انہیں کوئی نقصان نہیں پہنچائیں گے، وہ زمین پر چالیس سال قیام فرمائیں گے، پھر ان کی وفات ہو جائے گی اور مسلمان ان کی نماز جنازہ پڑھیں گے۔“
یہ حدیث صحیح الاسناد ہے لیکن شیخین نے اسے روایت نہیں کیا۔