المستدرك على الصحيحين

ام المومنین سیدہ میمونہ رضی اللہ عنہا سے روایت ہے کہ میری ایک لونڈی تھی جسے میں نے آزاد کر دیا، پھر رسول اللہ ﷺ میرے پاس تشریف لائے تو میں نے آپ ﷺ کو اس کی خبر دی، آپ ﷺ نے فرمایا: ”اللہ تمہیں اس کا اجر دے، لیکن اگر تم وہ لونڈی اپنے ننھیال (ماموں وغیرہ) کو دے دیتیں تو یہ تمہارے اجر کے لحاظ سے زیادہ بڑی بات ہوتی۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا ابوہریرہ رضی اللہ عنہ سے روایت ہے کہ نبی کریم ﷺ نے صدقہ کا حکم دیا، تو ایک شخص نے عرض کیا: ”اے اللہ کے رسول! میرے پاس ایک دینار ہے“، آپ ﷺ نے فرمایا: ”اسے اپنی ذات پر خرچ کرو“، اس نے عرض کیا: ”میرے پاس ایک اور ہے“، آپ ﷺ نے فرمایا: ”اسے اپنے بچے پر خرچ کرو“، اس نے عرض کیا: ”میرے پاس ایک اور ہے“، آپ ﷺ نے فرمایا: ”اسے اپنی بیوی پر خرچ کرو“، اس نے عرض کیا: ”میرے پاس ایک اور ہے“، آپ ﷺ نے فرمایا: ”اسے اپنے خادم پر خرچ کرو“، اس نے عرض کیا: ”میرے پاس ایک اور ہے“، آپ ﷺ نے فرمایا: ”تم خود زیادہ بہتر جانتے ہو (کہ اسے کہاں خرچ کرنا ہے)۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔