المستدرك على الصحيحين

سیدنا عبداللہ بن عمرو بن عاص رضی اللہ عنہما بیان کرتے ہیں کہ میں نے رسول اللہ ﷺ کو یہ فرماتے ہوئے سنا: ”بے شک روزہ دار کے لیے افطار کے وقت ایک ایسی دعا ہے جو رد نہیں کی جاتی۔“ ابن ابی ملیکہ کہتے ہیں کہ میں نے عبداللہ بن عمرو کو افطار کے وقت یہ دعا کرتے ہوئے سنا: «اللَّهُمَّ إِنِّي أَسْأَلُكَ بِرَحْمَتِكَ الَّتِي وَسِعَتْ كُلَّ شَيْءٍ أَنْ تَغْفِرَ لِي ذُنُوبِي» ”اے اللہ! میں تیری اس رحمت کے واسطے سے جو ہر چیز پر محیط ہے تجھ سے سوال کرتا ہوں کہ میرے گناہ معاف فرما دے۔“
اس میں اسحاق نامی راوی اگر زائدہ کے مولیٰ ہیں تو امام مسلم نے ان سے روایت لی ہے، اور اگر وہ ابن ابی فروہ ہیں تو شیخین نے ان سے روایت نہیں لی۔

مروان بن سالم مقفع کہتے ہیں کہ میں نے سیدنا ابن عمر رضی اللہ عنہما کو دیکھا کہ وہ اپنی داڑھی کو مٹھی میں پکڑتے اور جو حصہ مٹھی سے زائد ہوتا اسے کاٹ دیتے، اور انہوں نے بتایا کہ رسول اللہ ﷺ جب افطار کرتے تو یہ دعا پڑھتے تھے: «ذَهَبَ الظَّمَأُ، وَابْتَلَّتِ الْعُرُوقُ، وَثَبَتَ الأَجْرُ إِنْ شَاءَ اللَّهُ» ”پیاس بجھ گئی، رگیں تر ہو گئیں اور ان شاء اللہ اجر ثابت ہو گیا۔“
یہ حدیث شیخین کی شرط پر صحیح ہے، کیونکہ حسین بن واقد اور مروان بن مقفع دونوں سے احتجاج کیا گیا ہے۔