المستدرك على الصحيحين

سیدنا عباس بن عبدالمطلب رضی اللہ عنہ سے روایت ہے، انہوں نے کہا: ہم بطحاء کے مقام پر رسول اللہ ﷺ کے ساتھ بیٹھے ہوئے تھے کہ وہاں سے ایک بادل گزرا، تو رسول اللہ ﷺ نے پوچھا: ”کیا تم جانتے ہو یہ کیا ہے؟“ ہم نے عرض کیا: اللہ اور اس کا رسول بہتر جانتے ہیں، آپ ﷺ نے فرمایا: ”یہ «السَّحَابُ» (بادل) ہے۔“ ہم نے بھی کہا: یہ بادل ہے۔ پھر آپ ﷺ نے فرمایا: ”اور یہ «المُزْنُ» (برستا ہوا بادل) ہے۔“ ہم نے بھی کہا: یہ «المُزْنُ» ہے۔ پھر آپ ﷺ نے فرمایا: ”اور یہ «العَنَانُ» (آسمان کی بلندی پر چھایا ہوا بادل) ہے۔“ پھر آپ ﷺ کچھ دیر خاموش رہے، پھر پوچھا: ”کیا تم جانتے ہو کہ آسمان اور زمین کے درمیان کتنا فاصلہ ہے؟“ ہم نے عرض کیا: اللہ اور اس کا رسول بہتر جانتے ہیں، آپ ﷺ نے فرمایا: ”ان دونوں کے درمیان پانچ سو سال کی مسافت کا فاصلہ ہے، اور ہر آسمان سے دوسرے آسمان تک بھی پانچ سو سال کی مسافت کا فاصلہ ہے، اور ہر آسمان کی موٹائی بھی پانچ سو سال کی مسافت ہے، اور ساتویں آسمان کے اوپر ایک سمندر ہے جس کے اوپر اور نچلے حصے کے درمیان اتنا ہی فاصلہ ہے جتنا زمین اور آسمان کے درمیان ہے، پھر اس کے اوپر آٹھ «أوْعالٍ» (پہاڑی بکروں کی شکل کے فرشتے) ہیں جن کے گھٹنوں اور کھروں کے درمیان اتنا فاصلہ ہے جتنا زمین اور آسمان کے درمیان ہے، اور اللہ تعالیٰ اس کے بھی اوپر ہے اور اس پر بنی آدم کے اعمال میں سے کچھ بھی پوشیدہ نہیں ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عباس بن عبدالمطلب رضی اللہ عنہ سے اللہ تعالیٰ کے اس فرمان ﴿وَيَحْمِلُ عَرْشَ رَبِّكَ فَوْقَهُمْ يَوْمَئِذٍ ثَمَانِيَةٌ﴾ [سورة الحاقة: 17] کے متعلق روایت ہے، انہوں نے کہا: اس سے مراد آٹھ فرشتے ہیں جو پہاڑی بکروں کی صورت میں ہیں، جن کے کھروں اور گھٹنوں کے درمیان تریسٹھ یا پینسٹھ سال کی مسافت کا فاصلہ ہے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔