المستدرك على الصحيحين

ہشام بن عروہ، فاطمہ سے اور وہ سیدہ اسماء رضی اللہ عنہا سے روایت کرتی ہیں، انہوں نے فرمایا: ”رسول اللہ ﷺ نے سورج گرہن کے وقت غلام آزاد کرنے کا حکم دیا۔“
یہ حدیث شیخین کی شرط پر صحیح ہے۔ اور اس کے لیے امام مسلم کی شرط پر ایک صحیح شاہد موجود ہے۔

ہشام بن عروہ، فاطمہ بنت منذر سے اور وہ سیدہ اسماء بنت ابوبکر رضی اللہ عنہما سے روایت کرتی ہیں، انہوں نے فرمایا: ”رسول اللہ ﷺ نے اس وقت غلام آزاد کرنے کا حکم دیا جب سورج کو گرہن لگا تھا۔“

عروہ، سیدہ عائشہ رضی اللہ عنہا سے روایت کرتے ہیں، انہوں نے فرمایا: ”رسول اللہ ﷺ کے زمانے میں سورج کو گرہن لگا۔“ پھر انہوں نے حدیث بیان کی اور اس میں فرمایا: ”پس جب تم یہ دیکھو تو اللہ سے دعا کرو، نماز پڑھو، صدقہ کرو اور غلام آزاد کرو۔“
یہ حدیث شیخین کی شرط پر صحیح ہے۔

قتادہ، ابوقلابہ سے اور وہ سیدنا نعمان بن بشیر رضی اللہ عنہما سے روایت کرتے ہیں کہ: سورج کو گرہن لگا تو نبی کریم ﷺ نے دو رکعت نماز پڑھائی یہاں تک کہ گرہن ختم ہو گیا، پھر آپ ﷺ نے فرمایا: ”یقیناً سورج اور چاند کسی کی موت پر گرہن نہیں ہوتے، بلکہ یہ دونوں اس کی مخلوقات میں سے دو مخلوق ہیں، اور اللہ اپنی مخلوق میں جو چاہتا ہے پیدا کرتا ہے، پھر بے شک اللہ تعالیٰ جب اپنی مخلوق میں سے کسی چیز پر تجلی فرماتا ہے تو وہ اس کے سامنے جھک جاتی ہے، پس جب بھی ان دونوں میں سے کسی کو گرہن لگے تو نماز پڑھو یہاں تک کہ وہ روشن ہو جائے یا اللہ تعالیٰ کوئی اور معاملہ ظاہر فرما دے۔“
یہ حدیث شیخین کی شرط پر صحیح ہے، لیکن انہوں نے اسے ان الفاظ کے ساتھ روایت نہیں کیا۔